(ສພຊ) – ໃນໂອກາດທີ່ເຂົ້າຮ່ວມກອງປະຊຸມເຝິກອົບຮົມສ້າງຄວາມເຂັ້ມແຂງດ້ານການເກັບກໍາຂໍ້ມູນ, ສັງລວມ ແລະ ຂີດຂຽນເອກະສານໃຫ້ແກ່ບັນດາເລຂານຸການການນຳສະພາແຫ່ງຊາດ ແລະ ສະພາປະຊາຊົນຂັ້ນແຂວງ ທີ່ໄດ້ຈັດຂຶ້ນໃນລະຫວ່າງວັນທີ 29-30 ມີນາ 2024 ທີ່ເມືອງວັງວຽງ ແຂວງວຽງຈັນ; ທ່ານ ນາງ ປິ່ງຄຳ ລາຊະສິມມາ ກຳມະ ການຄະນະປະຈຳສະພາແຫ່ງຊາດ ໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງມີບາງຕອນວ່າ: ເລຂານຸການການນໍາ ແມ່ນຜູ້ທີ່ໃກ້ຊິດຕິດແທດການນໍາ, ເຮັດໜ້າທີ່ເປັນເສນາທິການຮອບດ້ານ ແລະ ຮັບໃຊ້ການນໍາ ເປັນຕົ້ນແມ່ນການຄົ້ນຄວ້າເນື້ອໃນ, ສົມທົບກັບພາກສ່ວນກ່ຽວຂ້ອງຮ່າງບົດຄໍາເຫັນຕ່າງໆ, ການສ້າງແຜນການເຄື່ອນໄຫວ, ຄົ້ນຄວ້າສັງລວມສະພາບການ ແລະ ວຽກບໍລິຫານ-ປະສານສົມທົບກັບພາກສ່ວນຕ່າງໆ ໃນການກະກຽມໃຫ້ແກ່ການເຄື່ອນ ໄຫວຂອງການນໍາ ທັງເພື່ອໃຫ້ການນໍາສາມາດນໍາພາ-ຊີ້ນໍາການຈັດຕັ້ງປະຕິບັດແນວທາງນະໂຍບາຍຂອງພັກ-ລັດ ໃຫ້ປາກົດຜົນເປັນຈິງ; ຖ້າເລຂານຸການການນໍາເຮັດວຽກໄດ້ດີ ພາລະໃນການແບກຫາບວຽກງານການເມືອງຂອງການນໍາ ກໍຈະເບົາລົງ ແລະ ຄ່ອງຕົວ, ທຸກພາກສ່ວນພາຍໃຕ້ບັງຄັບບັນຊາຂອງການນໍາ ກໍຈະເຄື່ອນໄຫວວຽກງານໄດ້ສະດວກ, ມີປະສິດທິພາບໃນການຫັນແນວທາງນະໂຍບາຍຂອງພັກ-ລັດ ໃຫ້ເກີດຜົນຕົວຈິງກໍຈະສູງຂຶ້ນ, ແຕ່ຫາກເລຂານຸການການນໍາເຮັດວຽກງານບໍ່ໄດ້ດີ ກໍຈະເປັນສ່ວນໜຶ່ງທີ່ອາດເຮັດໃຫ້ແນວທາງນະໂຍບາຍຂອງພັກ-ລັດທີ່ວາງອອກ ບໍ່ໄດ້ຮັບໝາກຜົນຕາມຄາດໝາຍທີ່ວາງໄວ້.

ທ່ານ ນາງ ປິ່ງຄຳ ລາຊະສິມມາ ຍັງມີຄຳເຫັນ ເນັ້ນຕື່ມບາງບັນຫາຄື:

1. ບັນດາເລຂານຸການການນໍາ ຈະຕ້ອງໄດ້ຮັບການອົບຮົມການເມືອງ-ແນວຄິດຢ່າງປົກກະຕິ, ດ້ວຍຫຼາຍຮູບແບບ; ເຂົ້າຮ່ວມເຝິກອົບຮົມ, ສໍາມະນາຍົກລະດັບວຽກງານເລຂານຸການ, ການສ້າງເອກະສານ ແລະ ວິຊາສະເພາະດ້ານຕ່າງໆ.

2. ເລຂານຸການການນໍາ ຈະຕ້ອງໄດ້ເອົາໃຈໃສ່ສ້າງແຜນການເຄື່ອນໄຫວວຽກງານຂອງສະພາແຫ່ງຊາດ, ຄະນະປະຈໍາສະພາແຫ່ງຊາດ, ສະພາປະຊາຊົນຂັ້ນແຂວງ, ຄະນະປະຈໍາສະພາປະຊາຊົນຂັ້ນແຂວງ ມາເປັນແຜນການເຄື່ອນ ໄຫວນໍາພາ-ຊີ້ນໍາຂອງການນໍາຕໍ່ກົງຈັກເສນາທິການທີ່ຢູ່ໃນຂອບເຂດຄວາມຮັບຜິດຊອບຂອງຂັ້ນເທິງຕົນ ແລະ ຕິດຕາມຊຸກຍູ້ການຈັດຕັ້ງປະຕິບັດແຜນການໃຫ້ດໍາເນີນໄປຢ່າງປົກກະຕິ, ມີການສະຫຼຸບສັງລວມການເຄື່ອນໄຫວວຽກງານຕາມແຜນການທີ່ວາງໄວ້; ເຮັດວຽກຕາມການຊີ້ນໍາຂອງການນໍາ, ຕາມລະບອບລະບຽບການ, ມີຄວາມເປັນເຈົ້າການ ແລະ ປະດິດສ້າງໃນການເຄື່ອນໄຫວວຽກງານທີ່ໄດ້ຮັບມອບໝາຍ.

3. ບັນດາເລຂານຸການການນໍາຕ້ອງໄດ້ເອົາໃຈໃສ່ພັດທະນາຕົນເອງຢູ່ສະເໝີ, ຕ້ອງດຸໝັ່ນໃນການຄົ້ນຄວ້າຮໍ່າຮຽນເອກະສານຕ່າງໆຂອງພັກ-ລັດ ເພື່ອປະກອບຄວາມຮູ້ໃໝ່ໆໃຫ້ຕົນເອງເລື້ອຍໆ; ຄົ້ນຄວ້າ, ວິເຄາະ, ວິໄຈ, ສັງລວມ ແລະ ເກັບກໍາຂໍ້ມູນຂ່າວສານຢ່າງເປັນລະບົບ ເພື່ອຮັບໃຊ້ວຽກງານດ້ານເນື້ອໃນ ເຊິ່ງເປັນວຽກງານທີ່ຈະຕ້ອງໄດ້ຊ່ວຍການນໍາ ເພື່ອເຮັດໃຫ້ການເຄື່ອນໄຫວວຽກງານຂອງການນໍາ ມີປະສິດທິຜົນນັບມື້ສູງຂຶ້ນ; ອີກດ້ານໜຶ່ງ, ໃນອະນາຄົດຂ້າງໜ້າ ຖ້າຕົນເອງໄດ້ຮັບໜ້າທີ່ວຽກງານສູງຂຶ້ນ ກໍຈະມີບົດຮຽນດ້ານການກະກຽມເອກະສານໃນວຽກງານທີ່ຕົນຮັບ ຜິດຊອບ. ນອກຈາກການພັດທະນາວຽກງານດ້ານເອກະສານແລ້ວ, ຈໍາເປັນຕ້ອງໄດ້ພັດທະນາຄວາມຮູ້ວິຊາສະເພາະດ້ານຕ່າງໆຕື່ມອີກ ໂດຍສະເພາະວຽກງານຂົງເຂດສະພາແຫ່ງຊາດ, ດ້ານກົດໝາຍ, ພາສາຕ່າງປະເທດ ເພື່ອຮັບປະກັນການປະຕິບັດໜ້າທີ່ເລຂານຸການການນໍາ ມີຄຸນນະພາບນັບມື້ດີຂຶ້ນ.

4. ການປະສານງານ ເປັນໜ້າທີ່ສໍາຄັນອັນໜຶ່ງຂອງເລຂານຸການການນໍາ ເນື່ອງຈາກວ່າເລຂານຸການເປັນຂົວຕໍ່ ລະຫວ່າງພາກສ່ວນອື່ນກັບການນໍາ; ຖ້າມີການປະສານງານທີ່ດີ, ໂລ່ງລ່ຽນ ກໍຈະເຮັດໃຫ້ການລາຍງານ, ການມີທິດຊີ້ນໍາ, ການຈັດຕັ້ງຜັນຂະຫຍາຍທິດຊີ້ນໍາ ເຂົ້າໃນວຽກງານຕ່າງໆໄດ້ຮັບຜົນສໍາເລັດທັນເວລາ. ການປະສານງານລະຫວ່າງເລຂານຸ ການການນໍາສະພາແຫ່ງຊາດ ກັບກົງຈັກເສນາທິການຂອງສະພາແຫ່ງຊາດ, ສະພາປະຊາຊົນຂັ້ນແຂວງ ຍິ່ງມີຄວາມສໍາຄັນຫຼາຍ ແລະ ເປັນປັດໄຈຕັດສິນຜົນສໍາເລັດຂອງວຽກງານ; ນອກຈາກນັ້ນ, ຖືສໍາຄັນການປະສານງານກັບພາກສ່ວນກ່ຽວຂ້ອງຢູ່ກະຊວງ-ອົງການທຽບເທົ່າຢູ່ສູນກາງ ແລະ ທ້ອງຖິ່ນ. ສະນັ້ນ, ເລຂານຸການຈະຕ້ອງໄດ້ຍົກສູງຄຸນນະພາບໃນການປະສານງານ, ການວາງແຜນການໃນການເຄື່ອນໄຫວໃຫ້ເປັນລະບົບ ແລະ ຄົບຊຸດ ທັງແຜນວຽກ, ແຜນຄົນ, ແຜນງົບປະມານ, ແຜນສິ່ງອໍານວຍຄວາມສະດວກ ເພື່ອຮັບປະກັນການເຄື່ອນໄຫວວຽກງານຂອງສະພາແຫ່ງຊາດ ແລະ ສະ ພາປະຊາຊົນຂັ້ນແຂວງ ໄດ້ຮັບຜົນສໍາເລັດທັນເວລາ.

5. ບັນຫາຢາກໃຫ້ເອົາໃຈໃສ່ຕື່ມ ແມ່ນຫ້າມເລຂານຸການເປັນທີ່ປຶກສາ, ຫ້າມສວຍໃຊ້ອໍານາດອອກຄໍາສັ່ງຕໍ່ອົງ ການ ຖ້າບໍ່ໄດ້ຮັບການມອບສິດຈາກການນໍາ, ໜ້າທີ່ ແລະ ຕໍາແໜ່ງຂອງຕົນ ຫຼື ຜ່ານບຸກຄົນໃດໜຶ່ງກະທໍາສິ່ງບໍ່ດີ, ບໍ່ຖືກ ຕ້ອງຕາມລະບຽບ ແລະ ກົດໝາຍ, ບໍ່ແອບອ້າງບົດບາດຂອງອໍານາດຂອງຜູ້ນໍາ ເພື່ອຜົນປະໂຫຍດສ່ວນຕົວ ເຊິ່ງເປັນການສ້າງຄວາມເສື່ອມເສຍຕໍ່ອິດທິພົນຂອງການນໍາ; ຫ້າມສ້າງກຸ່ມກ້ອນພັກພວກ ແລະ ກະທໍາສິ່ງໃດໆທີ່ກໍ່ໃຫ້ເກີດຜົນກະທົບທີ່ບໍ່ດີເຖິງການປະຕິບັດໜ້າທີ່ວຽກງານ ແລະ ຄວາມສາມັກຄີພາຍໃນການຈັດຕັ້ງ. ນອກຈາກນັ້ນ, ໃຫ້ເອົາໃຈໃສ່ ການຮັກສາຄວາມລັບ ເນື່ອງຈາກເລຂານຸການການນໍາ ເປັນຜູ້ຮັບໃຊ້ວຽກງານຢ່າງໃກ້ຊິດກັບການນໍາ ບໍ່ວ່າການບໍລິການຮັບໃຊ້ ກໍຄືການຮັບ ແລະ ຈັດເກັບບັນດາເອກະສານ ຈຶ່ງເປັນຜູ້ທີ່ຮູ້ຄວາມລັບຂອງວຽກງານ ຈະເປັນຄວາມລັບຂອງຊາດ, ຂອງລັດ ແລະ ຂອງອົງການ.

(ພາບ ແລະ ຂ່າວ: ນາງ ປາກາລັກ ພົມມີໄຊ)