ມື້ນີ້ຂໍໂງໂງ້ງໂຄ້ງມາເວົ້າເລື່ອງທີ່ພົວພັນກັບເຕັກໂນໂລຊີ ຂໍ້ມູນຂ່າວສານ ລໍ້າຍຸກບຸກສະໄໝ ເຊິ່ງມີທັງດ້ານດີ ແລະ ດ້ານລົບ ຂຶ້ນກັບໃຊ້ເປັນ ຫຼື ບໍ່ເປັນ, ສອດຄ່ອງກັບປະໂຫຍກຄະຕິເຕືອນໃຈວ່າ: “ໃຊ້ເປັນຈຶ່ງເຫັນຄຸນຄ່າ ໃຊ້ບໍ່ເຂົ້າທ່າ ເປັນບ້າສາມປີ”. ສຳລັບບົດນີ້ ຂໍລົງເລິກສະເພາະແຕ່ເລື່ອງ “ການໃຊ້ບໍ່ເຂົ້າທ່າ” ວ່າຢູ່ບາງປະເທດນັ້ນເຂົາມີມາດຕະການຄວບຄຸມ, ປາບປາມ ແລະ ລົງໂທດແນວໃດ ຕໍ່ກໍລະນີທີ່ມີການນຳໃຊ້ສື່ສັງຄົມໄປໃນທາງບໍ່ດີເຊັ່ນ: ໂຄສະນາເກີນຄວາມເປັນຈິງ, ການໃສ່ຮ້າຍປ້າຍສີ ສ້າງຄວາມເສື່ອມເສຍຕໍ່ວຽກ ແລະ ສັກສີຂອງຄົນອື່ນໆ ກໍຄືການນຳໃຊ້ເຕັກໂນໂລຊີນີ້ເພື່ອລັກເຈາະເອົາຂໍ້ມູນສ່ວນຕົວຂອງຄົນອື່ນ (ເອີ້ນວ່າແຮັກຂໍ້ມູນ). ກ່ອນໜ້ານີ້ປະມານ 6 ປີຜ່ານມາຢູ່ ສປຈີນ ໄດ້ເກີດມີຂະບວນການ “ໝໍຢາວິເສດ” ທີ່ວ່າສາມາດປິ່ນປົວພະຍາດທຸກຊະນິດ. ບັນດາໝໍຢາວິເສດດັ່ງກ່າວທີ່ມາໃນຄາບຜູ້ຊ່ຽວຊານດ້ານການແພດນັ້ນ ເຄື່ອນໄຫວເພື່ອເຂົ້າເຖິງໂຮງພະຍາບານສຳຄັນຫຼາຍໆແຫ່ງ ແນໃສ່ເກັບກຳຂໍ້ມູນກ່ຽວກັບຄົນເຈັບ ແລະ ວິທີການປິ່ນປົວ ຈາກນັ້ນ, ພວກເຂົາກໍຕີສະນິດເຂົ້າກັບຄົນເຈັບ ເພື່ອຫຼອກໃຫ້ຊື້ ຢາວິເສດ ຈາກພວກເຂົາດ້ວຍລາຄາງາມໆ. ເປົ້າໝາຍຄົນເຈັບທີ່ພວກຕົ້ມຕຸ໋ນໃຫ້ຄວາມສຳຄັນກໍຄືຜູ້ເຖົ້າ ແລະ ບັນດາຄົນເຈັບຈາກພະຍາດທີ່ປົວຍາກເຊັ່ນ: ໂຣກເອດ, ວັນນະໂລກ, ເບົາຫວານ ແລະ ອື່ນໆ. ຂ່າວບອກວ່າເລີ່ມແຕ່ຕົ້ນເດືອນທັນວາ 2018. ເຈົ້າໜ້າທີ່ ໃນນະຄອນ ຈົ່ງຈິງ ໄດ້ເປີດບັ້ນກວາດລ້າງ ແລະ ສາມາດຈັບກຸມບັນດາ ໝໍຢາວິເສດ ໄດ້ທັງໝົດ 323 ຄົນ. ນອກຈາກນັ້ນ, ບັ້ນກວາດລ້າງ ຍັງໄດ້ດຳເນີນຢູ່ອີກ 30 ແຫ່ງ ໃນ 10 ແຂວງ ແລະ ນະຄອນ, ສາມາດເລີກຮື້ເຄືອຂ່າຍ ອາຊະຍາກຳຕົ້ມຕຸ໋ນ ໄດ້ 16 ກຸ່ມ ທີ່ພົວພັນກັບການຫຼອກລວງ ຂາຍຢາດີວິເສດ ກວ່າ 10.000 ກໍລະນີ ທີ່ມີຍອດເງິນໝູນວຽນຈຳນວນກວ່າ 10 ລ້ານກວ່າຢວນ (ປະມານ 1,51 ລ້ານ ໂດລາສະຫະລັດໃນເວລານັ້ນ). ທາງການຈີນຍາມໃດກໍໃຫ້ຄວາມສຳຄັນຕໍ່ການໃຫ້ ແລະ ການໃຊ້ບໍລິການ ຂອງເຄືອຂ່າຍສື່ສັງຄົມ ໂດຍໄດ້ຈັດໃຫ້ມີ “ອາທິດເພື່ອຄວາມປອດໄພທາງໄຊເບີ”  ປະຈຳແຕ່ລະປີ ໃນຮູບການສຳມະນາເຝິກອົບຮົມໃຫ້ຜູ້ເຂົ້າຮ່ວມຮູ້ກ່ຽວກັບຄວາມປອດໄພ ແລະ ຄວາມໝັ້ນຄົງທາງໄຊເບີ ເຊິ່ງກວມເອົາຄວາມໝັ້ນຄົງທາງໄຊເບີ ສຳລັບໄວໜຸ່ມ, ຄວາມກ້າວໜ້າທາງປັນຍາປະດິດ ແລະ ການປົກປ້ອງຂໍ້ມູນສ່ວນບຸກຄົນ. ບັ້ນເຝິກອົບຮົມຄວາມຮູ້ດ້ານໄອທີນີ້ ເລີ່ມຈັດຢູ່ຕົວເມືອງໃຫ່ຍໆ ແລ້ວລາມລົງໄປສູ່ຊຸມຊົນຂັ້ນທ້ອງຖິ່ນຮາກຖານ, ສະຖານທີ່ການສຶກສາ, ບ້ານ ແລະ ໂຮງຈັກໂຮງງານຕາມລຳດັບ.

ໃນຕົ້ນປີ 2023 ໄດ້ມີຂ່າວອອກມາ ຈາກອົດສະຕຣາລີ ວ່າ ທາງການຂອງປະເທດນີ້ ໄດ້ປະກາດໃຊ້ກົດໝາຍສະບັບປັບປຸງ ກ່ຽວກັບການປົກປ້ອງຂໍ້ມູນສ່ວນບຸກຄົນ ໂດຍໄດ້ເພີ່ມໂທດປັບໃໝຕໍ່ຜູ້ລະເມີດ. ໃນກົດໝາຍສະບັບເກົ່ານັ້ນ ອັດຕາການປັບໃໝສູງສຸດ ແມ່ນ 2,2 ລ້ານໂດລາ ອົດສະຕຣາລີ, ສ່ວນໃນກົດໝາຍສະບັບປັບປຸງນີ້, ການປັບໃໝ ແມ່ນອີງໃສ່ 3 ເງື່ອນໄຂແຕກຕ່າງກັນ ໂດຍໄດ້ກຳນົດເພດານດັ່ງລຸ່ມນີ້.

1. ກຳນົດອັດຕາສູງສຸດ 50 ລ້ານໂດລາ ອົດສະຕຣາລີ, 2. ປັບໃໝໃນອັດຕາ 3 ເທົ່າຕົວ ຂອງຜົນປະໂຫຍດທີ່ຜູ້ລະເມີດໄດ້ຮັບຈາກການລັກລອບໃຊ້ຂໍ້ມູນສ່ວນຕົວຂອງຄົນອື່ນ ແລະ ປັບໃໝໃນອັດຕາ 30% ຂອງເງິນໝູນວຽນທັງໝົດຂອງບໍລິສັດ ທີ່ລະເມີດ. ຂ່າວ ບອກວ່າກົດໝາຍວ່າດ້ວຍການປົກປ້ອງຂໍ້ມູນສ່ວນບຸກຄົນ ສະບັບປັບປຸງນີ້ ອອກມາໃນທ່າມກາງທີ່ມີກໍລະນີລະເມີດຂໍ້ມູນສ່ວນບຸກຄົນຫຼາຍທີ່ສຸດໃນອົດສະຕຣາລີ. ໃນປີ 2022, ເຄືອຂ່າຍໂທລະສັບມືຖື Optus ໄດ້ເສຍຂໍ້ມູນສ່ວນບຸກຄົນຂອງລູກຄ້າສູງເຖິງ 9,8 ລ້ານຄົນ ສ່ວນສູນ Medibank ທີ່ໃຫ້ບໍລິການປະກັນໄພສຸຂະພາບລູກຄ້າກໍໄດ້ເສຍຂໍ້ມູນຂອງລູກຄ້າສູງເຖິງ 9,7 ລ້ານຄົນ.