(ສພຊ) ໃນລະຫວ່າງວັນທີ 30 ຕຸລາ-4 ພະຈິກ 2023, ຄະນະຜູ້ແທນສະພາແຫ່ງຊາດລາວ ນຳໂດຍທ່ານ ອຳໄພ ຈິດມານົນ ຮອງປະທານກໍາມາທິການກົດໝາຍ ໄດ້ເຂົ້າຮ່ວມກອງປະຊຸມປຶກສາຫາລື ວ່າດ້ວຍກົດໝາຍ ຈີນ-ອາຊຽນ ຄັ້ງທີ 5 ຈັດຂຶ້ນທີ່ນະຄອນສົງຊິ້ງ, ສປຈີນ. ມີຜູ້ເຂົ້າຮ່ວມຫຼາຍກວ່າ 200 ທ່ານ ທີ່ມາຈາກປະເທດອາຊຽນ ໃນນັ້ນ, ມີຕາງໜ້າຈາກ ກະຊວງຕ່າງໆຂອງລັດຖະບານ, ສະພານິຕິບັນຍັດ ແລະ ຕຸລາການ, ມະຫາວິທະຍາໄລ, ສະພາແຫ່ງຊາດ, ທະນາຍຄວາມ, ນັກກົດໝາຍ, ບໍລິສັດທີ່ປຶກສາທາງດ້ານກົດໝາຍ, ປະຊາຄົມນັກກົດໝາຍ ແລະ ສະມາຄົມນັກກົດໝາຍຂອງຈີນ ແລະ ອາຊຽນ ເຂົ້າຮ່ວມ.

ກອງປະຊຸມຄັ້ງນີ້ ໄດ້ດໍາເນີນໄປພາຍໃຕ້ຫົວຂໍ້: “ສົ່ງເສີມການພັດທະນາ ປະຊາຄົມຈີນ-ອາຊຽນ ທີ່ມີອະນາຄົດຮ່ວມກັນ ໂດຍຜ່ານກົດໝາຍ (Promoting the development of closer China-ASEAN community with a shared future through the rule of law)”. ກອງປະຊຸມໄດ້ເນັ້ນໜັກເຖິງຄວາມສໍາຄັນໃນການຈັດຕັ້ງປະຕິບັດທີ່ມີການປ່ຽນແປງ ແລະ ການຜັນຂະຫຍາຍການຮ່ວມມືທາງດ້ານກົດໝາຍ ລະຫວ່າງ ຈີນ-ອາຊຽນ, ສົ່ງເສີມການສົນທະນາຢ່າງຮອບດ້ານ ແລະ ການປະກາດໃຊ້ຂໍ້ລິເລີ່ມ ເພື່ອສົ່ງເສີມຂອບກົດໝາຍຂອງພາກພື້ນ, ສົ່ງເສີມການພັດທະນາລະບົບກົດໝາຍ ແລະ ສ້າງຜູ້ຊ່ຽວຊານທາງດ້ານກົດໝາຍ ທີ່ມີຄວາມຊຳນານໃນລະດັບພາກພື້ນ, ເພີ່ມທະວີຂະຫຍາຍການຮ່ວມມືດ້ານການໃຫ້ບໍລິການທາງດ້ານກົດໝາຍພາຍໃນ ໃນຂອບການຮ່ວມມືຕາມຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ (BRI). ໃນກອງປະຊຸມບັນດາຜູ້ແທນ ຍັງໄດ້ມີການປຶກສາຫາລື ແລະ ແລກປ່ຽນກັນ ທາງດ້ານປະສົບການໃນການຮ່ວມມື, ການສະໜັບສະໜູນດ້ານລະບຽບກົດໝາຍຂອງ ຈີນ-ອາຊຽນ ໃນຂົງເຂດການຮ່ວມມືທາງດ້ານເສດຖະກິດ, ການລົງທຶນ ແລະ ການຄ້າສາກົນ ຕາມລະບຽບກົດໝາຍ ເພື່ອໃຫ້ປະຊາຊົນ ແລະ ບັນດາປະເທດໃນແຖບ ໜຶ່ງແລວ ໜຶ່ງເສັ້ນທາງ ໄດ້ຮັບຜົນປະໂຫຍດຮ່ວມກັນ.

ໃນກອງປະຊຸມຄັ້ງນີ້ ຫົວໜ້າຄະນະຜູ້ແທນລາວ ໄດ້ມີຄໍາເຫັນໃນກອງປະຊຸມ ເຊິ່ງໄດ້ຍົກໃຫ້ເຫັນເຖິງຂັ້ນຕອນການສ້າງ ແລະ ການຈັດຕັ້ງປະຕິບັດກົດໝາຍຂອງ ສປປລາວ ທີ່ກ່ຽວຂ້ອງກັບວຽກງານ ໜຶ່ງແລວ ໜຶ່ງເສັ້ນທາງ. ພ້ອມດຽວກັນນັ້ນ, ກໍໄດ້ຍົກໃຫ້ເຫັນເຖິງຄວາມເອົາໃຈໃສ່ໃນການສ້າງ ແລະ ຈັດຕັ້ງປະຕິບັດກົດໝາຍ ທີ່ ສະພາແຫ່ງຊາດລາວ ໄດ້ຍົກສູງບົດບາດຂອງຕົນທາງດ້ານນິຕິບັນຍັດ ໃນການຮັບຮອງເອົາກົດໝາຍ ເພື່ອເປັນເຄື່ອງມືຂອງລັດ ໃນການຄຸ້ມຄອງລັດ-ຄຸ້ມຄອງສັງຄົມ ດ້ວຍລະບຽບກົດໝາຍ ໂດຍການເອົາໃຈໃສ່ປັບປຸງ ແລະ ຮັບຮອງເອົາກົດໝາຍຕ່າງໆ ໃຫ້ມີຄວາມແທດເໝາະກັບສະພາບການຂອງປະເທດຕົນ, ສອດຄ່ອງກັບສົນທິສັນຍາ ແລະ ສັນຍາສາກົນທີ່ ສປປລາວ ເປັນພາຄີ ແລະ ໄດ້ມີການຖອດຖອນບົດຮຽນຈາກບັນດາປະເທດທີ່ພັດທະນາ ແລະ ບັນດາປະເທດອ້ອມຂ້າງ ເພື່ອສ້າງກົດໝາຍ ຂອງ ສປປລາວ ໃຫ້ມີຄວາມໃກ້ຄຽງ ແລະ ສາມາດຈັດຕັ້ງປະຕິບັດໄດ້ ຫຼື ສາມາດເຊື່ອງໂຍງກັບພາກພື້ນ ແລະ ສາກົນ, ພ້ອມທັງໄດ້ມີການຍົກສູງບົດບາດຕິດຕາມກວດກາການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ ໃຫ້ເຂັ້ມແຂງ ແລະ ມີປະສິດທິພາບ.

ກອງປະຊຸມ, ໄດ້ດໍາເນີນໄປໃນບັນຍາກາດ ທີ່ທຸກຝ່າຍເຫັນດີເປັນເອກະພາບກັນ, ສືບຕໍ່ຮ່ວມມືກັນ ໃນການຊຸກຍູ້ ສົ່ງເສີມທາງດ້ານກົດໝາຍ. ນອກນັ້ນ, ຍັງມີກອງປະຊຸມຍ່ອຍ 4 ກອງປະຊຸມ ເຊິ່ງໄດ້ມີການສົນທະນາ ແລະ ແລກປ່ຽນຄໍາເຫັນຕໍ່ກັບທາງດ້ານກົດໝາຍ ເພື່ອຕອບສະໜອງການຄ້າສາກົນແບບໃໝ່ ຕາມແລວທາງການຄ້າທາງບົກ ແລະ ທາງທະເລສາກົນໃໝ່, ນະວັດຕະກໍາ ແລະ ການປະຕິບັດລະບຽບໃນຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ, ການພັດທະນາກົນໄກການແລກປ່ຽນ ແລະ ການຮ່ວມມືໃນລະດັບພາກພື້ນ ແລະ ລະຫວ່າງ ສປຈີນ-ອາຊຽນ ໃຫ້ມີການພັດທະນາເວທີປຶກສາຫາລື ແລະ ການບໍລິການທາງດ້ານກົດໝາຍ ສ້າງໂຄງການກົນໄກການເຝິກອົບຮົມບຸກຄະລາກອນທາງດ້ານກົດໝາຍ ໃຫ້ບັນດານັກກົດໝາຍຂອງບັນດາປະເທດອາຊຽນ ຕາມຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ.

ນອກຈາກນັ້ນ, ຄະນະຜູ້ແທນລາວ ຍັງໄດ້ປະຊຸມຮ່ວມກັບ ສູນຄົ້ນຄວ້າກົດໝາຍຈີນ-ອາຊຽນ ແລະ ມະຫາວິ ທະຍາໄລລັດຖະສາດ ແລະ ນິຕິສາດ ຕາເວັນອອກສ່ຽງໃຕ້ ຂອງ ນະຄອນສົງຊີ້ງ ຈຸດປະສົງແມ່ນເພື່ອປຶກສາຫາລື ຫາວິທີຮ່ວມມືກັນ ໃນການສ້າງບຸກຄະລາກອນໃນຂົງເຂດກົດໝາຍ, ເຕັກນິກໃນການສ້າງກົດໝາຍໃຫ້ແກ່ວິຊາການຂອງ ສະພາແຫ່ງຊາດລາວ ເຊິ່ງສູນຄົ້ນຄວ້າກົດໝາຍຈີນ-ອາຊຽນ ມີຄວາມຍິນດີຈະໃຫ້ການສະໜັບສະໜູນທາງດ້ານທຶນຮອນ ແລະ ການຮ່ວມມືກັບສະພາແຫ່ງຊາດລາວ ໃນການສົ່ງບຸກຄະລາກອນທາງດ້ານກົດໝາຍ ຂອງສະພາແຫ່ງຊາດ ໄປຍົກລະດັບການສຶກສາ ໃນລະດັບປະລິນຍາໂທ, ປະລິນຍາເອກ, ການຄົ້ນຄວ້າ-ວິໄຈ ແລະ ການແລກປ່ຽນຕ່າງໆໄລຍະສັ້ນ ຢູ່ມະຫາວິທະຍາໄລ ລັດຖະສາດ ແລະ ນິຕິສາດ ຕາເວັນອອກສ່ຽງໃຕ້ ແລະ ສູນຄົ້ນຄວ້າກົດໝາຍ ຈີນ-ອາຊຽນ ທີ່ ນະຄອນສົງຊິ້ງ, ສປຈີນ.