(ສພຊ) ໃນວັນທີ 13 ມັງກອນ 2023 ກອງປະຊຸມຄົບຄະນະກຳມາທິການຍຸຕິທຳ ປະຈຳປີ 2022 ໄດ້ອັດລົງດ້ວຍຜົນສຳເລັດຢ່າງຈົບງາມ ທີ່ສະພາແຫ່ງຊາດ ນະຄອນຫຼວງວຽງຈັນ ໂດຍການເປັນປະທານຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ ໂດຍການເຂົ້າຮ່ວມຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ຜູ້ຊີ້ນຳກຳມາທິການຍຸຕິທຳ, ມີບັນດາທ່ານປະທານ-ຮອງປະທານກຳມາທິການ, ບັນດາທ່ານສະມາຊິກສະພາແຫ່ງຊາດ ທີ່ສັງກັດກຳມາທິການຍຸຕິທຳ ຈາກ 18 ເຂດເລືອກຕັ້ງທົ່ວປະເທດ ພ້ອມດ້ວຍແຂກຖືກເຊີນຈຳນວນໜຶ່ງ.

ຈຸດປະສົງຂອງກອງປະຊຸມຄັ້ງນີ້ ເພື່ອສະຫຼຸບຕີລາຄາຄືນການເຄື່ອນໄຫວວຽກງານຂອງກຳມາທິການຍຸຕິທຳ ປະຈຳປີ 2023 ແລະ ວາງທິດທາງແຜນການ ປະຈຳປີ 2023 ໂດຍສະເພາະແມ່ນວຽກງານຕິດຕາມກວດກາການຈັດ ຕັ້ງປະຕິບັດລັດຖະທຳມະນູນ ແລະ ກົດໝາຍ, ມະຕິຂອງສະພາແຫ່ງຊາດ, ວຽກງານພິຈາລະນາຄຳຮ້ອງຂໍຄວາມເປັນທຳ ພ້ອມທັງຄົ້ນຄວ້າປະກອບຄຳເຫັນຕໍ່ນິຕິກຳທີ່ພົວພັນກັບວຽກງານຂອງກຳມາທິການຍຸຕິທຳ.

ທ່ານ ຄຳແພງ ວິລະພັນ ໄດ້ມີຄຳເຫັນກ່າວເປີດກອງປະຊຸມວ່າ: ກອງປະຊຸມຄົບຄະນະ ປະຈຳປີ 2022 ຂອງກຳມາທິການຍຸຕິທຳ ຄັ້ງນີ້ ມີຄວາມໝາຍສຳຄັນເປັນຢ່າງຍິງ ທີ່ພວກເຮົາຈະໄດ້ພ້ອມກັນສະຫຼຸບ ຕີລາຄາ ການເຄື່ອນ ໄຫວປະຕິບັດພາລະບົດບາດ, ສິດ ແລະ ໜ້າທີ່ ຂອງກຳມາທິການຍຸຕິທຳ ໃນປີ 2022 ຜ່ານມາ ພ້ອມກັນນັ້ນ ຈະໄດ້ກຳນົດທິດທາງເຄື່ອນໄຫວວຽກງານ ປະຈຳປີ 2023 ເຊິ່ງເປັນແຜນວຽກສໍາຄັນໃນຕໍ່ໜ້າ, ກອງປະຊຸມຄົບຄະນະປະຈໍາປີ 2022 ຈະໄດ້ຮັບຟັງການໂອ້ລົມຂອງທ່ານ ສຈ. ປອ. ຈະເລີນ ເຍຍປາວເຮີ ແລະ ຈະໄດ້ຮັບຟັງການເຜີຍແຜ່ເນື້ອໃນຕົ້ນຕໍຂອງກົດໝາຍວ່າດ້ວຍການແກ້ໄຂຄຳຮ້ອງທຸກ ແລະ ມະຕິ ຂອງຄະນະປະຈຳສະພາແຫ່ງຊາດ ວ່າດ້ວຍການຮັບ ແລະ ພິຈາລະນາຄຳຮ້ອງຂໍຄວາມເປັນທຳ ສະບັບປັບປຸງ. ນອກຈາກນັ້ນ, ຍັງຈະໄດ້ພິຈາລະນາ ມະຕິ ຂອງກອງປະຊຸມຄົບຄະນະຂອງກຳມາທິການຍຸຕິທຳ ປະຈຳປີ 2022, ບັນດາເນື້ອໃນທີ່ນຳມາພິຈາລະນາໃນກອງປະຊຸມຄັ້ງນີ້ ເຫັນວ່າມີຄວາມໝາຍສຳຄັນ. ສະນັ້ນ, ເພື່ອເຮັດໃຫ້ບັນດາເນື້ອໃນຂອງກອງປະຊຸມໄດ້ຮັບພິຈາລະນາ, ຄົ້ນຄວ້າຢ່າງເລິກເຊິ່ງ ຂໍຮຽກຮ້ອງມາຍັງບັນດາທ່ານ ຄະນະນຳ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຜູ້ແທນກອງປະຊຸມ ຈົ່ງນໍາໃຊ້ສິດປະຊາທິປະໄຕ ແລະ ເຊີດຊູຄວາມຮັບຜິດຊອບການເມືອງຂອງຕົນ ຕໍ່ກັບບັນດາເນື້ອໃນທີ່ນຳມາພິຈາລະນາໃນກອງປະຊຸມໃນຄັ້ງນີ້ ຢ່າງກົງໄປກົງມາ ມີເຫດມີຜົນ ເພື່ອເຮັດໃຫ້ບັນດາເນື້ອໃນຕ່າງໆ ສາມາດຮັບຮອງເອົາ ແລະ ນຳໄປຈັດຕັ້ງຜັນຂະຫຍາຍ ໃນການຈັດຕັ້ງປະຕິບັດໜ້າທີ່ວຽກງານໃນຕໍ່ໜ້າ ໃຫ້ມີຜົນສຳ ເລັດຫຼາຍຂຶ້ນກວ່າເກົ່າ.

ໃນກອງປະຊຸມ, ທ່ານ ສີສູນທອນ ສ.ຜາບມີໄຊຍ໌ ຮອງປະທານກໍາມາທິການຍຸຕິທໍາ ໄດ້ຜ່ານບົດສະຫຼຸບການເຄື່ອນໄຫວວຽກງານ ປະຈຳປີ 2022 ແລະ ທິດທາງປະຈຳປີ 2023 ຂອງກຳມາທິການຍຸຕິທຳ. ຈາກນັ້ນ, ບັນດາທ່ານສະມາຊິກສະພາແຫ່ງຊາດ ໄດ້ປະກອບຄຳຄິດຄຳເຫັນໃສ່ເນື້ອໃນບົດສະຫຼຸບດັ່ງກ່າວ ແລະ ໄດ້ຮັບຟັງການເຜີຍແຜ່ກົດໝາຍວ່າດ້ວຍການແກ້ໄຂຄຳຮ້ອງທຸກ (ສະບັບປັບປຸງ ປີ 2022); ເຜີຍແຜ່ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຮັບ ແລະ ພິຈາລະນາຄຳຮ້ອງຂໍຄວາມເປັນທຳ.

ໃນກອງປະຊຸມ, ໄດ້ຮັບຟັງການຜ່ານບົດສະຫລຸບການເຄື່ອນໄຫວວຽກງານ ປະຈຳປີ 2022 ແລະທິດທາງປະຈຳປີ 2023 ຂອງກຳມາທິການຍຸຕິທຳ; ຈາກນັ້ນ, ບັນດາທ່ານ ສສຊ ກໍໄດ້ຜັນປ່ຽນກັນປະກອບຄຳຄິດຄຳເຫັນຕໍ່ບົດດັ່ງກ່າວຢ່າງກົງໄປກົງມາ.

ໂອກາດດັ່ງກ່າວ, ທ່ານ ສຈ. ປອ. ຈະເລີນ ເຍຍປາວເຮີ ໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງມີເນື້ອໃນສຳຄັນວ່າ: ໃນໜຶ່ງປີຜ່ານມາ ກໍາມາທິການຍຸຕິທໍາ ໄດ້ມີຄວາມບາກບັ່ນບຸກບືນປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ເຊິ່ງສາມາດຍາດໄດ້ຜົນງານ ແລະ ຜົນສໍາເລັດຫຼາຍປະການ ເປັນຕົ້ນ: ໄດ້ສໍາເລັດການປັບປຸງກົດໝາຍວ່າດ້ວຍການແກ້ໄຂຄໍາຮ້ອງທຸກ, ສໍາເລັດການສ້າງ ແລະ ປັບປຸງ ນິຕິກໍາຈໍານວນໜຶ່ງທີ່ພົວພັນກັບການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ ຂອງຄະນະປະຈໍາສະພາແຫ່ງຊາດ; ສໍາເລັດການປັບປຸງກົງຈັກການຈັດຕັ້ງ, ປັບປຸງກົນໄກແບບແຜນວິທີເຮັດວຽກ ແລະ ຈັດວາງພະນັກງານເຂົ້າໃສ່ແຕ່ລະຕໍາແໜ່ງງານ; ເປັນເຈົ້າການຄົ້ນຄວ້າໜັງສືສະເໜີ ຂອງສານປະຊາຊົນສູງສຸດ ກ່ຽວກັບກັນແຕ່ງຕັ້ງ,​ ຍົກຍ້າຍ ແລະ ຮັບອຸດໜູນບໍານານ ຂອງຜູ້ພິພາກສາ ໃຫ້ມີຄວາມວ່ອງໄວຂຶ້ນ. ແຕ່ຄຽງຄູ່ກັນນັ້ນ ສະເໜີໃຫ້ກຳມາທິການ ກໍຄືຜູ້ເຂົ້າຮ່ວມກອງປະຊຸມຄັ້ງນີ້ ເອົາໃຈໃສ່ນໍາພາ-ຊີ້ນໍາ ການຈັດຕັ້ງຜັນຂະຫຍາຍແຜນວຽກປີ 2023 ຂອງສະພາແຫ່ງຊາດ ໃຫ້ເປັນແຜນງານການໂຄງການອັນລະອຽດປະຈໍາ 6 ເດືອນ ແລະ ປະຈໍາເດືອນຂອງກໍາມາທິການ ແນໃສ່ເຮັດໃຫ້ບັນດາແຜນວຽກທີ່ໄດ້ກໍານົດໄວ້ ໄດ້ຮັບການຈັດຕັ້ງປະຕິບັດມີຜົນສໍາເລັດ; ເອົາໃຈໃສ່ວຽກງານປະສານສົມທົບກັບບັນດາກໍາມະການສັງກັດກໍາມາທິການຍຸຕິທໍາ ປະຈໍາຢູ່ແຕ່ລະເຂດເລືອກຕັ້ງ ໃຫ້ແໜ້ນແຟ້ນກວ່າເກົ່າ ເພື່ອເຮັດໃຫ້ວຽກງານຂອງກໍາມາທິການໄດ້ຮັບການຈັດຕັ້ງຜັນຂະຫຍາຍລົງສູ່ທ້ອງຖິ່ນຮາກຖານ, ພ້ອມທັງຮັບປະກັນການເກັບກໍາສະພາບ ກໍຄືການສະໜອງຂໍ້ມູນ-ຂ່າວສານໃຫ້ແກ່ຄະນະປະຈໍາສະພາແຫ່ງຊາດ ທັນເວລາ ແລະ ມີຄຸນນະພາບດີຂຶ້ນເປັນກ້າວໆ; ສູ້ຊົນຄົ້ນຄວ້າຄໍາຮ້ອງຂໍຄວາມເປັນທໍາ ໃຫ້ໄວຂຶ້ນ ແລະ ຖືກຕ້ອງຕາມການກໍານົດຂອງກົດໝາຍວ່າດ້ວຍການແກ້ໄຂຄໍາຮ້ອງທຸກ ແລະ ມະຕິ ຂອງຄະນະປະຈໍາສະພາແຫ່ງຊາດ ກ່ຽວກັບການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາຂອງປະຊາຊົນ, ສູ້ຊົນຄົ້ນຄວ້າຄໍາຮ້ອງທຸກ ໃຫ້ບັນລຸ 85% ຂອງຄໍາຮ້ອງຂໍຄວາມເປັນທໍາ ທີ່ເຂົ້າມາໃນປີ 2023 ແລະ ຕິດຕາມຊຸກຍູ້ພາກສ່ວນກ່ຽວຂ້ອງ ແກ້ໄຂຄໍາຮ້ອງ ໃຫ້ມີຄວາມໂປ່ງໃສ, ທັນກໍານົດເວລາ ແລະ ຍຸຕິທໍາ ຕາມກົດໝາຍ ເພື່ອຫຼີກລ່ຽງຫາງສຽງຈົ່ມວ່າ ຂອງປະຊາຊົນ ໃຫ້ນັບມື້ຫຼຸດລົງ; ສະເໜີໃຫ້ກໍາມາທິການ ແລະ ກໍາມະການສັງກັດກໍາມາທິການ ປະຈໍາຢູ່ແຕ່ລະເຂດເລືອກຕັ້ງ ສືບຕໍ່ເປັນເຈົ້າການຕິດຕາມກວດກາການປະເມີນການຈັດຕັ້ງປະຕິບັດ 4 ກົດໝາຍ ໃນຂົງເຂດຍຸຕິທໍາ (ກົດໝາຍວ່າດ້ວຍສານປະຊາຊົນ, ກົດໝາຍວ່າດ້ວຍອົງການໄອຍະການປະຊາຊົນ, ກົດໝາຍວ່າດ້ວຍການດໍາເນີນຄະດີແພ່ງ ແລະ ກົດໝາຍວ່າດ້ວຍການດໍາເນີນຄະດີອາຍາ) ແລະ ການປະເມີນກົດໝາຍ ຢູ່ໃນຂົງເຂດ ປກຊ-ປກສ ຢູ່ແຕ່ລະເຂດເລືອກຕັ້ງ ເພື່ອຊອກໃຫ້ເຫັນຈຸດອ່ອນ, ຊ່ອງຫວ່າງຂອງກົດໝາຍ ແລະ ດ້ານດີ, ດ້ານອ່ອນ ໃນການຈັດຕັ້ງປະຕິບັດກົດໝາຍດັ່ງກ່າວ ພ້ອມທັງຄົ້ນຄວ້າ ມາດຕະການ ແລະ ວິທີການແກ້ໄຂ ເພື່ອເປັນທິດທາງໃນການປັບປຸງບັນດາກົດໝາຍໃນຕໍ່ໜ້າ ໃຫ້ມີເນື້ອໃນສອດຄ່ອງ, ຄົບຖ້ວນ ແລະ ຮັດກຸມ ເປັນບ່ອນອີງໃຫ້ແກ່ການປະຕິບັດວຽກງານ ຂອງອົງການກ່ຽວຂ້ອງມີຄຸນນະພາບ.

(ພາບ ແລະ ຂ່າວ: ກົງທະນູຄຳ ພິພັດເສລີ)