ກອງ​ປະຊຸມ​ສະໄໝ​ສາມັນ​ເທື່ອ​ທີ 9 ຂອງ​ສະພາ​ແຫ່ງ​ຊາດ ​ຊຸດ​ທີ VIII ຈະ​ດຳເນີນ​ແຕ່​ວັນ​ທີ 24 ມິຖຸນາ ຫາ 2 ກໍລະກົດ ຊຶ່ງ​ຈະ​ໄດ້​ພິຈາລະນາ​ຫຼາຍ​ບັນຫາ​ສຳຄັນ​ຂອງ​ຊາດ ເປັນຕົ້ນ​ແມ່ນ​ບົດ​ລາຍ​ງານ ການຈັດຕັ້ງ​ປະຕິບັດ​ແຜນ​ພັດທະນາ​ເສດ​ຖະ​ກິດ​-​ສັງຄົມ, ແຜນ​ງົບປະມານແຫ່ງ​ລັດ, ແຜນ​ເງິນຕາ 5 ເດືອນ​ຕົ້ນ​ປີ, ຄາດ​ຄະເນ 6 ເດືອນ​ຕົ້ນ​ປີ 2020 ແລະ ທິດ​ທາງ​ວຽກ​ງານ​ຈຸດສຸມ 6 ເດືອນ​ທ້າຍ​ປີ 2020;

ນອກຈາກ​ນີ້ ຍັງ​ພິຈາລະນາ ແລະ ຮັບຮອງ​ເອົາ​ການ​ປັບປຸງ​ກົດໝາຍ​ຈຳນວນ 5 ສະ​ບັບ.ທ່ານ ນາງ ສວນ​ສະຫວັນ ວິ​ຍະ​ເກດ ຄະນະ​ປະ​ຈໍາ​ສະພາ​ແຫ່ງ​ຊາດ ເລຂາທິການ​ສະພາ​ແຫ່ງ​ຊາດ​ ໄດ້​ຖະແຫຼງ​ຂ່າວ​ຕໍ່​ສື່​ມວນ​ຊົນ​ເມື່ອ​ວັນ​ທີ 17 ມິຖຸນາ​ນີ້​ໃຫ້​ຮູ້​ວ່າ: ກອງ​ປະຊຸມ​ສະໄໝ​ສາມັນ ເທື່ອ​ທີ 9 ຂອງ​ສະພາ​ແຫ່ງ​ຊາດ ຊຸດ​ທີ VIII ຈະ​ໄດ້​ເປີດ​ຂຶ້ນ ໃນວັນ​ທີ 24 ມິຖຸນາ ແລະ ຈະ​ດໍາ​ເນີນ​ໄປ​ເຖິງ​ວັນ​ທີ 2 ກໍລະກົດ 2020 ທີ່​ຫ້ອງ​ປະຊຸມ​ສະພາ​ແຫ່ງ​ຊາດ (ຫຼັກ 6) ນະຄອນຫຼວງ​ວຽງ​ຈັນ ຊຶ່ງ​ຈະ​ໃຊ້​ເວ​ລາ​ດໍາ​ເນີນ ກອງ​ປະຊຸມ​ທັງ​ໝົດ 7 ວັນ (ບໍ່​ລວມ​ວັນພັກລັດຖະການ).  ກອງ​ປະຊຸມ​ຄັ້ງ​ນີ້ ຈະ​ໄດ້​ຮັບ​ຟັງການ​ລາຍ​ງານ, ພິຈາລະນາ ແລະ ຕົກລົງ​ບັນຫາ​ສຳຄັນ​ຕ່າງໆ ດັ່ງນີ້:ບົດ​ລາຍ​ງານ ການຈັດຕັ້ງ​ ປະຕິບັດ​ແຜນ​ພັດທະນາ​ເສດ​ຖະ​ກິດ​-​ສັງຄົມ, ແຜນ​ງົບປະມານແຫ່ງ​ລັດ, ແຜນ​ເງິນຕາ 5 ເດືອນ​ຕົ້ນ​ປີ, ຄາດ​ຄະເນ 6 ເດືອນ​ຕົ້ນ​ປີ 2020 ແລະ ທິດ​ທາງ​ວຽກ​ງານ​ຈຸດສຸມ 6 ເດືອນ​ທ້າຍ​ປີ 2020; ການ​ຊີ້​ແຈງ​ຈາກ​ພາກສ່ວນ​ກ່ຽວຂ້ອງ​ຂອງ​ລັດຖະບານ ຕໍ່​ຄໍາ​ຊັກ​ຖາມ​ຂອງ​ກອງ​ປະຊຸມ​ສະພາແຫ່ງ​ຊາດ​ຈໍາ​ນວນ​ໜຶ່ງ; ພິຈາລະນາ, ຮັບຮອງ​ເອົາ​ການ​ແຕ່ງຕັ້ງ ບຸກ​ຄະລາ​ກອນ​ພາຍ​ໃນ​ສະພາ​ແຫ່ງ​ຊາດ; ບົດ​ລາຍ​ງານ ການຈັດຕັ້ງ​ປະຕິບັດ​ແຜນການເຄື່ອນໄຫວ​ວຽກ​ງານ 6 ເດືອນ​ຕົ້ນ​ປີ ແລະ ແຜນການ 6 ເດືອນ​ທ້າຍ​ປີ 2020 ຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ; ບົດ​ລາຍ​ງານຜົນ​ການ​ຕິດຕາມ​ກວດກາ​ຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ ກ່ຽວ​ກັບ​ການຄຸ້ມ​ຄອງ​ການ​ສໍາ​ຫຼວດ ແລະ​ການ​ຂຸດ​ຄົ້ນ​ແຮ່​ທາດ, ຫີນ​ແຮ່ ແລະ​ຫີນ​ຜາ.
ນອກຈາກ​ນີ້ ຍັງ​ຈະ​ໄດ້​ພິຈາລະນາ ແລະ ຮັບຮອງ​ເອົາ​ການ​ປັບປຸງ​ກົດໝາຍ ຈໍາ​ນວນ 5 ສະບັບ ຄື:
1. ຮ່າງ​ກົດໝາຍ​ວ່າ​ດ້ວຍ ສະພາ​ແຫ່ງ​ຊາດ;
2. ຮ່າງ​ກົດໝາຍ​ວ່າ​ດ້ວຍ ສະພາ​ປະຊາຊົນ​ຂັ້ນ​ແຂວງ;
3.ຮ່າງ​ກົດໝາຍ​ວ່າ​ດ້ວຍ ການ​ເລືອກ​ຕັ້ງ​ສະມາຊິກ​ສະພາ​ແຫ່ງ​ຊາດ ແລະ ສະພາ​ປະຊາຊົນ​ຂັ້ນແຂວງ;
4. ຮ່າງ​ກົດໝາຍ​ວ່າ​ດ້ວຍ ພາສີ;
5. ຮ່າງ​ກົດໝາຍ​ວ່າ​ດ້ວຍ ການ​ປັບປຸງ​ບາງ​ມາດຕາ​ຂອງ​ກົດໝາຍ​ວ່າ​ດ້ວຍ ການ​ປົກ​ປັກ​ຮັກສາ ສິ່ງແວດລ້ອມ ແລະ ກົດໝາຍ​ວ່າ​ດ້ວຍ​ນໍ້າ ແລະ ຊັບ​ພະຍາ​ກອນ​ນໍ້າ.
ໃນ​ໄລຍະ​ດຳເນີນ​ກອງ​ປະຊຸມ, ຄະນະ​ເລຂາທິການ​ສະພາ​ແຫ່ງ​ຊາດ ໄດ້​ຈັດ​ຕັ້ງ​ໜ່ວຍ​ງານ​ຮັບຜິດຊອບ​ໂທລະ ສັບ​ສາຍ​ດ່ວນ ເພື່ອ​ຮັບ​ເອົາ​ຄຳ​ຄິດ​ຄຳ​ເຫັນ ແລະ ຄຳ​ສະເໜີ​ໂດຍ​ກົງ​ຈາກ​ປະຊາຊົນ ຊຶ່ງ​ສາມາດ​ສົ່ງ​ຄຳ​ຄິດ​ຄຳ​ເຫັນ ແລະ​ຄຳ​ສະເໜີ​ໄປ​ຍັງ​ກອງ​ປະຊຸມ ໄດ້​ຕາມ​ວິທີ​ລຸ່ມ​ນີ້:
ໂທລະສັບ​ບໍ່​ເສຍ​ຄ່າ ໝາຍ​ເລກ: 156.
ໂທລະ​ສານ ໝາຍ​ເລກ: 021 413528.
ສົ່ງ​ເປັນ​ຈົດໝາຍ​ທາງ​ໄປສະນີ ຕູ້ ປນ. 662.