(ສພຊ) ໃນວັນທີ 10 ມີນາ 2020 ສະພາແຫ່ງຊາດ ໄດ້ຈັດກອງປະຊຸມສະຫລຸບການຈັດຕັ້ງປະຕິບັດ ວຽກງານຈັດຕັ້ງ-ພະນັກງານ, ວຽກງານກວດກາ ປະຈຳປີ 2019 ແລະ ທິດທາງແຜນການເຄື່ອນໄຫວ ປີ 2020 ແລະ ເຜີຍແຜ່ຜົນສຳເລັດ ກອງປະຊຸມວຽກງານຈັດຕັ້ງ ແລະ ວຽກງານກວດກາທົ່ວປະເທດ ປະຈຳປີ 2019, ໂດຍການເປັນປະທານຂອງ ທ່ານ ແສງນວນ ໄຊຍະລາດ ຮອງປະທານ ສພຊ, ມີກຳມະການສູນກາງພັກ, ຮອງເລຂາຄະນະບໍລິຫານງານພັກ, ກຳມະການຄະ ນະພັກ, ເລຂາຄະນະພັກຮາກຖານ, ສະມາຊິກພັກສົມບູນ-ສຳຮອງພາຍໃນ ສພຊ ເຂົ້າຮ່ວມ.

ກອງປະຊຸມໄດ້ຮັບຟັງ ການຜ່ານຮ່າງບົດສະຫລຸບຕີ ລາຄາການຈັດຕັ້ງປະຕິບັດ ວຽກງານຈັດຕັ້ງ-ພະນັກງານພາຍໃນ ສພຊ ປະຈຳປີ 2019 ແລະ ທິດທາງແຜນການເຄື່ອນໄຫວ ປີ 2020, ເຜີຍ ແຜ່ຜົນສຳເລັດ ກອງປະຊຸມວຽກງານຈັດຕັ້ງ, ກໍ່ສ້າງພັກ-ພະນັກງານທົ່ວປະເທດ ປະຈຳ ປີ 2019, ຜ່ານບົດສະຫລຸບ ການເຄື່ອນໄຫວ ວຽກງານຂອງຄະນະກວດກາພັກ ສພຊ ປະຈຳປີ 2019 ແລະ ທິດທາງແຜນການປະຈຳປີ 2020, ເຜີຍແຜ່ຜົນສຳເລັດກອງປະຊຸມ ວຽກງານກວດກາ ທົ່ວປະເທດ ປະຈຳປີ 2019 (ບົດໂອ້ລົມປະທານກວດກາສູນກາງພັກ ແລະ ບົດສະຫລຸບຫຍໍ້ ວຽກງານກວດກາພັກ).

ໂອກາດດັ່ງກ່າວ, ທ່ານ ແສງນວນ ໄຊຍະລາດ ໄດ້ມີຄຳເຫັນໂອ້ລົມ  ໂດຍມີບາງຕອນສຳຄັນວ່າ: ວຽກງານຈັດຕັ້ງ ແລະ ວຽກງານກວດກາ ແມ່ນວຽກງານທີ່ສຳຄັນ ເຊິ່ງແມ່ນຄວາມຮັບຜິດຊອບ ໂດຍກົງຂອງຄະນະພັກ ສພຊ, ສະນັ້ນ ຄະນະພັກໄດ້ເອົາໃຈໃສ່ຊີ້ນຳ-ນຳພາ ແລະ ຊຸກຍູ້ພາກສ່ວນທີ່ຮັບ ຜິດຊອບວຽກງານຈັດຕັ້ງ ແລະ ວຽກງານກວດກາພັກ-ລັດ ຂອງ ສພຊ ເອົາໃຈໃສ່ປະຕິບັດໜ້າທີ່ວຽກງານ ຂອງຕົນຢ່າງມີຜົນສຳເລັດ ໃນຫລາຍດ້ານດ້ວຍຄຸນນະພາບດີຂຶ້ນ. ອັນພົ້ນເດັ່ນໃນວຽກງານ ຈັດຕັ້ງ ໄລຍະຜ່ານມາ ໄດ້ເອົາໃຈໃສ່ຄົ້ນຄວ້າປັບປຸງ ກົງຈັກການຈັດຕັ້ງຂັ້ນຕ່າງໆ ພາຍໃນ ສພຊ ໃຫ້ສອດຄ່ອງກັບທີ່ຕັ້ງ ແລະ ສະພາບຈຸດພິເສດຕົວຈິງ ຕາມພາລະບົດ ບາດຂອງ ສພຊ, ຂຶ້ນແຜນກໍານົດສ້າງພະນັກງານ ນຳພາ-ຄຸ້ມຄອງໃນສະເພາະໜ້າ ແລະ ຍາວນານ, ດຳເນີນການປະເມີນການປະຕິບັດໜ້າທີ່ ວຽກງານຂອງ ພະນັກງານປະຈຳປີ ຢ່າງເປັນປົກກະຕິ. ວຽກງານກວດກາ ເຖິງວ່າເປັນກົງຈັກສ້າງຂຶ້ນໃໝ່ໃນ ສພຊ ຊຸດທີ VIII, ບຸກຄະລາກອນຍັງບໍ່ທັນ ເປັນລະບົບຄົບຊຸດ ແຕ່ພາຍໃຕ້ ການຊີ້ນຳ-ນຳ ພາຂອງຄະນະພັກ, ຄະນະປະຈຳສະພາແຫ່ງຊາດ, ຄະນະກວດກາພັກ-ລັດ ກໍໄດ້ສູ້ຊົນຈັດຕັ້ງປະຕິບັດວຽກງານ ຕາມທີ່ໄດ້ກຳນົດໄວ້ໃນກົດໝາຍ, ລະບຽບການ ແລະ ມີຜົນສຳເລັດຈຳນວນໜຶ່ງ ເປັນຕົ້ນຕິດຕາມກວດກາປົກກະຕິ ຕໍ່ກັບລະບອບແບບແຜນ ການເຄື່ອນໄຫວຂອງບັນດາຮາກຖານພັກ-ລັດພາຍໃນ ສພຊ, ຕິດຕາມກວດກາ ໂຄງການລົງທຶນຂອງລັດ ທີ່ຂຶ້ນກັບ ສພຊ ຄຸ້ມຄອງ, ຕິດຕາມກວດກາສະເພາະກິດ ຕໍ່ປາກົດການຫຍໍ້ທໍ້ທີ່ເກີດຂຶ້ນ, ການປັບປຸງກົງຈັກການ ຈັດຕັ້ງຂອງ ວຽກງານກວດກາ, ການບຳລຸງ ສ້າງພະນັກງານກວດກາ ດ້ວຍການຝຶກອົບຮົມຄວາມຮູ້ພື້ນຖານ ກ່ຽວກັບວຽກງານກວດກາ, ການຮັບຄຳສະເໜີ ຂອງປະຊາຊົນ ຜ່ານສາຍດ່ວນຂອງ ສພຊ ແລະ ບັນຫາອື່ນໆ.