ສະເໜີໂດຍ: ທ່ານ ປອ. ບຸນປອນ ບຸດຕະນະວົງ
ຮອງປະທານຄະນະປະຈໍາສະພາແຫ່ງຊາດ

ຮຽນ: ເລຂາທິການໃຫ່ຍ ປະທານປະເທດແຫ່ງ ສປປ ລາວ ທີ່ເຄົາລົບ
ແລະ ນັບຖືຢ່າງສູງ;
–  ທ່ານ ປະທານສະພາແຫ່ງຊາດ, ປະທານກອງປະຊຸມ ທີ່ເຄົາລົບ
ແລະ ນັບຖືຢ່າງສູງ;
–  ທ່ານ ນາຍົກລັດຖະມົນຕີ ທີ່ເຄົາລົບ ແລະ ນັບຖືຢ່າງສູງ;
–  ບັນດາທ່ານ ຜູ້ນຳພັກ-ລັດ ທີ່ເຄົາລົບ ແລະ ນັບຖືຢ່າງສູງ;
–  ບັນດາທ່ານ ຄະນະປະທານ, ສະມາຊິກສະພາແຫ່ງຊາດ;
–  ບັນດາທ່ານ ສະມາຊິກລັດຖະບານ, ແຂກຜູ້ມີກຽດ ທີ່ນັບຖື ແລະ
ຮັກແພງ.

ຂ້າພະເຈົ້າ ຮູ້ສຶກເປັນກຽດຢ່າງສູງ ທີ່ໄດ້ຮັບອະນຸຍາດຈາກ ທ່ານປະທານກອງປະຊຸມ ຕາງໜ້າໃຫ້ຄະນະປະຈໍາສະພາແຫ່ງຊາດ ຂຶ້ນປະກອບຄຳເຫັນຕໍ່ບົດລາຍງານ ຂອງທ່ານນາຍົກລັດຖະມົນຕີ ກ່ຽວກັບ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ 4 ເດືອນຕົ້ນປີ ຄາດຄະເນ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2019 ຕໍ່ກອງສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ໃນມື້ນີ້.
ຄະນະປະຈຳສະພາແຫ່ງຊາດ ຂໍສະແດງຄວາມຍ້ອງຍໍຊົມເຊີຍ ຕໍ່ລັດຖະບານ ທີ່ໄດ້ມີຄວາມພະຍາຍາມສູ້ຊົນຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ໃນໄລຍະຜ່ານມາດ້ວຍຄວາມຕັ້ງໜ້າ ແລະ ມີຄວາມຮັບຜິດຊອບສູງ; ເຖິງວ່າ ສະພາບການຂອງໂລກ ແລະ ພາກພື້ນໄດ້ມີການຜັນແປຢ່າງສະລັບຊັບຊ້ອນ ແລະ ມີຜົນກະທົບບໍ່ໜ້ອຍຕໍ່ປະເທດເຮົາ. ແຕ່ພາຍໃຕ້ການນໍາພາຂອງພັກ ແລະ ການຄຸ້ມຄອງບໍລິຫານຂອງລັດຖະບານ ປະເທດເຮົາ ຍັງສືບຕໍ່ຮັກສາໄດ້ ຄວາມມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ການບໍລິຫານລັດຕາມກົດໝາຍ ໄດ້ຮັບການປັບປຸງ, ເສດຖະກິດສືບຕໍ່ພັດທະນາດ້ວຍຈັງຫວະທີ່ຕັ້ງໜ້າພໍສົມຄວນ, ຊີວິດການເປັນຢູ່ຂອງ ປະຊາຊົນບັນດາເຜົ່ານັບມື້ນັບດີຂຶ້ນ.

ຮຽນ: ທ່ານ ປະທານ ບັນດາທ່ານທີ່ນັບຖື ແລະ ຮັກແພງ
ຜ່ານການຕິດຕາມກວດກາຕົວຈິງຂອງ ຄະນະປະຈໍາສະພາແຫ່ງຊາດ ແລະ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ຕາມມະຕິ 099/ສພຊ ແລະ ມະຕິ 100/ສພຊ, ລົງວັນທີ 28/11/2018 ຄະນະປະຈໍາສະພາແຫ່ງຊາດ ເຫັນວ່າຄຽງຄູ່ກັບຜົນສໍາເລັດໃນຫຼາຍດ້ານ ທີ່ຍາດໄດ້ນັ້ນ ກໍ່ຍັງມີບາງຄາດໝາຍຍັງມີຄວາມສ່ຽງທີ່ຈະບໍ່ສາມາດບັນລຸໄດ້ຕາມແຜນການ ດັ່ງນີ້:

I.    ຕໍ່ແຜນພັດທະນາເສດຖະກິດ-ສັງຄົມ:
1.    ການຂະຫຍາຍຕົວຂອງເສດຖະກິດ ຍັງມີລັກສະນະບອບບາງ, ການຜະລິດ ແລະ ການລົງທຶນ ກໍ່ສ້າງພື້ນຖານໂຄງລ່າງຂະຫນາດໃຫຍ່ບໍ່ໄປຕາມແຜນການ ຊຶ່ງສົ່ງຜົນກະທົບຕໍ່ລວມຍອດຜະລິດຕະພັນພາຍໃນ (GDP) ຈະບໍ່ໄດ້ຕາມແຜນ (ແຜນການ 6,7 %);
2.    ການແຈ້ງແຜນງົບປະມານການລົງທຶນຂອງລັດ ເຫັນວ່າຍັງຊັກຊ້າ ເຮັດໃຫ້ການຈັດຕັ້ງປະຕິບັດວຽກງານອັນຮີບດ່ວນຂອງລັດຖະບານ ໃນງວດ 1 ບໍ່ສາມາດຈັດຕັ້ງປະຕິບັດຕາມແຜນທີ່ກໍານົດໄວ້;
3.    ການປັບປຸງສະພາບແວດລ້ອມ ແລະ ການອຳນວຍຄວາມສະດວກໃນການດຳເນີນທຸລະກິດ ຕາມຄຳສັ່ງຂອງນາຍົກລັດ ຖະມົນຕີ ເລກທີ 02/ນຍ ຍັງເຮັດບໍ່ທັນໄດ້ຢ່າງຕັ້ງໜ້າ;
4.    ການຊຸກຍູ້ສົ່ງເສີມການຜະລິດສິນຄ້າກະສິກຳ, ການສົ່ງເສີມທຸລະກິດຂະໜາດນ້ອຍ ແລະ ຂະໜາດກາງ ລວມທັງການຄຸ້ມຄອງໂຮງຈັກໂຮງງານຕ່າງໆ, ແລະ ການຄຸ້ມຄອງສິນຄ້າ-ລາຄາ ຍັງບໍ່ທັນໄປຕາມ ມະຕິຂອງສະພາແຫ່ງຊາດຮັບຮອງ;
5.    ການນຳໃຊ້ທຶນເພື່ຶອການຄົ້ນຄວ້າວິທະຍາສາດ ຍັງບໍ່ຖືກຕ້ອງຕາມເປົ້າໝາຍ ແລະ ບໍ່ໄດ້ຮັບການຈັດຕັ້ງປະຕິບັດໃຫ້ເປັນຮູບປະທຳ ຕາມມະຕິຂອງສະພາແຫ່ງຊາດ;
6.    ການປະຕິບັດການຊົດເຊີຍ, ທົດແທນຄ່າເສຍຫາຍ ໃຫ້ແກ່ປະຊາຊົນທີ່ຖືກຜົນກະທົບຈາກໂຄງການພັດທະນາຕ່າງໆ ທີ່ກໍ່ສ້າງສໍາເລັດແລ້ວ ແລະ ກໍາລັງກໍ່ສ້າງ ເປັນຕົ້ນ ໂຄງການກໍ່ສ້າງສະໜາມບິນຫຼວງພະບາງພາກຂະຫຍາຍ, ກໍ່ສ້າງເຂື່ອນໄຟຟ້າ, ກໍ່ສ້າງເສັ້ນທາງລົດໄຟ ລາວ-ຈີນ ແລະ ອື່ນໆ ມາຮອດປັດຈຸບັນ ຍັງມີຄວາມຊັກຊ້າ;
7.    ວຽກງານສຶກສາ ແລະ ກິລາ ຕາມ 9 ຄາດໝາຍ ທີ່ສະພາແຫ່ງຊາດຮັບຮອງ ເຫັນວ່າ ລັດຖະບານ ບໍ່ສາມາດຈັດຕັ້ງປະຕິບັດໄດ້ ຍິ່ງໄປກວ່ານັ້ນຍັງມີ 4 ຄາດໝາຍ ໃນ 15 ຄາດໝາຍລວມ ທີ່ເຄີຍປະຕິບັດໄດ້ຊໍ້າພັດ ບໍ່ບັນລຸຕື່ມ ເປັນຕົ້ນ ອັດຕາການປະລະການຮຽນ, ອັດຕາຄ້າງຫ້ອງຂອງນັກຮຽນໃນທຸກຊັ້ນຮຽນ;
8.    ວຽກງານສາທາລະນະສຸກ: ເຖິງວ່າມີຄວາມຄືບໜ້າຫຼາຍຄາດໝາຍກໍຕາມ ແຕ່ເຫັນວ່າ ຍັງມີຄວາມສ່ຽງ  ໂດຍສະເພາະ ອັດຕາການເກີດລຸກມີແພດຊ່ວຍ, ອັດຕາການຂາດສານອາຫານ ຂອງເດັກລຸ່ມ 5 ປີ, ອັດຕາການຊົມໃຊ້ວິດຖ່າຍ, ອັດຕາການຊົມໃຊ້ນ້ຳສະອາດ ຊຶ່ງສາເຫດຕົ້ນຕໍ ຍ້ອນໄດ້ຮັບຜົນກະທົບຈາກໄພພິບັດໃນປີຜ່ານມາ, ຕື່ມໃສ່ງົບປະມານຍັງບໍ່ທັນພຽງພໍ, ປະຊາຊົນຈຳນວນໜຶ່ງ ຍັງມີຄວາມເຊື່ອຖື ງົມງວຍ, ໂຄງລ່າງພື້ນຖານດ້ານຄົມມະນາຄົມ ບາງເຂດ ຍັງມີຄວາມຫຍຸ້ງຍາກ;
9.    ວຽກງານແຮງງານ ແລະ ສະຫວັດດີການສັງຄົມ ໃນ 4 ເດືອນຜ່ານມາເຫັນວ່າ ບໍ່ທັນໄດ້ອະນຸມັດງົບປະມານເພື່ອປະຕິບັດນະໂຍບາຍ ຕໍ່ຜູ້ມີຜົນງານຄຸນງາມຄວາມດີ ຕໍ່ການປະຕິວັດຊາດປະຊາທິປະໄຕ ຕາມມະຕິວາງອອກ; ການປະຕິບັດລາຍຮັບ-ລາຍຈ່າຍຂອງກອງທຶນປະກັນສັງຄົມພາກລັດ ຍັງມີຄວາມຊັກຊ້າແກ່ຍາວ; ກົນໄກການນໍາໃຊ້ງົບປະມານຊ່ວຍເຫຼືອຂອງສາກົນ ຕໍ່ວຽກງານການເກັບກູ້ລະເບີດ ຍັງມີຫຼາຍຂັ້ນຕອນ, ບໍ່ຕອບສະໜອງທັນກັບເວລາ ແລະ ຄວາມຕ້ອງການຂອງວຽກງານ;
10.    ວຽກງານຖະແຫຼງຂ່າວ, ວັດທະນະທຳ ແລະ ການທ່ອງທ່ຽວ ເຫັນວ່າການຫັນຈາກລະບົບອານາລ໋ອກ ມາເປັນລະບົບດີຈີຕອນທີ່ທັນສະໄໝຍັງຊັກຊ້າ, ການສ້າງຄອບຄົວວັດທະນະທຳ ແລະ ບ້ານວັດທະນະທຳ, ການແກ້ໄຂສິ່ງອຸດຕັນໃນການອໍານວຍຄວາມສະດວກໃຫ້ແກ່ການທ່ອງທ່ຽວ ອາດບໍ່ບັນລຸຕາມຄາດໝາຍທີ່ວາງອອກ ທຽບໃສ່ການປະຕິບັດຕົວຈິງໃນ 4 ເດືອນຜ່ານມາ;
11.    ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ເຫັນວ່າ ຍັງບໍ່ທັນລວມສູນ ເຮັດພໍໃຜພໍລາວ, ການແບ່ງຄວາມຮັບຜິດຊອບ ແລະ ກົນໄກການປະສານງານຂອງບັນດາຂະແໜງການ ລະຫວ່າງສູນກາງ ແລະ ທ້ອງຖິ່ນ ຍັງບໍ່ທັນລະອຽດຈະແຈ້ງ;
12.    ວຽກງານປ້ອງກັນຊາດ-ປ້ອງກັນຄວາມສະຫງົບ ເຫັນວ່າ ການກວດກາ ແລະ ຄຸ້ມຄອງຄົນ ເຂົ້າ-ອອກເມືອງ, ຄຸ້ມຄອງຄົນຕ່າງປະເທດ ແລະ ນັກທ່ອງທ່ຽວ ຍັງບໍ່ທັນມີການປະສານສົມທົບກັນດີເທົ່າທີ່ຄວນ ຍັງມີການລັກລອບ ປະກອບອາຊີບກະທໍາຜິດຕໍ່ລະບຽບກົດໝາຍ; ການແກ້ໄຂປະກົດການຫຍໍ້ທໍ້ທາງສັງຄົມ ກ່ຽວກັບບັນຫາ ຢາເສບຕິດ, ຮ້ານເກມອອນລາຍ, ອຸປະຕິເຫດຕາມທ້ອງຖະໜົນ, ການຄ້າມະນຸດ, ການປຸ້ນຈີ້-ຊິງຊັບ ແລະ ການຄຸ້ມຄອງຄ້າຍຄຸມຂັງ-ດັດສ້າງ ຍັງເຮັດບໍ່ທັນເຂັ້ມງວດຕາມກົດໝາຍ.
II.    ຕໍ່ແຜນງົບປະມານແຫ່ງລັດ:
1.    ດ້ານລາຍຮັບ:
ການຈັດຕັ້ງປະຕິບັດລາຍຮັບ 4 ເດືອນ ປະຕິບັດໄດ້ 24,03% ຂອງແຜນການປີ  ເຫັນວ່າ ມີທ່າອ່ຽງດີຂື້ນ ຖ້າທຽບໃສ່ໄລຍະດ່ຽວກັນຂອງປີຜ່ານມາ ແຕ່ຖ້າທຽບໃສ່ມະຕິຂອງສະພາຮັບຮອງແລ້ວ ປົກກະຕິຄວນຈະໄດ້ 32%. ສາເຫດທີ່ພາໃຫ້ບໍ່ສາມາດປະຕິບັດໄດ້ຕາມແຜນ ແມ່ນຍ້ອນ:
–     ການຈັດເກັບລາຍຮັບຂອງທ້ອງຖິ່ນບໍ່ໄດ້ຕາມແຜນ ເນື່ອງຈາກວ່າຫຼາຍແຂວງ ໄດ້ຮັບມອບຕົວເລກຊ້າ ແລະ ສູງເກີນຖານຂໍ້ມູນການຈັດເກັບລາຍຮັບຕົວຈິງ;
–    ການມອບພັນທະອາກອນແບບມອບເໝົາຍັງມີລັກສະນະຕໍ່ລອງ, ແຈ້ງເສຍພັນທະ ບໍ່ຖືກຕ້ອງຕາມກຳນົດເວລາ, ບໍ່ຖືກຕ້ອງຕາມລາຍຮັບຕົວຈິງ;
–    ລະບົບການຈັດຕັ້ງການຈັດເກັບລາຍຮັບຢູ່ດ່ານສາກົນ ບໍ່ທັນເປັນເອກະພາບ, ການສ້າງສິ່ງອຳນວຍຄວາມສະດວກໃຫ້ແກ່ການນຳເຂົ້າ-ສົ່ງອອກສິນຄ້າ ແລະ ນັກທ່ອງທ່ຽວ ຍັງບໍ່ທັນໄດ້ດີເທົ່າທີ່ຄວນ;
–    ການຫັນເປັນທັນສະໄໝມີຫຼາຍແຂວງທີ່ຕິດຕັ້ງລະບົບທັນສະໄໝແລ້ວ ແຕ່ຍັງຂາດພະນັກງານວິຊາການທີ່ຮັບໃຊ້ວຽກງານດັ່ງກ່າວ ການຈັດເກັບລາຍຮັບທີ່ດິນຜ່ານລະບົບທະນາຄານ ຢູ່ຫຼາຍທ້ອງຖິ່ນ ຍັງບໍ່ມີຄວາມພ້ອມໃນການປະຕິບັດຕົວຈິງ, ຫຼາຍຫົວໜ່ວຍທຸລະກິດຍັງບໍ່ທັນໄດ້ເຊື່ອມຕໍ່ຂໍ້ມູນກ່ຽວກັບການຂາຍສິນຄ້າ ແລະ ການບໍລິການຂອງຕົນເຂົ້າກັບລະບົບສ່ວຍສາອາກອນ;
–    ການເກັບກູ້ຄືນລາຍຮັບຈາກຜົນການກວດກາຕາມຜົນການກວດສອບ ກໍຍັງບໍ່ສາມາດປະຕິບັດໄດ້ ເປັນຕົ້ນ ໜີ້ຕ້ອງຮັບຈາກຄ່າຊັບພະຍາກອນ, ຄ່າເຊົ່າ ແລະ ສຳປະທານທີ່ດິນ-ເຮືອນລັດ;
–    ການເກັບກູ້ຊັບສິນ, ວັດຖຸເງິນຄຳທີ່ສານຕັດສິນໃຊ້ໄດ້ຢ່າງເດັດຂາດ ເພື່ອຮິບເປັນຂອງລັດ ຍັງບໍ່ສາມາດຈັດຕັ້ງປະຕິບັດໄດ້.
–    ການຈັດຕັ້ງປະຕິບັດກົດໝາຍ ແລະ ນິຕິກຳໃຕ້ກົດໝາຍ ທີ່ິຕິດພັນກັບການຈັດເກັບລາຍຮັບ ຍັງບໍ່ທັນເຂັ້ມງວດ ຍັງມີການຕົກລົງອະນຸມັດຍົກເວັ້ນ ຫຼື ຫຼຸດຜ່ອນອັດຕາພາສີ-ອາກອນ ທີ່ບໍ່ສອດຄ່ອງກັບກົດໝາຍ.
2. ດ້ານລາຍຈ່າຍ:
–    ລາຍຈ່າຍ 4 ເດືອນ ປະຕິບັດໄດ້ 19,97% ຂອງແຜນການປີ ເຫັນວ່າຕ່ຳກວ່າແຜນທີ່ສະພາແຫ່ງຊາດອະນຸມັດ;
–    ລາຍຈ່າຍລົງທຶນໄດ້ ອະນຸມັດເອກະສານກວດຜ່ານຂອງຂະແໜງແຜນການ ແລະ ການລົງທຶນ ທັງໝົດ 2.455 ໂຄງການ ມູນຄ່າ 1.627,62 ຕື້ກີບ ເທົ່າກັບ 37,3% ຂອງແຜນການປີ ມາເຖິງປັດຈຸບັນ ຂະແໜງການເງິນໄດ້ຊຳລະຕົວຈິງ ທັງໝົດ 262,80 ຕື້ກີບ ເທົ່າກັບ 13,17% ເຫັນວ່າຕ່ຳກວ່າ ຕົວເລກຄາດໝາຍຂອງແຜນການທີ່ວາງໄວ້, ເນື່ອງຈາກໃນປີຜ່ານມາມີຜົນກະທົບຈາກໄພພິບັດທາງທຳມະຊາດ ຕ້ອງໄດ້ລໍຖ້າການປະເມີນຜົນໂຄງການຟື້ນຟູໄພພິບັດ ເຮັດໃຫ້ຂອດຂັ້ນການອະນຸມັດ ແລະ ການແຈ້ງຕົວເລກລົງທຶນຂອງລັດ ແກ່ບັນດາແຂວງ ຊັກຊ້າ.
3. ການດູ່ນດ່ຽງ: ການຊອກຫາແຫຼ່ງທຶນດອກເບ້ຍຕໍ່າ ເພື່ອມາດຸ່ນດ່ຽງງົບປະມານ ແລະ ສະໜອງທຶນໃຫ້ແກ່ການສົ່ງເສີມທຸລະກິດຂະໜາດນ້ອຍ ແລະ ຂະໜາດກາງຍັງບໍ່ສາມາດບັນລຸໄດ້ຕາມແຜນການ .
4. ການຈັດແບ່ງງົບປະມານຕົວຈິງຂອງຂະແໜງການສາຍຕັ້ງ ເຫັນວ່າ:
–    ການຈັດຕັ້ງປະຕິບັດ ໂດຍເອົາກອງທຶນປະກັນສຸຂະພາບ ອອກຈາກ ກອງທຶນປະກັນສັງຄົມ ແລ້ວໄປຂື້ນກັບກະຊວງສາທາລະນະສຸກນັ້ນ ແມ່ນຖືກຕ້ອງ ແລະ ສອດຄ່ອງຕາມກົດໝາຍກຳນົດ ແຕ່ໃນການຈັດຕັ້ງປະຕິບັດຕົວຈິງ ຍັງມີຄວາມຫຍຸ້ງຍາກ ຍ້ອນບໍ່ທັນມີຄວາມພ້ອມຕໍ່ການຄຸ້ມຄອງ ແລະ ການນໍາໃຊ້ເງິນ;

5. ການສັງລວມໜີ້ສິນສາທາລະນະ ແລະ ການຄຸ້ມຄອງການຊຳລະໜີ້ສິນ ເຫັນວ່າ:
–    ໜີ້ສິນຄ້າງຊໍາລະໂຄງການລົງທຶນຂອງລັດ ໂດຍສະເພາະໂຄງການທີ່ສຳເລັດ 100% ຍັງມີລັກສະນະຄຸມເຄືອ;
–    ສ່ວນໜີ້ສິນທີ່ເກີດຈາກ ການກູ້ຢືມໂດຍກົງ ແລະ ການຄ້ຳປະກັນ ຂອງລັດຖະບານ ໃຫ້ແກ່ລັດວິສາຫະກິດ ແລະ ພາກເອກະຊົນ ຍັງມີຈຳນວນບໍ່ໜ້ອຍ ແລະ ມີຄວາມສ່ຽງໃນການຊຳລະຄືນຕາມສັນຍາ.
ຮຽນທ່ານປະທານ ແລະ ບັນດາທ່ານ ທີ່ນັບຖື ແລະ ຮັກແພງ
ຕໍ່ກັບທິດທາງໃນການສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ  ແລະ ແຜນງົບປະມານ ແຫ່ງລັດ ໃນ 6 ເດືອນ ທ້າຍປີ 2019 ທີ່ລັດຖະບານ ໄດ້ສະເໜີມານັ້ນ, ຄະນະປະຈໍາສະພາແຫ່ງຊາດ ຂໍສະແດງຄວາມເປັນເອກະພາບສູງ ແລະ ເຫັນດີໂດຍພື້ນຖານ ແຕ່ໂອກາດນີ້ ຂໍສະເໜີບາງບັນຫາເພີ່ມເຕີມ ດັ່ງນີ້:

1.    ສະເໜີໃຫ້ສືບຕໍ່ຈັດຕັ້ງປະຕິບັດ ມະຕິ 099/ສພຊ ແລະ ມະຕິ 100/ສພຊ ລົງວັນທີ 28 ພະຈິກ 2018 ໃຫ້ເຂັ້ມງວດ ແລະບັນລຸຕາມຄາດໝາຍທີ່ວາງໄວ້;
2.    ກ່ຽວກັບແຜນງົບປະມານແຫ່ງລັດ ສະເໜີມາດຕະການເພີ່ມເຕີມດັ່ງນີ້:
2.1    ດ້ານລາຍຮັບ:
–  ສະເໜີໃຫ້ຊຸກຍູ້ຫົວໜ່ວຍວິສາຫະກິດ ຖືບັນຊີ, ວິສາຫະກິດທີ່ມີລາຍຮັບ 400 ລ້ານກີບ ຂື້ນໄປ ຕ້ອງເຂົ້າສູ່ລະບົບອາກອນມູນຄ່າເພີ່ມ;
–  ສະເໜີໃຫ້ເລັ່ງທວງໜີ້ຕ້ອງຮັບຈາກວິສາຫະກິດທີ່ໄດ້ຜ່ານການໄລ່ລຽງ ແລະມີແຈ້ງການໃຫ້ມອບພັນທະແລ້ວ, ສືບຕໍ່ເກັບອາກອນກຳໄລຈາກຜູ້ຮັບເໝົາໂຄງການກໍ່ສ້າງສາຍສົ່ງ-ສະຖານີ ແລະ ເຂື່ອນໄຟຟ້າ ຕາມມະຕິຂອງ ຄະນະປະຈຳສະພາແຫ່ງຊາດສະບັບເລກທີ 04/ ຄປຈ, ລົງວັນທີ 15/01/2019;
–  ສະເໜີໃຫ້ຊີ້ນຳກະຊວງການເງິນ ປະສານສົມທົບກະຊວງປ້ອງກັນຄວາມສະຫງົບ ແລະ ພາກສ່ວນກ່ຽວຂ້ອງ ເອົາໃຈໃສ່ຂື້ນບັນຊີ, ຄຸ້ມຄອງ ແລະ ເກັບກູ້ ຊັບສິນ, ວັດຖຸເງິນຄຳ ທີ່ສານຕັດສິນໃຊ້ໄດ້ຢ່າງເດັດຂາດ ເພື່ອຮິບເປັນຂອງລັດ ໃຫ້ສອດຄ່ອງກັບກົດໝາຍວ່າດ້ວຍການຄຸ້ມຄອງຊັບສິນຂອງລັດ;
–  ສະເໜີໃຫ້ສືບຕໍ່ເກັບກູ້ຄືນລາຍຮັບຈາກຜົນການກວດກາຕາມຜົນການກວດສອບ ນັບແຕ່ ສົກປີ 2013-2014 ເປັນຕົ້ນມາ;
2.2    ດ້ານລາຍຈ່າຍ:
ສະເໜີໃຫ້ລັດຖະບານເອົາໃຈໃສ່ຊຳລະໂຄງການລົງທຶນບູລິມະສິດຂອງລັດຖະບານ ເປັນຕົ້ນ ໂຄງການໄພພິບັດສຸກເສີນ, ໂຄງການຍຸດທະສາດຊາຍແດນ, ໂຄງການແກ້ໄຂຄວາມທຸກຍາກ;
2.3    ໃນການສັງລວມໜີ້ສິນສາທາລະນະ ແລະ ການຄຸ້ມຄອງການຊຳລະໜີ້ສິນ:
ສະເໜີໃຫ້ສືບຕໍ່ເລັ່ງທວງໜີ້ສິນຂອງບັນດາວິສາຫະກິດ ທີ່ຜ່ານການກວດກາໄລ່ລຽງແລ້ວ, ໜີ້ຄ້າງມອບຕາມສັນຍາເຊົ່າ, ສຳປະທານ, ເງິນຄໍ້າປະກັນນຳບັນດາໂຄງການຕ່າງໆ ທີ່ຍັງເກັບບໍ່ໄດ້ຕາມທີ່ອົງການກວດສອບກວດກາເຫັນໃນສົກປີຜ່ານມາ;
3.    ສືບຕໍ່ປັບປຸງວິສາຫະກິດຂອງລັດຈຳນວນໜຶ່ງທີ່ຍັງຂາດສະພາບຄ່ອງທາງດ້ານການເງິນ ໃຫ້ສຳເລັດໂດຍໄວ ແລະ ສາມາດເຄື່ອນໄຫວໄດ້ດີຂຶ້ນ;
4.    ປັບປຸງກົນໄກການປະສານງານລະຫວ່າງ ຂະແໜງການຕ່າງໆ ໃຫ້ມີຄວາມຄ່ອງຕົວຂຶ້ນກວ່າເກົ່າໃນຂົງເຂດການລົງທຶນ ແລະ ວຽກງານທີ່ດິນ;
5.    ອອກນິຕິກຳ ຈຳນວນໜຶ່ງທີ່ເຫັນວ່າມີຄວາມຈຳເປັນ ເພື່ອເປັນບ່ອນອີງໃນການຈັດຕັ້ງປະຕິບັດມະຕິ 099/ສພຊ ແລະ ມະຕິ 100/ສພຊ ລົງວັນທີ 28 ພະຈິກ 2018 ໃຫ້ມີຜົນສໍາເລັດ ເປັນຕົ້ນ:  ການສ້າງ ແລະ ປັບປຸງກົດໝາຍ ແລະ ນິຕິກຳໃຕ້ກົດໝາຍ ທີ່ຕິດພັນກັບການຈັດເກັບລາຍຮັບ;
6.    ໃນຂົງເຂດວັດທະນະທຳ-ສັງຄົມ ສະເໜີໃຫ້ສືບຕໍ່ຈັດຕັ້ງປະຕິບັດບັນດາຄາດໝາຍທີ່ມີຄວາມສ່ຽງ, ເອົາໃຈໃສ່ສ້າງກົນໄກ ແລະ ນິຕິກຳ ເພື່້ອອຳນວຍຄວາມສະດວກໃຫ້ແກ່ການຈັດຕັ້ງປະຕິບັດບັນດາຄາດໝາຍທີ່ໄດ້ກໍານົດ; ປັບປຸງແກ້ໄຂບາງນິຕິກຳທີ່ຍັງບໍ່ສອດຄ່ອງ ໂດຍສະເພາະ ມາດຕາ 61 ຂອງກົດໝາຍວ່າດ້ວຍການສຶກສາ.  ຄົ້ນຄວ້າສ້າງກົນໄກການນໍາໃຊ້ງົບປະມານ ບ້ວງຊ່ວຍເຫຼືອສາກົນ ຕໍ່ວຽກງານໄພພິບັດ ແລະເກັບກູ້ລະເບີດບໍ່ທັນແຕກໃຫ້ຄ່ອງຕົວ ແລະທ່ວງທັນຕາມເວລາ; ເອົາໃຈໃສ່ ປະເມີນຄືນ ແລະ ຕິດຕາມກວດກາ ການສ້າງຄອບຄົວວັດທະນະທຳ ແລະບ້ານວັດທະນະທຳ ໃຫ້ໄດ້ມາດຕະຖານທີ່ໄດ້ກໍານົດໄວ້;

ທັງໝົດນັ້ນ ແມ່ນບາງຄຳເຫັນ ໃນນາມເປັນຕົວແທນຂອງປະຊາຊົນບັນດາເຜົ່າ ໃນຂອບເຂດທົ່ວປະເທດ ຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ທີ່ທ່ານ ນາຍົກລັດຖະມົນຕີ ໄດ້ລາຍງານຕໍ່ ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII.
ທ້າຍສຸດນີ້ ຂໍອວຍພອນແດ່ທ່ານ ເລຂາທິການໃຫຍ່, ປະທານປະເທດແຫ່ງ ສປປ ລາວ, ທ່ານ ປະທານສະພາແຫ່ງຊາດ, ທ່ານ ນາຍົກລັດຖະມົນຕີ, ບັນດາທ່ານສະມາຊິກສະພາແຫ່ງຊາດ, ບັນດາທ່ານສະມາຊິກລັດຖະບານ, ແຂກຜູ້ມີກຽດທຸກທ່ານ ຈົ່ງມີສຸກຂະພາບແຂງແຮງ  ແລະ ປະສົບຜົນສຳເລັດ ໃນໜ້າທີອັນມີກຽດຂອງທ່ານ.
ອວຍພອນໃຫ້ກອງປະຊຸມປະສົບຜົນສຳເລັດຕາມຈຸດປະສົງລະດັບຄາດໝາຍ.
( ຂໍຂອບໃຈ)