(ສພຊ) ວັນອັງຄານ 19 ກຸມພາ 2019 ທີ່ສະພາປະຊາຊົນແຂວງ (ສພຂ) ອຸດົມໄຊ, ທ່ານ ພົນໂທ ແສງນວນ ໄຊຍະລາດ ພ້ອມດ້ວຍຮອງປະທານກໍາມາທິການບັນດາເຜົ່າ, ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ), ຮອງປະທານກໍາມາທິການການຕ່າງປະເທດ ສະພາແຫ່ງຊາດ (ສພຊ) ພ້ອມດ້ວຍຄະນະ ໄດ້ເຮັດວຽກກັບ ທ່ານ ນາງ ຈັນສີ ຈິດວົງເດືອນ ແລະ ຄໍາດີ ສີວອນ ຮອງປະທານ ສພຂ ພ້ອມດ້ວຍບັນດາກໍາມະການ ສະພາປະຊາຊົນແຂວງ ແລະ ບັນດາພະແນກການທີ່ກ່ຽວຂ້ອງຂອງແຂວງອຸດົມໄຊ ເພື່ອຮັບຟັງລາຍງານກ່ຽວກັບ ການປະສານງານຫວ່າງບັນດາ ສພຂ ແລະ ບັນດາພະແນກການຂອງແຂວງທີ່ກ່ຽວຂ້ອງ ໃນການແກ້ໄຂຄະດີທີ່ຫຍຸ້ງຍາກ ແລະ ບັນຫາອື່ນໆ; ສະພາບພາຍໃນສູນຄຸມຂັງ ມີຄວາມສະດວກ ແລະ ຫຍຸ້ງຍາກແນວໃດ, ຕະຫລອດຮອດການປະຕິບັດວຽກງານຂອງເຈົ້າໜ້າທີ່ ໄດ້ມີການລະເມີດສິດທິມະນຸດຫລືບໍ່?; ສະພາບທາງດ້ານວຽກງານຊົນເຜົ່າ ແລະ ສາສະໜາ, ວຽກງານສານ-ໄອຍະການ ການຕັດສິນຄະດີແລ້ວ ແລະ ການຈັດຕັ້ງປະຕິບັດຄໍາຕັດສິນຂອງສານຄືແນວໃດ?, ວຽກງານການຕ່າງປະເທດ ການເຂົ້າເມືອງຜິດກົດໝາຍ ໄດ້ມີມາດຕະການແກ້ໄຂຄືແນວໃດ? ການຄຸ້ມຄອງຄົນຕ່າງປະເທດທີ່ເຂົ້າມາທໍາມາຫາກິນ ຫລື ປະຕິບັດໜ້າທີ່ໃນໂຄງການກໍ່ສ້າງເສັ້ນທາງລົດໄຟລາວ-ຈີນ, ການຄ້າມະນຸດ, ການແຕ່ງດອງຂອງຄົນຕ່າງປະເທດກັບຄົນລາວ ທີ່ບໍ່ຖືກກົດໝາຍ ແລະ ບັນຫາອື່ນໆ.

ຕາງໜ້າແນວລາວສ້າງຊາດແຂວງ ໄດ້ລາຍງານໃຫ້ຊາບວ່າ: ສາສະໜາຕົ້ນຕໍຢູ່ແຂວງອຸດົມໄຊແມ່ນ ສາສະໜາພຸດ ແລະ ການນັບຖືບັນພະບູລຸດ; ສ່ວນສາສະໜາຄຣິດ, ອິດສະລາມ ແລະ ອື່ນໆ ກໍມີຈໍານວນໜຶ່ງ ແຕ່ຍັງບໍ່ທັນຖືກຮັບຮູ້ຢ່າງເປັນທາງການ ແຕ່ກໍສ້າງຜົນກະທົບເລັກນ້ອຍ ເປັນຕົ້ນຜູ້ທີ່ຖືສາສະໜາຄຣິດຕະຈັກ ແມ່ນບໍ່ເຂົ້າຮ່ວມຂະບວນການຕ່າງໆຂອງອໍານາດການປົກຄອງບ້ານ, ຖ້າມີການຂາຍສັດລ້ຽງ ຜູ້ຂາຍຕ້ອງຈ່າຍເງິນໃຫ້ ກອງທຶນສາສະໜາ ເຮັດໃຫ້ປະຊາຊົນທີ່ສາສະໜາດັ່ງກ່າວຈໍານວນໜຶ່ງໄດ້ຮັບຜົນກະທົບ, ອາຈານສອນ ຫລື ຄຸນພໍ່ ແມ່ນຍັງມີລະດັບຕໍ່າ ຍັງບໍ່ເຂົ້າໃຈຄໍາສອນຢ່າງເລິກເຊິ່ງ, ສະຫລຸບແລ້ວ ການເຂົ້າສາສະໜາດັ່ງກ່າວ ແມ່ນເພື່ອຫວັງ ຜົນປະໂຫຽດບາງຢ່າງຈາກຄໍາຕົວະຍົວະ.  ຕາງໜ້າພະແນກພາຍໃນແຂວງ ກໍໄດ້ຢືນຢັນວ່າ: ສາສະໜາຄຣິດ ແລະ ອິດສະລາມ ຍັງບໍ່ຖືກຮັບຮູ້ຢ່າງເປັນທາງການຢູ່ແຂວງອຸດົມໄຊ; ສ່ວນຄວາມຫຍຸ້ງຍາກ ແລະ ສາເຫດ ຍັງແມ່ນບັນຫາງົບປະມານ ແລະ ກົນໄກ ຈຶ່ງບໍ່ສາມາດລົງເຜີຍແຜ່ດໍາລັດ ເລກທີ 315/ລບ ວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາຢູ່ ສປປລາວ ໄດ້ຢ່າງທົ່ວເຖິງ.  ຕາງໜ້າພະແນກການຕ່າງປະເທດແຂວງ ໄດ້ລາຍງານວ່າ: ແຂວງອຸດົໃໄຊ ມີຊາຍແດນຕິດກັບ ສປຈີນ ຢຸ່ເມືອງນາຫມໍ້, ແຕ່ບໍ່ແມ່ນດ່ານສາກົນ ແລະ ກໍບໍ່ແມ່ນດ່ານປະເພນີ ເປັນພຽງຈຸດທີ່ມີເສັ້ນທາງເຊື່ອມຈອດກັນ, ແຕ່ທາງສອງຝ່າຍກໍໄດ້ປະກອບເຈົ້າໜ້າທີ່ພາສີ ແລະ ກໍໄດ້ມີການຂົນສົ່ງສິນຄ້າເຂົ້າ-ອອກ ບາງຄັ້ງຄາວ;​ ແຕ່ມາຮອດເດືອນ ຕຸລາ 2018 ເນື່ອງຈາກທາງຝ່າຍຈີນ ໄດ້ມີການເຂັ້ມງວດຂຶ້ນ ແລະ ກໍໄດ້ຢຸດຕິການອານຸຍາດນໍາເຂົ້າສິນຄ້າຜ່ານຊາຍແດນດັັ່ງກ່າວ; ຝ່າຍລາວເຮົາ ກໍໄດ້ມີການປະສານກັບ ເມືອງຊຽງຮຸ່ງ ສປຈີນແລ້ວ, ປະຈຸບັນ ແມ່ນຍັງຢູ່ໃນຂັ້ນຕອນພິຈາລະນາ;​ ບໍ່ມີກໍລະນີຄ້າຂາຍຢາເສບຕິດຜ່ານເສັ້ນຊາຍແດນ; ສໍາລັບກໍລະນີ ແຕ່ງດອງລະຫວ່າງຄົນຕ່າງປະເທດ ກັບຄົນລາວ ປະຈຸບັນມີຄົນຈີນມາແຕ່ງດອງກັບຄົນລາວ 8 ຄູ່; ໄດ້ມີກໍລະນີລັກລອບຈູງສັດຂ້າມຊາຍແດນເພື່ອໄປຂາຍຢູ່ຈີນ ແຕ່ກໍມີພຽງເລັກນ້ອຍເທົ່ານັ້ນ. ຕ່າງໜ້າອົງການໄອຍະການປະຊາຊົນແຂວງ ໄດ້ລາຍງານວ່າ: ໄລຍະຜ່ານມາ ການປະສານງານລະຫວ່າງ 5 ພາກສ່ວນ ຄື: ອົງການໄອຍະການແຂວງ, ສານປະຊາຊົນແຂວງ, ພະແນກຍຸຕິທໍາແຂວງ, ກອງບັນຊາການປ້ອງກັນຊາດແຂວງ ແລະ ກອງບັນຊາການປ້ອງກັນຄວາມສະຫງົບແຂວງ ແມ່ນປະຕິບັດໄດ້ດີ, ບໍ່ມີບັນຫາດ້ານການດໍາເນີນຄະດີຕ່າງໆ, ແຕ່ສໍາລັບສະພາບຂອງສູນຄຸມຂັງ ແມ່ນເຫັນວ່າມີຄວາມແອອັດຫລາຍ ອັດຕາກິນຂອງຜູ້ຖືກຫາແມ່ນຕໍ່າເກີນໄປ ພາຍໃນຫ້ອງຄຸມຂັງຍັງບໍ່ທັນຮັກສາໄດ້ຫລັກອະນາໄມ, ສໍາລັບການເຜີຍແຜ່ກົດໝາຍ ແມ່ນຍັງບໍ່ທັນປະຕິບັດໄດ້ຢ່າງທົ່ວເຖິງ.

ໃນຕອນທ້າຍ ທ່ານຮອງປະທານສະພາແຫ່ງຊາດ ໄດ້ມີຄໍາເຫັນໂອ້ລົມ ໂດຍທ່ານໄດ້ເນັ້ນໃຫ້ໃຫ້ທຸກຂະແໜງການທີ່ກ່ຽວຂ້ອງເພີ່ມທະວີການປະສານງານກັນໃຫ້ດີກວ່າເກົ່າ ດ້ວຍກົນໄກທີ່ດີ, ສ່ວນສະພາປະຊາຊົນແຂວງ ແມ່ນໃຫ້ເພີ່ມທະວຽກວຽກງານຕິດຕາມກວດກາໃຫ້ດີ ຕາມພາລະບົດບາດຂອງຕົນ, ເພີ່ມຄວາມເຂັ້ມງວດໃນການກວດກາຄຸ້ມຄອງຄົນຕ່າງປະເທດທີ່ມາດໍາລົງຊີວິດຢູ່ລາວ ໂດຍສະເພາະບັນດາຜູ້ທີ່ມາເຮັດວຽກໃນ ໂຄງການກໍ່ສ້າງເສັ້ນທາງລົດໄຟ ແລະ ໃຫ້ມີການເຂັ້ມງວດໃນການປ້ອງກັນຄວາມສະຫງົບ ຕາມເສັ້ນຊາຍແດນ ໂດຍມີການແບ່ງງານກັນລະອຽດ ລະຫວ່າງກໍາລັງປ້ອງກັນຊາດ ໃຫ້ດູແລຫລັກໝາຍຊາຍແດນ ການເຂົ້າ-ອອກຜ່ານເສັ້ນຊາຍແດນທີ່ບໍ່ແມ່ນດ່ານ, ສ່ວນກໍາລັງປ້ອງກັນຄວາມສະຫງົບ ແມ່ນດູແລດ່ານຊາຍແດນ ຢ່າງເຂັ້ມງວດ.

ບຸນເກີດ ວົງໄຊຍາ