ໃນຕອນເຊົ້າວັນທີ 29 ກໍລະກົດ 2022 ຜ່ານມາ ຄະນະນໍາສະພາປະຊາຊົນແຂວງ ເຊກອງ ນໍາໂດຍທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ ພ້ອມດ້ວຍ ບັນດາທ່ານ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ບັນດາພະແນກການ ແລະ ຂະແໜງການທີ່ກ່ຽວຂ້ອງ ໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ວຽກງານຢູ່ຄ້າຍຄຸມຂັງ-ດັດສ້າງ ແຂວງ ເຊກອງ ໂດຍການຕ້ອນຮັບຢ່າງອົບອຸ່ນຈາກທ່ານ ພັທ ສົມຫວັງ ກວດແກ້ວມະນີວົງ ຫົວໜ້າຄ້າຍຄຸມຂັງ-ດັດສ້າງ ແຂວງ ເຊກອງ ພ້ອມດ້ວຍນາຍ ແລະ ພົນຕໍາຫຼວດທີ່ປະຈໍາຢູ່ຄ້າຍດັ່ງກ່າວ.
ໂອກາດດັ່ງກ່າວ, ທ່ານ ພັທ ສົມຫວັງ ກວດແກ້ວມະນີວົງ ຫົວໜ້າຄ້າຍຄຸມຂັງ-ດັດສ້າງ ແຂວງ ເຊກອງ ໄດ້ລາຍງານໂດຍຫຍໍ້ກ່ຽວກັບສະພາບການຈັດຕັ້ງປະຕິບັດວຽກງານ ໃນໄລຍະ 6 ເດືອນຜ່ານມາ ຄ້າຍຄຸມຂັງ-ດັດສ້າງ ແຂວງ ເຊກອງ ໄດ້ເອົາໃຈໃສ່ໃນການປະຕິບັດໜ້າທີ່ວຽກງານຂອງຕົນຢ່າງມີຈຸດສຸມ ເປັນຕົ້ນໄດ້ເອົາໃຈໃສ່ໃນການສຶກສາອົບຮົມການເມືອງ-ແນວຄິດໃຫ້ແກ່ພະນັກງານນັກຮົບຢ່າງຕັ້ງໜ້າ ເຮັດໃຫ້ນາຍ ແລະ ພົນຕໍາຫຼວດພາຍໃນຄ້າຍມີຄວາມຮັບຮູ້ເຂົ້າໃຈຕໍ່ແນວທາງການປ່ຽນແປງໃໝ່ຂອງພັກ, ລະບຽບກົດໝາຍຂອງລັດ, ສຸມໃສ່ການກໍ່ສ້າງ, ບໍາລຸງ ແລະ ຍົກລະດັບຄວາມຮູ້ຄວາມສາມາດທາງດ້ານວິຊາສະເພາະຂອງພະນັກງານ-ນັກຮົບ ແລະ ສັບຊ້ອນພະນັກງານເຂົ້າໃສ່ວຽກງານຢ່າງເໝາະສົມ ພ້ອມທັງສຸມໃສ່ເວນຍາມຕະຫຼອດ 24 ຊົ່ວໂມງ. ນອກນັ້ນຍັງໄດ້ສຸມໃສ່ຊີ້ນໍາ, ຄຸ້ມຄອງນັກໂທດ, ຜູ້ຖືກຫາ, ຜູ້ຖືກດັດສ້າງ ພ້ອມທັງຈັດຕັ້ງເຜີຍແຜ່ບັນດາຂໍ້ກໍານົດ, ກົດລະບຽບຂອງຄ້າຍຄຸມຂັງ-ດັດສ້າງ ແລະ ກົດໝາຍທີ່ກ່ຽວພັນເຖິງການກະທໍາຜິດຂອງເຂົາເຈົ້າ ໃຫ້ຮູ້ສຶກກິນແໜງແຄງໃຈຕໍ່ການກະທໍາຜິດຂອງຕົນ ແລະ ເຂັດຫຼາບ, ພ້ອມທັງຊຸກຍູ້-ຕິດຕາມ ບັນດານັກໂທດ, ຜູ້ຕ້ອງຫາ ແລະ ດັດສ້າງ ໄດ້ສ້າງກິດຈະກໍາຕ່າງໆ ເປັນຕົ້ນມີການແບ່ງຈຸ ຜັດປ່ຽນກັນອອກກໍາລັງກາຍ ແລະ ອອກແຮງງານ ເປັນປົກກະຕິ.
ພ້ອມນີ້, ກໍຍັງໄດ້ເອົາໃຈໃສ່ດ້ານວຽກງານພາລາທິການ ດ້ວຍການເພີ່ມພູນຜະຫຼິດຜົນແກ້ໄຂຊີວິດການເປັນຢູ່ຂອງເຂົາເຈົ້າ ເປັນຕົ້ນດ້ານການປູກຝັງ, ການຈັກສານ, ສ້ອມແປງ ແລະ ດ້ານເຟີນີເຈີ້ ແລະ ເອົາໃຈໃສ່ກວດກາ, ເບິ່ງແຍງສຸຂະພາບຂອງພະນັກງານ, ນັກໂທດ, ຜູ້ຖືກຫາ ແລະ ດັດສ້າງຢ່າງເປັນປົກກະຕິ. ນັບແຕ່ເດືອນ ມັງກອນ ຫາ ເດືອນ ມິຖຸນາ 2022 ມີຈໍານວນນັກໂທດ, ຜູ້ຕ້ອງຫາ ແລະ ດັດສ້າງ ທັງໝົດ 183 ຄົນ, ຍິງ 06 ຄົນ, ຕ່າງປະເທດ 06 ຄົນ. ໃນນັ້ນ, ມີນັກໂທດ ທັງໝົດ 26 ຄົນ, ຍິງ 02 ຄົນ, ນັກໂທດອອກປິ່ນປົວ 03 ຄົນ, ຍິງ 01 ຄົນ, ນັກໂທດເພີ່ມ 06 ຄົນ ແລະ ນັກໂທດຖືກປ່ອຍຕົວ 05 ຄົນ. ເຊິ່ງປະຈຸບັນນັກໂທດມີໜ້າຕົວຈິງ 18 ຄົນ, ຍິງ 01 ຄົນ; ມີຜູ້ຕ້ອງຫາ ທັງໝົດ 152 ຄົນ, ຍິງ 04 ຄົນ, ຜູ້ຕ້ອງຫາຕ່າງປະເທດ 06 ຄົນ, ຜູ້ຕ້ອງຫາອອກປິ່ນປົວ 03 ຄົນ, ຜູ້ຕ້ອງຫາເພີ່ມ 55 ຄົນ, ຍິງ 02 ຄົນ, ຕ້ອງຫາຕ່າງປະເທດ 02 ຄົນ, ຜູ້ຕ້ອງຫາຖືກປ່ອຍຕົວ 18 ຄົນ, ຕ່າງປະເທດ 03 ຄົນ ແລະ ຕ້ອງຫາທີ່ບໍ່ທັນມີຄໍາສັ່ງກັກຂັງພາງ 03 ຄົນ; ມີຈໍານວນດັດສ້າງ ທັງໝົດ 05 ຄົນ, ດັດສ້າງຖືກປ່ອຍຕົວ 01 ຄົນ ແລະ ຍັງມີໜ້າຕົວຈິງ 04 ຄົນ. ເຊິ່ງປະຈຸບັນ ຈໍານວນນັກໂທດ, ຜູ້ຕ້ອງຫາ ແລະ ດັດສ້າງ ມີໜ້າຕົວຈິງ ທັງໝົດ 153 ຄົນ, ຍິງ 05 ຄົນ, ຕ່າງປະເທດ 03 ຄົນ.
ພາຍຫຼັງໄດ້ຮັບຟັງການລາຍງານຈາກທ່ານ ຫົວໜ້າຄ້າຍຄຸມຂັງ-ດັດສ້າງແລ້ວ ກໍໄດ້ມີການສົນທະນາແລກປ່ຽນຖອດຖອນບົດຮຽນເຊິ່ງກັນ ແລະ ກັນຢ່າງມີຈຸດສຸມ. ພ້ອມນັ້ນ, ທ່ານ ປະທານ ສະພາປະຊາຊົນແຂວງ ໄດ້ມີຄໍາເຫັນໂອ້ລົມ ໂດຍໄດ້ຊີ້ທິດເຍືອງທາງໃຫ້ແກ່ຄະນະພັກ-ຄະນະນໍາ, ນາຍ ແລະ ພົນຕໍາຫຼວດ ໃຫ້ສືບຕໍ່ຮັກສາມູນເຊື້ອ ແລະ ເອົາໃຈໃສ່ສູງໃນການປະຕິບັດໜ້າທີ່ວຽກງານໃຫ້ເຂັ້ມງວດ ຮັບປະກັນໄດ້ຄວາມສະຫງົບ ແລະ ປອດໄພ.
ຈາກນັ້ນ, ກໍໄດ້ຕິດຕາມເບິ່ງສະຖານທີ່ກັກຂັງ ແລະ ຊີວິດການເປັນຢູ່ຂອງນັກໂທດ, ຜູ້ຕ້ອງຫາ ແລະ ດັດສ້າງ ພ້ອມທັງມອບເຄື່ອງຊ່ວຍເຫຼືອຈໍານວນໜຶ່ງໃຫ້ແກ່ຄ້າຍຄຸມຂັງ-ດັດສ້າງ ນໍາອີກ.
#ໂດຍ:ນາລີວັນ