ວັນທີ 1 ສີງຫາ 2024 ທ່ານ ນາງ ພອນມະນີ​ ຂຽນໄຊຍະວົງ  ຮອງປະທານສະພາປະຊາຊົນແຂວງ ໄດ້ຕາງໜ້າໃຫ້ຄະນະປະຈຳສະພາປະຊາຊົນແຂວງ​ໄດ້ຂື້ນລາຍງານຕໍ່ກອງປະຊຸມ ກ່ຽວກັບການຈັດຕັ້ງປະຕິບັດເຄື່ອນໄຫວວຽກງານ​ 6​ ເດືອນ​ຕົ້ນປີ​ 2024​ ເຊິ່ງສາມາດຍາດໄດ້ຜົນສໍາເລັດຫຼາຍດ້ານດັ່ງນີ້:

1.). ດ້ານນິຕິກຳ

ຄະນະປະຈຳສະພາປະຊາຊົນແຂວງ ໄດ້ເອົາໃຈໃສ່ປະສານສົມທົບກັບຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ 17 ໃນການຈັດຕັ້ງປະຕິບັດ ພາລະບົດບາດ, ສິດ ແລະ ໜ້າທີ່ຂອງຕົນ ຢ່າງເປັນປົກກະຕິ ເປັນຕົ້ນແມ່ນ:

(1).  ສຳເລັດການປັບປຸງ ແລະ ຮຽບຮຽງຄືນບັນດາມະຕິທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ ຊຸດທີ II;

(2).   ຈັດກອງປະຊຸມທາບທາມປະກອບຄຳເຫັນໃສ່ຮ່າງກົດໝາຍ ໄດ້ທັງໝົດ 03 ຄັ້ງ ມີ 13 ກົດໝາຍ ໃນນີ້ ກົດໝາຍສ້າງໄໝ່ 02 ສະບັບ, ກົດໝາຍປັບປຸງໄໝ່ 11 ສະບັບ ແລະ ເຂົ້າຮ່ວມກອງປະຊຸມທາບທາມປະກອບຄຳເຫັນໃສ່ຮ່າງກົດໝາຍຕາມການເຊີນຂອງພາກສ່ວນທີ່ກ່ຽວຂ້ອງ ຈຳນວນ 06 ຄັ້ງ ແລະ ກອງປະຊຸມເຜີຍແຜ່ກົດໝາຍ ທັງໝົດ 02 ຄັ້ງ;

(3). ໄດ້ຈັດກອງປະຊຸມ ປະເມີນການຈັດຕັ້ງປະຕິບັດ ນິຕິກຳໃຕ້ກົດໝາຍຂອງແຂວງ ຈຳນວນ 02 ສະບັບຄື: (1) ຂໍ້ຕົກລົງຂອງທ່ານເຈົ້າແຂວງວ່າດ້ວຍ ການຄຸ້ມຄອງ ແລະ ການນຳໃຊ້ທີ່ດິນຂອງ ແຂວງອັດຕະປື ແລະ (2) ຂໍ້ຕົກລົງຂອງທ່ານເຈົ້າແຂວງວ່າດ້ວຍ ກອງທຶນຊ່ວຍເຫຼືອເຊີ່ງກັນ ແລະ ກັນ.

2.).   ດ້ານການຕົກລົງບັນຫາສຳຄັນພື້ນຖານຂອງທ້ອງຖິ່ນ.​

ຄະນະປະຈຳສະພາປະຊາຊົນແຂວງໄດ້ເອົາໃຈໃສ່ຊີ້ຄົ້ນຄວ້າບັນຫາສໍາຄັນພື້ນຖານຂອງທ້ອງຖີ່ນ ຕາມລັດຖະທຳມະນູນ,​ກົດໝາຍ ຢູ່ກອງປະຊຸມສະໄໝສາມັນຂອງສະພາປະຊາຊົນແຂວງ ແລະ ກອງປະຊຸມຄະນະປະຈຳສະພາປະຊົນຊົນແຂວງ ຊື່ງມີເນື້ອໃນ ດັ່ງນີ້:

(1).  ຜ່ານກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ ຊຸດທີ II, ໄດ້ພິຈາລະນາທັງໝົດ 09 ເນື້ອໃນ,​ ຮັບຮອງເປັນມະຕິ 07 ສະບັບ(ວຽກງານສະພາ 01 ສະບັບ,​ ວຽກງານອົງການປົກຄອງແຂວງ 02 ສະບັບ, ວຽກອົງການກວດສອບ ປະຈໍາພາກໃຕ້ 01 ສະບັບ,​ ວຽກອົງການກວດກາລັດແຂວງ 01 ສະບັບ,​ ວຽກອົງໄອຍະການປະຊາຊົນແຂວງ 01 ສະບັບ, ວຽກສານປະຊາຊົນແຂວງ 01 ສະບັບ);

(2).    ຜ່ານກອງປະຊຸມຄະນະປະຈຳສະພາປະຊາຊົນແຂວງ ຄະນະປະຈໍາສະພາປະຊາຊົນແຂວງໄດ້ຈັດກອງປະຊຸມ 06 ຄັ້ງ, ໄດ້ຄົ້ນຄວ້າພິຈາລະນາຕົກລົງເນື້ອໃນ 21 ເນື້ອໃນ(ວຽກສະພາປະຊາຊົນແຂວງ 14 ເນື້ອໃນ,​ ວຽກອົງການປົກຄອງແຂວງ 06 ເນື້ອໃນ,​ ວຽກສານປະຊາຊົນແຂວງ 01 ເນື້ອໃນ; ໃນນັ້ນ, ຮັບຮອງເປັນມະຕິ  07 ສະບັບຄື: ວຽກອົງການປົກຄອງແຂວງ 06 ສະບັບ, ວຽກສານປະຊາຊົນແຂວງ 01 ສະບັບ.

3.).  ດ້ານການຕິດຕາມກວດກາ

ເອົາໃຈໃສ່ໃນການປະຕິບັດພາລະບົດບາດ ຂອງຕົນໃນການລົງເຄື່ອນໄຫວຕິດຕາມກວດກາ, ​ຊຸກຍູ້ ແລະ ເກັບກຳຂໍ້ມູນວຽກງານຕ່າງໆ ຢູ່ແຂວງ, ເມືອງ ແລະ ເຂດໂຄງການລົງທຶນພັດທະນາຕ່າງໆ ໄດ້ທັງໝົດ 10 ຄັ້ງ,​ໃນນັ້ນ ຮ່ວມກັບກຳມາທິການຂອງສະພາແຫ່ງຊາດ 04 ຄັ້ງ,​ ຕາມແຜນຂອງຄະນະປະຈໍາສະພາປະຊາຊົນແຂວງ 06 ຄັ້ງ; ນອກນັ້ນ,​ຍັງໄດ້ຕິດຕາມກວດກາໂດຍຜ່ານກົນໄກການດໍາເນີນກອງປະຊຸມຂອງຂະແໜງການ 07 ຄັ້ງ; ຮັບ ແລະ ພິຈາລະນາແກ້ໄຂຄໍາຮ້ອງທຸກມທັງໝົດ 10 ເລື່ອງ, ຄ້າງມາແຕ່ປີ 2023 ມີ 05 ເລື່ອງ, ເຂົ້າໄໝ່ໃນປີ 2024 ມີ 05 ເລື່ອງ; ສົ່ງໃຫ້ພາກສ່ວນທີ່ກ່ຽວຂ້ອງຄົ້ນຄວ້າແກ້ໄຂ 08 ເລື່ອງ, ຍັງຄົ້ນຄວ້າ 02 ເລື່ອງ. ໃນນັ້ນ ຍັງບໍ່ໄດ້ຮັບການລາຍງານຜົນການແກ້ໄຂ; ໄດ້ຮັບສາຍດ່ວນໃນໄລຍະການດຳເນີນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ ຊຸດທີ II.  22 ສາຍ, ມີ 16 ເລື່ອງ, ໄດ້ຄົ້ນຄວ້າ ແລະ ສົ່ງໃຫ້ພາກສ່ວນກ່ຽວຂ້ອງແກ້ໄຂຈຳນວນ 16 ເລື່ອງ; ຕ້ອນຮັບ ແລະ ໃຫ້ຄຳປືກສາທາງດ້ານກົດໝາຍ ໃຫ້ແກ່ປະຊາຊົນທີ່ເຂົ້າມາທັງໝົດ 14 ຄັ້ງ,​ ມີຜູ້ເຂົ້າຮ່ວມທັງໝົດ 17 ຄົນ, ຍິງ 09 ຄົນ. ບັນຫາສ່ວນໃຫຍ່ແມ່ນ ກ່ຽວກັບ ຂໍ້ຂັດແຍ່ງທີ່ດິນ.

4.).  ການເຄື່ອນໄຫວຂອງໜ່ວຍຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ

ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດ ກອງປະຊຸມສະໄໝສາມັນເທື່ອ ທີ 6 ຂອງ ສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຊື່ງໄດ້ແບ່ງອອກເປັນ 06 ຄະນະລົງເຄື່ອນໄຫວຢູ່ໃນ 05 ເມືອງ ແລະ ພະແນກການອ້ອມຂ້າງແຂວງ, ຜ່ານການເຄື່ອນໄຫວຈັດຕັ້ງປະຕິບັດໄດ້ທັງໝົດ 37 ຈຸດ ໃນນັ້ນ: ຂັ້ນແຂວງປະຕິບັດໄດ້ 07 ຈຸດ (ມີພະແນກການອ້ອມຂ້າງແຂວງ, ທະນາຄານ, ໂຮງໝໍ, ໂຮງຮຽນ ແລະ 02 ກຳລັງ ປກຊ-ປກສ); ຂັ້ນເມືອງມີ 02 ຈຸດ ແລະ ບ້ານມີ 28 ຈຸດ, 44 ບ້ານ ປະຕິບັດໄດ້ 31% ຂອງຈໍານວນບ້ານທົ່ວແຂວງ, ມີຜູ້ເຂົ້າຮ່ວມທັງໝົດ 3,090 ຄົນ,​ ຍິງ 1,478 ຄົນ.

5.).  ການພົວພັນກັບອົງການອື່ນ

ເອົາໃຈໃສ່ປະສານສົມທົບກັບສະພາແຫ່ງຊາດ, ອົງການປົກຄອງແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ອົງການກວດສອບ-ກວດກາໃນການກະກຽມເນື້ອໃນກອງປະຊຸມສະໄໝສາມັນເທື່ອທີ 6,7 ຂອງສະພາປະຊາຊົນແຂວງ ຊຸດທີ II, ກອງປະຊຸມຄະນະປະຈໍາສະພາປະຊາຊົນແຂວງ, ການລົງຕິດຕາມກວດກາ ແລະ ການອອກນິຕິກຳຕ່າງໆ ແລະ ສ້າງທຸກເງື່ອນໄຂໃຫ້ອົງການແນວລາວສ້າງຊາດແຂວງ ແລະ ອົງການຈັດຕັ້ງມະຫາຊົນຂັ້ນແຂວງ ໃນການຕິດຕາມກວດກາການຈັດຕັ້ງປະຕິບັດສິດ ແລະ ໜ້າທີ່ ຂອງສະພາປະຊາຊົນແຂວງຕາມທີ່ໄດ້ກຳນົດໄວ້ໃນລັດຖະທໍາມະນູນ ແລະ ແລະ ກົດໝາຍ.

6.). ການເຄື່ອນໄຫວຕ່າງປະເທດ

ສໍາເລັດການຈັດກອງປະຊຸມຕອນຮັບ ຄະນະຜູ້ແທນຂັ້ນສູງ ສະພາປະຊາຊົນແຂວງ ກອນຕູມ ແຫ່ງ ສສ ຫວຽດນາມ ທີ່ໄດ້ມາເຄື່ອນໄຫວ ພົບປະຢຽມຢາມ ແລະ ແລກປ່ຽນບົດຮຽນກັບ ສະພາປະຊາຊົນແຂວງ ອັດຕະປື ໃນຫົວຂໍ້ການປະຕິບັດພາລະບົດບາດ ສິດ ແລະ ໜ້າທີ່ຂອງສະພາທາງດ້ານວິຊາການ.

(ວິນັດ)