(ສພຊ) – ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ຕາງໜ້າຄະນະປະຈຳສະພາແຫ່ງ ຊາດ ໄດ້ປະກອບຄຳເຫັນຕໍ່ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍມີບາງຄຳເຫັນເພື່ອໃຫ້ລັດຖະບານພິ ຈາລະນາຈັດຕັ້ງປະຕິບັດໃນຕໍ່ໜ້າ (ແຜນ ການປີ 2025) ດັ່ງນີ້:

1. ໃຫ້ເອົາໃຈໃສ່ຄົ້ນຄວ້າ, ວິເຄາະວິໄຈບັນຫາທີ່ຍັງເປັນຂໍ້ຄົງຄ້າງ, ເປັນອຸປະສັກ ແລະ ເປັນຂອດອຸດຕັນ ໃນການ ຈັດຕັ້ງປະຕິບັດວາລະແຫ່ງຊາດໃນໄລຍະຜ່ານມາ ໃຫ້ຮູ້ສາເຫດຢ່າງລະອຽດ, ຈະແຈ້ງ; ຈາກນັ້ນ ໃຫ້ກຳນົດວິທີການ ແລະ ມາດຕະການແກ້ໄຂ ໃຫ້ບັນລຸໃນລະດັບທີ່ແນ່ນອນ ຈຶ່ງຈະສ້າງໄດ້ກຳລັງແຮງອັນແທ້ຈິງໃຫ້ແກ່ການສືບຕໍ່ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນ ຫາຢາເສບຕິດ ແຕ່ນີ້ຫາປີ 2025 ໃຫ້ມີປະສິດທິພາບ ແລະ ປະສິດທິຜົນ.

2. ສືບຕໍ່ໂຄສະນາສ້າງຄວາມຮັບຮູ້ທາງດ້ານກົດໝາຍ ແລະ ຜົນຮ້າຍຂອງບັນຫາຢາເສບຕິດ ໃຫ້ທົ່ວເຖິງທຸກເປົ້າ ໝາຍໃນສັງຄົມ ໂດຍສະເພາະແມ່ນບັນດາເປົ້າໝາຍທີ່ເປັນກຸ່ມສ່ຽງ, ບ່ອນຫ່າງໄກສອກຫຼີກ, ທຸລະກັນດານ ໂດຍນຳໃຊ້ກຳລັງສັງ ລວມຂອງທົ່ວປວງຊົນ, ໃນນັ້ນ ສະຖາບັນຄອບຄົວ, ອົງການຈັດຕັ້ງພັກ-ລັດ, ອົງການຈັດຕັ້ງມະຫາຊົນ ແລະ ປະຊາຊົນບັນດາເຜົ່າທຸກຊັ້ນຄົນ ເປັນຫຼັກແຫຼ່ງ ຈຶ່ງຈະເຮັດໃຫ້ວຽກງານໂຄສະນາເຜີຍແຜ່ກົດໝາຍ, ຜົນຮ້າຍຂອງບັນຫາຢາເສບຕິດ ໄດ້ເຄື່ອນໄຫວຢ່າງແຂງແຮງ, ສັງຄົມມີການຫັນປ່ຽນຢ່າງແທ້ຈິງ.

3. ກວດກາຄືນບັນດາກົດໝາຍ ແລະ ນິຕິກໍາໃຕ້ກົດໝາຍທີ່ກ່ຽວຂ້ອງ ອັນໃດບໍ່ທັນມີ ຫຼື ບໍ່ສອດຄ່ອງ ໂດຍສະ ເພາະນິຕິກຳທີ່ເປັນບ່ອນອີງໃຫ້ແກ່ການຈັດຕັ້ງປະຕິບັດໂທດຕໍ່ຜູ້ກະທຳຜິດກ່ຽວກັບຢາເສບຕິດທີ່ເກີດຂຶ້ນໃໝ່ ໃຫ້ຂຸ້ນຂ້ຽວສ້າງ ຫຼື ປັບປຸງໃຫ້ສຳເລັດໂດຍໄວ ເພື່ອຮອງຮັບໃຫ້ແກ່ການຕັດສິນຄະດີເປັນໄປຕາມກົດໝາຍກຳນົດໄວ້.

4. ເອົາໃຈໃສ່ປັບປຸງ ແລະ ເຝິກອົບຮົມທັກສະດ້ານການເປັນມືອາຊີບ ໃຫ້ແກ່ກຳລັງ ປກສ ຫຼາຍຂຶ້ນ ແລະ ເປັນປົກກະຕິ, ຕໍ່ເນື່ອງ ໂດຍສະເພາະແມ່ນກຳລັງ ປກສ ຂັ້ນເມືອງ, ຂັ້ນບ້ານ; ສະໜອງງົບປະມານ, ປະກອບພາຫະນະ, ອຸປະກອນຮັບໃຊ້ທີ່ຈຳເປັນ ເພື່ອໃຫ້ເຂົາເຈົ້າມີຄວາມສາມາດ ແລະ ເປັນເຈົ້າຕົນເອງໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຢູ່ຂັ້ນຮາກຖານ ໃຫ້ມີປະສິດທິພາບ ແລະ ປະສິດທິຜົນຫຼາຍຂຶ້ນ.

5. ເອົາໃຈໃສ່ຕິດຕາມກວດກາ ແລະ ສຶກສາອົບຮົມປະຊາຊົນ ໂດຍສະເພາະຢູ່ເຂດຫ່າງໄກສອກຫຼີກ, ທຸລະກັນດານ ບໍ່ໃຫ້ລັກລອບປູກຝິ່ນ ແລະ ພືດທີ່ມີສານເສບຕິດ ທັງຊຸກຍູ້ສົ່ງເສີມ ແລະ ຊ່ວຍເຫຼືອໃຫ້ເຂົາເຈົ້າໄດ້ເຂົ້າຮ່ວມໃນໂຄງການປູກພືດທົດແທນໃຫ້ຫຼາຍຂຶ້ນ ແລະ ຫັນເປັນອາຊີບແບບຖາວອນໝັ້ນຄົງ, ພ້ອມທັງຕິດຕາມກວດກາດໍາເນີນມາດຕະການດ້ານກົດໝາຍ ຕໍ່ຜູ້ສະໜອງທຶນປູກຝິ່ນ ແລະ ພືດທີ່ມີສານເສບຕິດ ຢູ່ເບື້ອງຫຼັງ ຢ່າງເຂັ້ມງວດ.

6. ເພີ່ມທະວີຄວາມເປັນເຈົ້າການໃນການພົວພັນປະສານສົມທົບກັບບັນດາປະເທດໃກ້ຄຽງທີ່ມີຊາຍແດນຕິດຈອດກັບ ສປປລາວ ໂດຍສະເພາະແມ່ນປະເທດທີ່ຍັງມີພື້ນທີ່ ແລະ ມີຄວາມສ່ຽງໃນການຂົນສົ່ງ, ຄ້າ-ຂາຍ ແລະ ເປັນບ່ອນຜະລິດຢາເສບຕິດ ເພື່ອຊອກຫາວິທີແກ້ໄຂຮ່ວມ ກັນໃຫ້ຫຼາຍຂຶ້ນ.