(ສພຊ) ໃນວັນທີ 14 ທັນວາ 2022 ທີ່ຫໍສະພາແຫ່ງຊາດ ໄດ້ມີພິທີເຊັນບົດບັນທຶກວ່າດ້ວຍການຮ່ວມມື ແລະ ການປະສານງານ ລະຫວ່າງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ກັບກະຊວງອຸດສາຫະກຳ ແລະ ການຄ້າ ເຊິ່ງລົງນາມໂດຍທ່ານ ຮສ. ປອ. ລິນຄຳ ດວງສະຫວັນ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ແລະ ທ່ານ ມາໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ; ເຂົ້າຮ່ວມເປັນສັກຂີພິຍານມີທ່ານ ສົມມາດ ພົລເສນາ ຮອງປະທານສະພາແຫ່ງຊາດ ພ້ອມດ້ວຍບັນດາທ່ານປະທານ-ຮອງປະທານກຳມາທິການຕ່າງໆພາຍໃນສະພາແຫ່ງຊາດ, ພະນັກງານ-ລັດຖະກອນ ແລະ ພາກສ່ວນກ່ຽວຂ້ອງຂອງທັງສອງຝ່າຍເຂົ້າຮ່ວມຢ່າງພ້ອມພຽງ.

ໃນພິທີ, ທ່ານ ຮສ. ປອ. ລິນຄຳ ດວງສະຫວັນ ແລະ ທ່ານ ມາໄລທອງ ກົມມະສິດ ໄດ້ຜັດປ່ຽນກັນມີຄຳເຫັນຕໍ່ທີ່ປະຊຸມ ໂດຍທັງສອງຝ່າຍໄດ້ສະແດງຄວາມເຫັນດີເປັນເອກະພາບ, ຍິນດີ ແລະ ຊົມເຊີຍຕໍ່ການເຊັນບົດບັນທຶກການຮ່ວມມື ແລະ ການປະສານງານຂອງສອງຝ່າຍໃນຄັ້ງນີ້ ເຊິ່ງບົດບັນທຶກວ່າດ້ວຍການຮ່ວມມື ແລະ ການປະສານງານ ລະ ຫວ່າງ ກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ກັບ ກະຊວງອຸດສາຫະກຳ ແລະ ການຄ້າ ຖືວ່າເປັນບົດບັນທຶກສະບັບທຳອິດ ທີ່ສອງພາກສ່ວນໄດ້ລົງລາຍເຊັນຮ່ວມກັນເປັນລາຍລັກອັກສອນ ເຖິງວ່າ ໄລຍະຜ່ານມາ ກຳມາທິການ ແລະ ກະຊວງ ໄດ້ມີການພົວພັນ, ປະສານງານ ແລະ ເຮັດວຽກຮ່ວມກັນຢ່າງໃກ້ສິດ ໂດຍສະເພາະການຄົ້ນຄວ້າບັນຫາຕ່າງໆ ກ່ອນນຳເຂົ້າພິຈາລະນາໃນກອງປະຊຸມຄະນະປະຈຳສະພາແຫ່ງຊາດ, ກອງປະຊຸມສະໄໝສາ ມັນ, ສະໄໝວິສາມັນຂອງສະພາແຫ່ງຊາດ ແຕ່ກໍຍັງບໍ່ທັນມີນິຕິກຳສະເພາະທີ່ເປັນບ່ອນອີງ ໃນການພົວພັນປະສານງານເຊິ່ງກັນ ແລະ ກັນ.

ບົດບັນທຶກສະບັບດັ່ງກ່າວ ປະກອບມີ 4 ໝວດ ແລະ 15 ມາດຕາ ເຊິ່ງໄດ້ກຳນົດກ່ຽວກັບຫຼັກການ, ຂອບເຂດ, ລະບຽບການ, ເນື້ອໃນ, ຂັ້ນຕອນ, ວິທີການປະສານງານ ລະຫວ່າງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ກັບກະຊວງອຸດສາຫະກຳ ແລະ ການຄ້າ ໃນການຄົ້ນຄວ້າ, ປຶກສາຫາລື, ສະໜອງ ແລະ ແລກປ່ຽນຂໍ້ມູນຂ່າວສານ ໃນການກະກຽມເນື້ອໃນກອງປະຊຸມຄະນະປະຈຳສະພາແຫ່ງຊາດ, ກອງປະຊຸມສະພາແຫ່ງຊາດ ທີ່ຕິດພັນກັບວຽກງານອຸດສາຫະກຳ ແລະ ການຄ້າ ເຊິ່ງຈະເປັນການອໍານວຍຄວາມສະດວກ ໃຫ້ແກ່ການເຄື່ອນໄຫວວຽກງານຂອງສະພາແຫ່ງຊາດ ແລະ ລັດຖະບານ ຕາມພາລະບົດບາດ, ສິດ ແລະ ໜ້າທີ່ຂອງຕົນ ແນໃສ່ຮັບປະກັນການເປັນເສນາທິການໃຫ້ແກ່ຄະນະປະຈໍາສະພາແຫ່ງຊາດ ແລະ ຄະນະລັດຖະບານໃນການປະຕິບັດໜ້າທີ່ໃຫ້ມີປະສິດທິພາບ ແລະ ປະສິດທິຜົນ.

ພ້ອມກັນນີ້, ຍັງຈະເປັນເຄື່ອງມືໜຶ່ງປະກອບສ່ວນຊ່ວຍໃນການສ້າງຄວາມເຂັ້ມແຂງທາງດ້ານວິຊາການ ໃຫ້ແກ່ພະນັກງານ-ລັດຖະກອນຂອງທັງສອງຝ່າຍ ໃຫ້ມີຄວາມໃກ້ສິດ ສະໜິດສະໜົມ ແລະ ເພີ່ມຄວາມສາມັກຄີຮັກແພງ ລະຫວ່າງ 2 ພາກສ່ວນ ໃຫ້ຫຼາຍຂຶ້ນກວ່າເກົ່າ.

(ພາບ ແລະ ຂ່າວ: ນາງ ປາກາລັກ ພົມມີໄຊ)