(ສພຊ) – ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກແຕ່ປີ 2018 ຮອດປັດຈຸບັນ ແລະ ທິດທາງ 5 ປີຕໍ່ໜ້າຂອງໜ່ວຍແມ່ຍິງກົມເລຂານຸການ ໄດ້ຈັດຂຶ້ນໃນຕອນເຊົ້າວັນອັງຄານທີ 30 ກໍລະກົດຜ່ານມາ ທີ່ຫ້ອງຖະ ແຫຼງຂ່າວຂອງສະພາແຫ່ງຊາດ ພາຍໃຕ້ການເປັນປະທານຂອງສະຫາຍ ນາງ ກາບແກ້ວ ພິໄລສານ ຫົວໜ້າໜ່ວຍແມ່ ຍິງກົມເລຂານຸການ; ມີສະຫາຍ ຄຳສະໄໝ ສຳມາວົງ ຄະນະພັກຮາກຖານຄະນະເລຂາທິການສະພາແຫ່ງຊາດ (ຄລສ),ເລຂາໜ່ວຍພັກກົມເລຂານຸການ, ສະຫາຍ ນາງ ອຸດນາລີ ໄຊຍະສັກ ຄະນະບໍລິຫານງານສະຫະພັນແມ່ຍິງສະພາແຫ່ງຊາດ, ພ້ອມດ້ວຍຕາງໜ້າອົງການຈັດຕັ້ງມະຫາ ຊົນຂອງກົມ, ບັນດາສະຫາຍຄະນະໜ່ວຍແມ່ຍິງທີ່ຂຶ້ນກັບ ຄລສ ລວມຜູ້ເຂົ້າຮ່ວມທັງໝົດ 19 ສະຫາຍ ຍິງ 16 ສະຫາຍ.

ສະມາຊິກແມ່ຍິງພາຍໃນໜ່ວຍ 8 ສະຫາຍ ໄດ້ພິຈາລະນາ ແລະ ຮັບຮອງເອົາບົດສະຫຼຸບການເຄື່ອນໄຫວວຽກງານໄລຍະປີ 2018-2024 ແລະ ທິດທາງແຜນການ 5 ປີຕໍ່ໜ້າຂອງໜ່ວຍແມ່ຍິງກົມເລຂານຸການ, ບົດສໍາຫຼວດການນໍາພາລວມຂອງຄະນະໜ່ວຍແມ່ຍິງກົມເລຂານຸການ; ກອງປະຊຸມໄດ້ຜ່ານຂໍ້ຕົກລົງຮັບຮອງເອົາການແຕ່ງ ຕັ້ງຄະນະໜ່ວຍແມ່ຍິງກົມເລຂານຸການຊຸດໃໝ່ ເຊິ່ງແຕ່ງຕັ້ງສະຫາຍ ນາງ ກາບແກ້ວ ພິໄລສານ ເປັນຫົວໜ້າ, ສະ ຫາຍ ນາງ ໄພມະນີ ທໍາມະວົງ ເປັນຮອງຫົວໜ້າ, ສະຫາຍ ນາງ ຄອນສະຫວັນ ສີຫາປັນຍາ ເປັນຄະນະ.

ກອງປະຊຸມໄດ້ຮັບຟັງການໂອ້ລົມຈາກສະຫາຍ ຄຳສະໄໝ ສຳມາວົງ ເຊິ່ງໄດ້ມີຄຳເຫັນເນັ້ນໜັກໃຫ້ຄະນະ ແລະ ສະມາຊິກແມ່ຍິງພາຍໃນໜ່ວຍ ສືບຕໍ່ປະຕິບັດຕາມມະຕິ, ຄຳສັ່ງ, ກົດລະບຽບຕ່າງໆທີ່ສະຫະພັນແມ່ຍິງລາວວາງອອກ; ເພີ່ມທະວີການຄົ້ນຄວ້າເຊື່ອມຊຶມນິຕິກໍາກ່ຽວຂ້ອງຂົງເຂດວຽກງານຂອງຕົນໃຫ້ເລິກເຊິ່ງ ເພື່ອສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງວຽກງານ ໃຫ້ມີຄຸນນະພາບດີຂຶ້ນເລື້ອຍໆ; ເຂົ້າຮ່ວມຂະບວນການຂອງອົງການຈັດຕັ້ງມະຫາຊົນຢ່າງຫ້າວຫັນ ແລະ ຊຸກຍູ້ການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງແມ່ຍິງລາວ ຕິດພັນກັບຂໍ້ແຂ່ງຂັນ “ຮັກຊາດ ແລະ ພັດທະນາ” ໃຫ້ເປັນຂະບວນຟົດຟື້ນ.

(ອານຸສອນ ພູມມີທອນ)