ໜ່ວຍຮາກຖານສະຫະພັນແມ່ຍິງ (ສຍ) ສະພາປະຊາຊົນແຂວງ ເຊກອງໄດ້ຈັດພິທີປາຖະກະຖາວັນສ້າງຕັ້ງສະຫະພັນແມ່ຍິງລາວ ຄົບຮອບ 67 ປີ ໃນວັນທີ 19 ກໍລະກົດ 2022 ທີ່ສະໂມສອນສະພາປະຊາຊົນແຂວງ ໃຫ້ກຽດເຂົ້າຮ່ວມເປັນປະທານຂອງທ່ານ ປອ ແພງສີ ສີລາວີ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງ, ທ່ານ ນາງ ບຸນຮູ້ ດວງບຸບຜາ ປະທານໜ່ວຍສະຫະພັນແມ່ຍິງສະພາປະຊາຊົນແຂວງ, ມີຄະນະໜ່ວຍ ສຍ ພ້ອມດ້ວຍສະມາຊິກ ແລະ ແຂກທີ່ຖືກເຊີນເຂົ້າຮ່ວມ.      ທ່ານ ນາງ ບຸນຮູ້ ດວງບຸບຜາ ປະທານໜ່ວຍຮາກຖານ ສະຫະພັນແມ່ຍິງສະພາປະຊາຊົນ ແຂວງ ເຊກອງ ໄດ້ເລົ່າຄືນປະຫວັດການກຳເນີດ ແລະ ການເຕີບໃຫ່ຍຂະຫຍາຍຕົວຂອງແມ່ຍິງລາວ ນັບແຕ່ອະດີດຈົນເຖິງປັດຈຸບັນ ໂດຍຍົກໃຫ້ເຫັນບາງຕອນສຳຄັນວ່າ: ພາຍຫລັງທີ່ພັກປະຊາຊົນ ປະຕິວັດລາວ ໄດ້ຮັບການສ້າງຕັ້ງຂຶ້ນໃນວັນທີ 22 ມີນາ 1955 ພັກກໍໄດ້ເອົາໃຈໃສ່ປຸກລະດົມຂົນຂວາຍກໍ່ສ້າງແມ່ຍິງ ໃຫ້ມີຄວາມຕື່ນຕົວປະກອບສວ່ນໃນພາລະກິດປະຕິວັດ ແລະ ຖືແມ່ຍິງເປັນພາກສ່ວນໜຶ່ງໃນກຳລັງແຮງສຳຄັນຂອງພັກ, ຕົກມາຮອດວັນທີ 20 ກໍລະກົດ 1955 ພັກໄດ້ຈັດຕັ້ງຄົ້ນຄວ້າວຽກງານແມ່ຍິງ ຖືເປັນຕົ້ນກໍາເນີດຂອງອົງການຈັດຕັ້ງສະຫະ ພັນແມ່ຍິງລາວ.

ນັບແຕ່ມື້ສ້າງຕັ້ງເປັນຕົ້ນມາ ອົງການຈັດຕັ້ງແມ່ຍິງ ໄດ້ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນ, ເອົາໃຈໃສ່ປະຕິບັດໂຄງການດຳເນີນງານໃນການພັດທະນາ ແລະ ຍົກສູງບົດບາດຂອງເອື້ອຍນ້ອງແມ່ຍິງໃຫ້ສູງຂຶ້ນ; ໄດ້ ເຄື່ອນໄຫວຕາມພາລະບົດບາດ, ໜ້າທີ່ ໄດ້ກຳນົດໄວ້ໃນກົດລະບຽບຂອງຕົນ ຢ່າງແຂງແຮງເປັນຕົ້ນ ໄດ້ເອົາໃຈໃສ່ປະຕິບັດໂຄງການດຳເນີນງານ ໃນການພັດທະນາ ແລະຍົກສູງບົດບາດ, ໂຄງການດຳເນີນງານຂອງຕົນ ແລະໄດ້ປັບປຸງ ໃຫ້ສອດຄ່ອງກັບຄວາມຮຽກຮ້ອງຕ້ອງການໜ້າທີ່ການເມືອງຂອງພັກໃນແຕ່ລະໄລຍະ. ພ້ອມທັງເຮັດໜ້າທີ່ເບິ່ງແຍງ, ລ້ຽງດູ, ຕິດຕໍ່, ສົ່ງຂ່າວ-ເອກະສານ ໃຫ້ທະຫານທີ່ປະຕິບັດໜ້າທີ່ຢູ່ແນວໜ້າ ແລະໃນເຂດຄວບຄຸມຂອງສັດຕູ, ເຕົ້າໂຮມຄວາມສາມັກຄີ, ສຶກສາອົບຮົມ ແລະ ປຸກລະ ດົມ ຂົນຂວາຍແມ່ຍິງ ລາວບັນດາເຜົ່າ ເຂົ້າເປັນກຳລັງແຮງໃຫ້ແກ່ການປະຕິວັດປົດປ່ອຍຊາດຢ່າງມີຄວາມກ້າຫານ.

           ຈາກນັ້ນ, ກໍໄດ້ຮັບຟັງກ່ຽວກັບການຈັດຕັ້ງປະຕິບັດວຽກງານຂອງໜ່ວຍ ສຍ ສະພາປະຊາຊົນແຂວງ ປະຈໍາ 6 ເດືອນຕົ້ນປີ 2022 ແລະ ທິດທາງແຜນການຈັດຕັ້ງປະຕິບັດວຽກງານ ປະຈໍາ 6 ເດືອນທ້າຍປີ 2022 ຈາກທ່ານ ນາງ ແກ້ວໄພລິນ ດາລາລັດສະໝີ ຮອງປະທານໜ່ວຍຮາກຖານ ສຍ ສະພາປະຊາຊົນແຂວງນໍາອີກ.

ໂອກາດດັ່ງກ່າວ, ທ່ານ ປອ ແພງສີ ສີລາວີ ໄດ້ໃຫ້ກຽດໂອ້ລົມ ເຊິ່ງທ່ານໄດ້ເນັ້ນໃຫ້ຄະນະພັກ, ອົງການຈັດຕັ້ງມະຫາຊົນ ຕ້ອງໄດ້ເອົາໃຈໃສ່ໃນການສ້າງ ແລະ ເອື້ອອຳນວຍຄວາມສະດວກໃຫ້ແກ່ແມ່ຍິງ, ກ້າມອບວຽກໃຫ້ແມ່ຍິງ, ສະໜັບສະໜູນໃຫ້ແມ່ຍິງໄດ້ຮັບການພັດທະນາໃນທຸກດ້ານ, ຄະນະສະຫະພັນແມ່ຍິງ ແລະ ເອື້ອຍນ້ອງແມ່ຍິງທຸກຄົນ ຕ້ອງໄດ້ບຸກບືນພັດທະນາຕົນເອງໃນທຸກດ້ານ ໃຫ້ແຂງແຮງຂຶ້ນກວ່າເກົ່າ, ຫັນປ່ຽນແນວຄິດຄອງເດີມ, ຫັນປ່ຽນແບບແຜນວິທີເຮັດວຽກ, ເພີ່ມຄວາມຮັບຜິດຊອບ ແລະປະສິດທິຜົນໃນການແກ້ໄຂບັນຫາ, ປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນຖັນແຖວແມ່ຍິງ, ຄອບຄົວ, ສັງຄົມ ແນໃສ່ເຮັດໃຫ້ຂະບວນການແມ່ຍິງເຕີບໃຫຍ່ຂະຫຍາຍຕົວທາງດ້ານ ປະລິມານ ແລະຄຸນນະພາບ.

#ໂດຍ: ນາລີວັນ