ກອງປະຊຸມສະຫຼຸບການຈັດຕັ້ງປະຕິບັດຂະບວນການແຂ່ງຂັນ 3 ດີ ປະຈໍາປີ 2023 ຂອງໜ່ວຍຮາກຖານສະຫະພັນແມ່ຍິງສະພາປະຊາຊົນແຂວງ ໄດ້ຈັດຂື້ນໃນວັນທີ 26 ຕຸລາ 2023. ທີ່ຫ້ອງປະຊຸມສະພາປະຊາຊົນແຂວງ ໂດຍການເຂົ້າຮ່ວມເປັນຄະນະປະທານຂອງສະຫາຍ ນາງ ມີນາພອນ ໄຊສົມພູ ຮອງເລຂາພັກແຂວງ, ປະທານສະພາປະຊາຊົນແຂວງ,​ ສະຫາຍ ນາງ ແສງອາລຸນ ວົງສາທິການ ປະທານໜ່ວຍຮາກຖານສະຫະພັນແມ່ຍິງສະພາປະຊາຊົນແຂວງ ແລະ ສະຫາຍ ນາງ ກົງຕາ ໂພສາລາດ ຮອງປະທານສະຫະພັນແມ່ຍິງແຂວງ, ມີບັນດາທ່ານຄະນະພັກ, ອົງການຈັດຕັ້ງມະຫາຊົນ, ສະມາຊິກສະຫະພັນແມ່ຍິງສະພາປະຊາຊົນແຂວງ ແລະ ແຂກທີ່ຖືກເຊີນເຂົ້າຮ່ວມ 19 ສະຫາຍ.

ໃນກອງປະຊຸມ ສະຫາຍ​ ນາງ ແສງອາລຸນ ວົງສາທິການ ໄດ້ຜ່ານບົດສະຫຼຸຸບການຈັດຕັ້ງປະຕິບັດຂະບວນການແຂ່ງຂັນ 3 ດີ ປີ 2023 ແລະ ທິດທາງແຜນການປີ 2024 ຂອງໜ່ວຍສະຫະພັນແມ່ຍິງສະພາປະຊາຊົນແຂວງ ເຊິ່ງໄດ້ເຜີຍແຜ່ເຊື່ອມເອກະສານເນື້ອໃນ ຂໍ້ແຂ່ງຂັນ 3 ດີ: ພົນລະເມືອງດີ, ພັດທະນາດີ ແລະ ສ້າງຄອບຄົວດີໃຫ້ກັບເອື້ອຍນ້ອງແມ່ຍິງພາຍໃນໜ່ວຍກໍ່ຄືສະມາຊິກແຕ່ລະສະຫາຍ ກໍ່ໄດ້ເອົາໃຈໃສ່ ແລະ ມີຄວາມຕັດສິນໃຈສູງຕໍ່ກັບໜ້າທີ່ວຽກງານທີ່ຕົນຮັບຜິດຊອບ, ພ້ອມນັ້ນໄດ້ມອບໃບຍ້ອງຍໍໃຫ້ບຸກຄົນດີເດັ່ນ ໂດຍອີງໃສເນື້ອໃນຂໍ້ແຂ່ງຂັນ 3 ດີ ຕິດພັນກັບວຽກງານວີຊາສະເພາະ ສາມາດຍາດໄດ້ປະເພດ I ຈໍານວນ 23 ສະຫາຍ,ເທົ່າກັບ100% ແລະ ມອບໃບຢັ້ງຍືນໜ່ວຍ 3 ດີ ແລະ ສືບຕໍ່ຈັບມືແຂ່ງຂັນສູ້ຊົນແຜນແຂ່ງຂັນ 3 ດີຮອບຕໍ່ໄປ.
ຕອນທ້າຍ, ຄະນະປະທານກອງປະຊຸມໄດ້ມີຄໍາເຫັນໂອ້ລົມໄດ້ສະແດງຄວາມຍ້ອງຍໍຊົມເຊີຍຜົນງານຫຼາຍດ້ານທີ່ຍາດມາໄດ້ໃນໄລຍະຜ່ານ​ ຄຽງຄູ່ກັນນີ້ໃຫ້ໜ່ວຍຮາກຖານສະຫະພັນແມ່ຍິງສະພາປະຊາຊົນແຂວງສືບຕໍ່ນໍາພາສະມາຊິກພາຍໃນໜ່ວຍໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີໃຫ້ມີລັກສະນະຟົດຟື້ນສືບຕໍ່ຜັນຂະຫຍາຍວຽກງານໃນຕໍ່ໜ້າໃຫ້ກາຍເປັນແຜນງານອັນລະອຽດ ແລະ ສຶກສາອົບຮົມເອື້ອບນ້ອງພາຍໃນໜ່ວຍແມ່ຍິງໃຫ້ເປັນພົນລະເມືອງດີກາຍເປັນສະມາຊິກທີ່ມີຄຸນທາດການເມືອງໜັກແໜ້ນ, ຫັນເອົາແນວທາງຂອງພັກ-ລັດໃຫ້ເລິກເຊີ່ງ ແລະ ມີການພັດທະນາດີ, ພັດທະນາຕົນເອງໃຫ້ມີຄວາມຮູ້, ຄວາມສາມາດຈໍາແນກໄໄດ້ມິດສັດຕູ, ພັດທະນາຄອບຄົວ ສືບຕໍ່ສ້າງສາພັດທະນາຄອບຄົວໃຫ້ຫຼຸດພົ້ນທຸກ, ມີຄວາມຜາສຸກ, ຄອບຄົວອົບອຸ່ນ ເປັນແບບຢ່າງໃຫ້ແກ່ສັງຄົມ, ສ້າງໃຫ້ເອື້ອຍນ້ອງແມ່ຍິງເປັນຄົນດີ, ເກັ່ງ ແລະ ທັນສະໄໝ ສືບຕໍ່ປະຕິບັດວຽກງານວິຊາສະເພາະ ຂອງຕົນດ້ວຍຄວາມຮັບຜິດຊອບສູງ.