(ສພຊ) ວັນທີ 13 ກັນຍາ 2021 ທີ່ສະພາແຫ່ງຊາດ, ກອງປະຊຸມໃຫຍ່ ຄັ້ງທີ II ຂອງໜ່ວຍພັກຮາກຖານກຳມາທິການຍຸຕິທຳ (ກມຍທ) ສະພາແຫ່ງຊາດ ໄດ້ໄຂຂຶ້ນ ແລະ ອັດລົງດ້ວຍຜົນສຳເລັດອັນຈົບງາມ ພາຍໃຕ້ການເຂົ້າຮ່ວມຂອງສະຫາຍ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ເລຂາຄະນະບໍລິຫານງານພັກສະພາແຫ່ງຊາດ, ປະທານສະພາແຫ່ງຊາດ ໂດຍການເປັນປະທານກອງປະຊຸມຂອງສະຫາຍ ຄຳແພງ ວິລະພັນ ຮັກສາການເລຂາໜ່ວຍພັກຮາກຖານ ກມຍທ; ເຂົ້າຮ່ວມມີສະຫາຍຮັກສາການຮອງເລຂາໜ່ວຍພັກ, ຮັກສາການກຳມະການໜ່ວຍພັກ, ຜູ້ຕາງໜ້າຈາກຫ້ອງການຊ່ວຍວຽກງານບໍລິຫານພັກສະພາແຫ່ງຊາດ, ຜູ້ຕາງໜ້າຈາກອົງການຈັດຕັ້ງມະຫາຊົນ, ສະມາຊິກພັກສົມບູນ-ສຳຮອງ, ສະມາຊິກພັກອະວຸໂສບຳນານພາຍໃນໜ່ວຍພັກ ແລະ ແຂກຖືກເຊີນ.
ກອງປະຊຸມໄດ້ຮັບຟັງບົດລາຍງານການເມືອງຂອງໜ່ວຍພັກ ແລະ ທິດທາງແຜນການໃນຕໍ່ໜ້າ; ຈາກນັ້ນ ຍັງໄດ້ຮັບຟັງ ບົດສຳຫລວດການນຳພາຂອງຄະນະໜ່ວຍພັກຮາກຖານ ກມຍທ ຊຸດເກົ່າ. ພ້ອມນັ້ນ, ຜູ້ແທນສົມບູນຂອງກອງປະຊຸມຍັງໄດ້ສຸມໃສຄົ້ນຄວ້າຢ່າງເລິກເຊິ່ງໃນການນຳໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະໜ່ວຍພັກຮາກຖານ ກມຍທ ຊຸດໃໝ່ ບົນພື້ນຖານຫລັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ໄດ້ກຳນົດໄວ້ ໂດຍມີຜູ້ສະໝັກຮັບເລືອກຕັ້ງ 7 ສະຫາຍ ຍິງ 3 ສະຫາຍ ແລະ ເລືອກໄດ້ຄະນະພັກຊຸດໃໝ່ ຈໍານວນ 5 ສະຫາຍ ຍິງ 1 ສະຫາຍ; ກອງປະຊຸມຄັ້ງປະຖົມມະລືກຂອງໜ່ວຍພັກຮາກຖານ ກມຍທ ຊຸດທີ II ໄດ້ເຫັນດີເລືອກເອົາຄະນະໜ່ວຍພັກຊຸດໃໝ່ຄື: ສະຫາຍ ຄຳແພງ ວິລະພັນ ເປັນເລຂາ, ສະຫາຍ ສີສູນທອນ ສ.ຜາບມີໄຊຍ໌ ເປັນຮອງເລຂາ, ສະຫາຍ ຄຳປະສົງ ລາດຊະຈັກ ເປັນປະທານກວດກາ, ສະຫາຍ ນາງ ກັນທິນາ ປ້ານອິນຫວນ ເປັນຮອງປະທານກວດກາ ແລະ ສະຫາຍ ໄກມະນິນ ເທບບົວລີ ເປັນກຳມະການກວດກາ. ນອກນັ້ນ, ກອງປະຊຸມຍັງໄດ້ເລືອກຕັ້ງຜູ້ແທນສົມບູນ-ສໍາຮອງ ທີ່ຈະເຂົ້າຮ່ວມກອງປະຊຸມໃຫຍ່ ຄັ້ງທີ IV ຂອງອົງຄະນະພັກສະພາແຫ່ງຊາດ, ເຊິ່ງມີຜູ້ສະໝັກຮັບເລືອກຕັ້ງເປັນຜູ້ແທນສົມບູນ, ສຳຮອງຂອງໜ່ວຍພັກຮາກຖານ ກມຍທ ທັງໝົດ 17 ສະຫາຍ, ເລືອກເອົາ 14 ສະຫາຍ.
ກອງປະຊຸມເຫັນດີເປັນເອກະພາບຮັບຮອງເອົາບົດລາຍງານການເມືອງຂອງໜ່ວຍພັກຮາກຖານໃນໄລຍະຜ່ານມາ ແລະ ຮັບຮອງເອົາທິດທາງແຜນການຕໍ່ໜ້າ (2021-2025) ເຊິ່ງຈະສຸມໃສ່ບັນດາວຽກງານຄື: ສຶກສາອົບຮົມການເມືອງແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ ມີທັດສະນະຫລັກໝັ້ນການ ເມືອງໜັກແໜ້ນ, ມີຄວາມເປັນເອກະພາບສູງຕໍ່ແນວທາງນະໂຍບາຍຂອງພັກ, ຄວາມເປັນແບບຢ່າງ, ຄວາມຮັບຜິດຊອບການເມືອງ, ຈົງຮັກພັກດີຕໍ່ພັກ, ປະເທດຊາດ ແລະ ປະຊາຊົນ, ຍຶດໝັ້ນອຸດົມການສັງຄົມນິຍົມ, ສືບຕໍ່ຮັກສາຄວາມສາມັກຄີພາຍໃນ ເພື່ອພ້ອມກັນຈັດຕັ້ງປະຕິບັດແນວທາງນະໂຍບາຍຂອງພັກ, ລັດ ໃຫ້ເຂັ້ມງວດ ແລະ ມີຜົນສັກສິດຫຍິ່ງຂຶ້ນ; ກໍ່ສ້າງ, ປັບປຸງພາຍໃນໜ່ວຍພັກໃຫ້ໜັກແໜ້ນ, ເຂັ້ມແຂງທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນນໍາພາ, ສ້າງໜ່ວຍພັກ ໃຫ້ກາຍເປັນໜ່ວຍພັກ ປອດໃສ, ເຂັ້ມແຂງ ໜັກແໜ້ນ ໃຫ້ໄດ້ຢ່າງຕໍ່ເນື່ອງ, ສ້າງມະຫາຊົນກ້າວໜ້າ ເຂົ້າເປັນສະມາຊິກພັກ ໃຫ້ກວມເອົາ 80% ຂອງຈໍານວນພະນັກງານທັງໝົດທີ່ຂຶ້ນກັບກໍາມາທິການ; ປັບປຸງກົງຈັກການຈັດຕັ້ງລັດ, ຂັ້ນກົມ, ພະແນກ ແລະ ກໍານົດຕໍາແໜ່ງງານໃຫ້ຈະແຈ້ງ ບົນພື້ນຖານກົງຈັກການຈັດຕັ້ງກະທັດຮັດ ເຂັ້ມແຂງ. ພ້ອມນັ້ນ, ກໍບັນຈຸ, ຊັບຊ້ອນພະນັກງານເຂົ້າໃສ່ແຕ່ລະຕໍາແໜ່ງງານໃຫ້ເໝາະສົມ, ນໍາພາປັບປຸງອົງການຈັດຕັ້ງມະຫາຊົນ ໃຫ້ເປັນກໍາລັງແຮງຂອງພັກ ໃນການສ້າງຂະບວນການຕ່າງໆ ເພື່ອຈັດຕັ້ງປະຕິບັດໜ້າທີ່ການເມືອງຂອງໜ່ວຍພັກ ແລະ ກໍາມາທິການ ໃຫ້ເປັນຂະບວນຟົດຟື້ນ, ເຮັດສໍາເລັດໜ້າທີ່ໃນການເປັນເສນາທິການໃຫ້ຄະນະພັກ ແລະ ຄະນະປະຈໍາສະພາແຫ່ງຊາດ; ຍົກສູງບົດບາດການນໍາພາ-ຊີ້ນໍາວຽກງານວິຊາສະເພາະຂອງກໍາມາທິການ ກໍຄືການເຄື່ອນໄຫວວຽກງານໃນຂົງເຂດຍຸຕິທໍາ ຕາມທິດຫັນປ່ຽນຢ່າງເປັນລະບົບ, ເຂັ້ມແຂງ, ໜັກແໜ້ນ ແລະ ມີຄຸນນະພາບ, ສູ້ຊົນສ້າງ ແລະ ປັບປຸງກົດໝາຍຂົງເຂດຍຸຕິທໍາ ຕາມແຜນການສ້າງ ແລະ ປັບປຸງກົດໝາຍ 5 ປີ ຂອງສະພາແຫ່ງຊາດ ທີ່ກໍານົດໄວ້; ເພີ່ມທະວີການຕິດຕາມກວດກາ ການປະຕິບັດໜ້າທີ່ຂອງບັນດາອົງການໃນລະບົບການດໍາເນີນຄະດີຕາມຂະບວນການຍຸຕິທໍາ ໃນແຕ່ລະໄລຍະຕາມສະພາບ ແລະ ເງື່ອນໄຂຕົວຈິງ ເພື່ອເຮັດໃຫ້ທຸກອົງການຈັດຕັ້ງ ຫັນໄປສູ່ການຄຸ້ມຄອງລັດດ້ວຍກົດໝາຍເທື່ອລະກ້າວ; ສູ້ຊົນແກ້ໄຂຄໍາຮ້ອງຂໍຄວາມເປັນທຳໃຫ້ຖືກຕ້ອງ ແລະ ວ່ອງໄວ ໃຫ້ບັນລຸ 85% ຂອງຄໍາຮ້ອງເຂົ້າມາໃນໄລຍະ 5 ປີ.
ກອງປະຊຸມຍັງໄດ້ເປັນກຽດຮັບຟັງການໂອ້ລົມຂອງສະຫາຍ ປອ. ໄຊສົມພອນ ພົມວິຫານ ເຊິ່ງສະຫາຍໄດ້ຕີລາຄາສູງຕໍ່ໝາກຜົນແຫ່ງການນໍາພາ-ຊີ້ນໍາຂອງຄະນະໜ່ວຍພັກຮາກຖານ ກໍາມາທິການຍຸຕິທໍາ ທີ່ໄດ້ມີຄວາມພະຍາຍາມສູ້ຊົນຜ່ານຜ່າ ຄວາມຫຍຸ້ງຍາກ ແລະ ສິ່ງທ້າຍທາຍຫລາຍດ້ານ ເປັນຕົ້ນແມ່ນວຽກງານກໍ່ສ້າງ ແລະ ຂະຫຍາຍພັກ ໄດ້ຮັບການປັບປຸງຕາມທິດເຂົ້າສູ່ຄຸນນະພາບ; ກຳມາທິການຍຸຕິທຳໄດ້ຮັບໝາກຜົນສູງໃນການຕິດຕາມກວດກາ ການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກໍາໃຕ້ກົດໝາຍຂອງອົງການໄອຍະການປະຊາຊົນ, ສານປະຊາຊົນ, ອົງການປະຕິບັດຄຳຕັດສິນຂອງສານ ແລະ ອົງການສະກັດກັ້ນ ແລະ ຕ້ານການສໍ້ລາດບັງຫລວງ ເຊິ່ງນອນໃນຄວາມຮັບຜິດຊອບໄດ້ເປັນຢ່າງດີ. ພ້ອມນັ້ນ, ສະຫາຍຍັງໄດ້ເນັ້ນໜັກໃຫ້ເພີ່ມທະວີການນໍາພາຂອງຄະນະໜ່ວຍພັກ ຕໍ່ວຽກງານສຶກສາອົບຮົມການເມືອງ-ແນວຄິດ ໃຫ້ພະນັກງານ, ສະມາຊິກພັກ ຢ່າງເປັນລະບົບປົກກະຕິຕໍ່ເນື່ອງ ເພື່ອກໍາແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມະຕິຄໍາສັ່ງຂອງຂັ້ນເທິງ ເພື່ອແນໃສ່ຮັບປະກັນໃຫ້ສະມາຊິກພັກ-ພະນັກງານ ກຳແໜ້ນ ແລະ ເຊື່ອມຊືມ, ພ້ອມທັງນຳໄປຈັດຕັ້ງປະຕິບັດຂະຫຍາຍໃຫ້ຮັບໝາກຜົນຈິງ ທັງປັບປຸງຄວາມຮູ້ທາງດ້ານທິດສະດີການເມືອງ, ມີລະດັບຄວາມຮູ້ທາງດ້ານວິຊາການທີ່ຕົນເອງຮັບຜິດຊອບ, ມີຄວາມສາມາດນໍາພາດ້ານຕ່າງໆ ໃນລະດັບອັນແນ່ນອນ; ໂດຍສະເພາະແມ່ນ ຕ້ອງສ້າງໃຫ້ສະມາຊິກພັກ-ພະນັກງານ ມີການຫັນປ່ຽນຢ່າງຕັ້ງໜ້າ ໃນແບບແຜນວິທີນຳພາ, ຄວາມເປັນແບບຢ່າງນຳໜ້າໃນທຸກດ້ານຂອງສະມາຊິກພັກ ໃນນີ້ ໃຫ້ຖືສໍາຄັນ ບຸກທະລຸທາງດ້ານຈິນຕະນາການ ເພື່ອແກ້ໄຂຂອດຂັ້ນທີ່ເປັນສິ່ງອຸດຕັນ, ແນວຄິດເອື່ອຍອີງ, ຈຸ້ມເຈື້ອ, ຂີ້ຄ້ານມັກງ່າຍ ແລະ ຄວາມບໍ່ໂປ່ງໃສຂອງສະມາຊິກພັກ-ພະນັກງານ ໃຫ້ນັບມື້ດີຂຶ້ນເທື່ອລະກ້າວ; ສືບຕໍ່ປັບປຸງກົງຈັກຂອງກໍາມາທິການ ໃຫ້ມີຄວາມກະທັດຮັດ, ສົມເຫດສົມຜົນ, ມີຄວາມເຂັ້ມແຂງ ສາມາດເຄື່ອນໄຫວໄດ້ຢ່າງມີປະສິດທິພາບ ແລະ ມີປະສິດທິຜົນ ໂດຍສະເພາະແມ່ນ ການປະຕິບັດ 3 ພາລະບົດບາດ ຂອງກໍາມາທິການ, ໃນນີ້ ໃຫ້ເອົາໃຈໃສ່ ເຂົ້າຮ່ວມແຕ່ຫົວທີ່ ໃນຂະບວນການສ້າງ ແລະ ປັບປຸງກົດໝາຍ ຂົງເຂດຍຸຕິທໍາ ເພື່ອປະກອບສ່ວນເຂົ້າໃນການຄຸ້ມຄອງລັດ ຄຸ້ມຄອງເສດຖະກິດ ດ້ວຍກົດໝາຍຢ່າງເຂັ້ມງວດ; ສືບຕໍ່ເອົາໃຈໃສ່ຍົກສູງຂີດຄວາມສາມາດທາງດ້ານປະລິມານ ແລະ ຄຸນນະພາບ ໃຫ້ແກ່ພະນັກງານ, ສະມາຊິກພັກ ລວມທັງບັນດາສະມາຊິກສະພາແຫ່ງຊາດທີ່ສັງກັດກໍາມາທິການຍຸຕິທໍາ ໃຫ້ມີຄວາມຮູ້ຄວາມສາມາດ, ມີຄວາມສີວິໄລທາງດ້ານຈິດໃຈ, ມີແນວຄິດຮັກຊາດ, ຮັກລະບອບໃໝ່, ຍົກລະດັບຄຸນນະພາບການບໍລິການໃຫ້ຄໍາປຶກສາ ແລະ ຄົ້ນຄວ້າແກ້ໄຂຄໍາຮ້ອງຂໍຄວາມເປັນທໍາຂອງປະຊາຊົນ ໃຫ້ມີຄຸນນະພາບດີຂຶ້ນກວ່າເກົ່າ, ເພີ່ມທະວີການນໍາພາວຽກງານກໍ່ສ້າງພັກ-ກໍ່ສ້າງພະນັກງານໃຫ້ເລິກເຊິ່ງກວ່າເກົ່າ ແລະ ມີບາດກ້າວຫັນປ່ຽນອີ່ຫລີ ໂດຍສຸມໃສ່ປັບປຸງກໍ່ສ້າງພັກ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ທາງດ້ານການເມືອງແນວຄິດ, ການຈັດຕັ້ງ ແລະ ແບບແຜນນໍາພາ ໃຫ້ສາມາດເປັນແກນນໍາ ນໍາພາວຽກງານວິຊາສະພາຂອງກໍາມາທິການ; ຍົກສູງຄຸນທາດການເມືອງ, ຄຸນສົມບັດສິນທໍາປະຕິວັດ, ຄວາມຈົ່ງຮັກພັກດີ, ເປັນແບບຢ່າງນໍາໜ້າ ຂອງສະມາຊິກພັກ-ພະນັກງານ ໃຫ້ສູງຂຶ້ນກວ່າເກົ່າ, ເປັນຕົ້ນພະນັກງານ-ສະມາຊິກພັກທີ່ເຮັດວຽກໃນຂົງເຂດນີ້ ຕ້ອງມີຈັນຍາບັນສູງສົ່ງ, ບໍ່ເຫັນແກ່ຕົວ, ຮັບໃຊ້ປະຊາຊົນໂດຍບໍ່ມີເງື່ອນໄຂໃດໆ ຍຶດໝັ້ນການນໍາພາຕາມຫລັກການລວມສູນປະຊາທິປະໄຕ, ນໍາພາເປັນໝູ່ຄະນະ, ບຸກຄົນຮັບຜິດຊອບ, ເຕົ້າໂຮມຄວາມສາມັກຄີໃຫ້ດີໃນໜູ່ຄະນະ; ສະເໜີໃຫ້ຄະນະພັກຊຸດໃໝ່ສຸມໃສ່ຈັດຕັ້ງຜັນຂະຫຍາຍທິດທາງແຜນການ 5 ປີ ຂອງສະພາແຫ່ງຊາດ, ມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກສະພາແຫ່ງຊາດ ກໍຄື 4 ຄາດໝາຍ ແລະ ທິດທາງແຕ່ລະດ້ານຂອງໜ່ວຍພັກວາງອອກ ໃຫ້ເປັນແຜນງານໂຄງການອັນລະອຽດຂອງກໍາມາທິການ, ໄປຄວບຄູ່ກັບ ການຈັດຕັ້ງເຜີຍແຜ່, ເຊື່ອມຊຶມຜົນຂອງກອງປະຊຸມໃນຄັ້ງນີ້ ໃຫ້ຖັນແຖວສະມາຊິກພັກ, ພະນັກງານ-ລັດຖະກອນ ເພື່ອສຸມໃສ່ຈັດຕັ້ງປະຕິບັດໃຫ້ມີໝາກຜົນເປັນຢ່າງດີ.
(ກົງທະນູຄຳ ພິພັດເສລີ)