ຕອນເຊົ້າວັນທີ 3 ຕຸລາ 2023 ຢູ່ຫ້ອງປະຊຸມສະພາປະຊາຊົນແຂວງ, ໜ່ວຍພັກສະພາປະຊາຊົນແຂວງອຸດົມໄຊ ໄດ້ເຜີຍແຜ່ເອກະສານ ປະເມີນຜົນການຈັດຕັ້ງປະຕິບັດໜ້າທີ່ວຽກງານ ຂອງພະນັກງານ – ລັດຖະກອນ ປະຈໍາປີ 2023, ໂດຍການເປັນປະທານຂອງສະຫາຍ ທອງຄານ ວັດສະດາກອນ ເລຂາໜ່ວຍພັກສະພາປະຊາຊົນແຂວງ, ມີຄະນະພັກ, ສະມາຊິກພັກສົມບູນ ແລະ ສໍາຮອງ ພາຍໃນໜ່ວຍພັກສະພາປະຊາຊົນແຂວງເຂົ້າຮ່ວມ.

ບັນດາເອກະສານທີ່ນໍາມາເຜີຍແຜ່ໃນຄັ້ງນີ້ປະກອບມີ: ຄໍາແນະນໍາເລກທີ 939/ອຊ, ລົງວັນທີ 3 ຕຸລາ 2022 ກ່ຽວກັບການປະເມີນຜົນການຈັດຕັ້ງປະຕິບັດໜ້າທີ່ວຽກງານ ຂອງພະນັກງານ – ລັດຖະກອນ ຕິດພັນກັບການແຂ່ງຂັນ ແລະ ຍ້ອງຍໍປະຈໍາປີ; ແຈ້ງການຂອງພະແນກພາຍໃນແຂວງ ເລກທີ 1033/ພນຂ, ລົງວັນທີ 25 ສິງຫາ 2023 ກ່ຽວກັບການປະເມີນຜົນການຈັດຕັ້ງປະຕິບັດໜ້າທີ່ວຽກງານ ຂອງພະນັກງານ – ລັດຖະກອນ ປະຈໍາປີ 2023 ແລະ ເອກະສານກ່ຽວກັບການປະເມີນໜ່ວຍພັກປອດໃສ, ເຂັ້ມແຂງ ປະຈໍາປີ 2023 ແລະ ອື່ນໆ.

 ຈຸດປະສົງ, ເພື່ອເປັນການຈັດຕັ້ງຜັນຂະຫຍາຍບັນດາເນື້ອໃນເອກະສານຕ່າງໆ, ເພື່ອເປັນບ່ອນອີງໃຫ້ແກ່ຄະນະນໍາ ໃນການຄົ້ນຄວ້າ, ຕັດສິນຜົນການປະເມີນ, ຄັດເລືອກໃຫ້ໄດ້ບຸກຄົນດີເດັ່ນ ເພື່ອຍ້ອງຍໍສັນລະເສີນຢ່າງສົມກຽດ ແລະ ເພື່ອເຮັດໃຫ້ສະມາຊິກພັກ – ພະນັກງານ ພາຍໃນສະພາປະຊາຊົນແຂວງ ມີຄວາມຮັບຮູ້, ເຂົ້າໃຈຢ່າງເລິກເຊິ່ງ, ຮັບປະກັນການປະເມີນໃຫ້ສໍາເລັດຕາມຄາດໝາຍ ແລະ ທັນຕາມກໍານົດເວລາ.

  ພາບ/ຂ່າວ: ສະພາປະຊາຊົນແຂວງ