ເພື່ອເປັນການຈັດຕັ້ງປະຕິບັດຕາມແຈ້ງການຂອງຄະນະໂຄສະນາອົບຮົມແຂວງ, ຕອນເຊົ້າຂອງວັນອັງຄານ, ວັນທີ 22 ສິງຫາ 2023 ຢູ່ທີ່ຫ້ອງປະຊຸມສະພາປະຊາຊົນແຂວງ, ໜ່ວຍພັກ ສະພາປະຊາຊົນແຂວງ ໄດ້ປະຖະກະຖາວັນຍຶດອໍານາດທົ່ວປະເທດ 23 ສິງຫາ, ໂດຍການເປັນປະທານຂອງສະຫາຍ ທອງຄານ ວັດສະດາກອນ ເລຂາຫນ່ວຍພັກສະພາປະຊາຊົນແຂວງ, ມີສະຫາຍ ຄໍາດີ ວົງລ້ອມ ຮອງເລຂາພັກແຂວງ, ສະຫາຍ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ, ບັນດາສະຫາຍຄະນະພັກ, ສະມາຊິກພັກສົມບູນ/ສໍາຮອງ ພາຍໃນໜ່ວຍພັກສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.

ສະຫາຍ ທອງຄານ ວັດສະດາກອນ ເລຂາຫນ່ວຍພັກສະພາປະຊາຊົນແຂວງ, ໄດ້ນໍາເອົາເອກະສານ ໂຄສະນາ-ປະຖະກະຖາ ວັນຍຶດອໍານາດທົ່ວປະເທດ 23 ສິງຫາ ຄົບຮອບ 78 ປີ ແລະ 45 ປີຄື: (23 ສິງຫາ 1945 ແລະ 23 ສິງຫາ 1975), ໂຄສະນາ-ປະຖະກະຖາ ໃຫ້ສະມາຊິກພັກ-ພະນັກງານ ພາຍໃນສະພາປະຊາຊົນແຂວງຮັບຮູ້, ເຂົ້າໃຈຢ່າງເລິກເຊິ່ງ ປະຫວັດສາດແຫ່ງການຕໍ່ສູ້ຍາດເອົາເອກະລາດ, ອິດສະຫຼະພາບຂອງປະຊາຊົນລາວ ແລະ ນໍ້າໃຈຮັກຊາດ, ຈິດໃຈຕໍ່ສູ້ພິລະອາດຫານກ້າແກ່ນ, ທັດສະນະຫຼັກໝັ້ນອັນໜັກແໜ້ນ ແລະ ນໍ້າໃຈເສຍສະຫຼະອັນສູງສົ່ງຂອງປະຊາຊົນລາວບັນດາເຜົ່າ ພາຍໃຕ້ການນຳພາຂອງພັກປະຊາຊົນປະຕິວັດລາວ ເພື່ອທັບມ້າງແອກຄອບຄອງຂອງພວກລ່າເມືອງຂຶ້ນແບບເກົ່າ-ໃໝ່ ແລະ ຖືເອົາໂອກາດລະນຶກວັນດັ່ງກ່າວນີ້ເປັນການສຶກສາອົບຮົມພະນັກງານ, ສະມາຊິກພັກໃຫ້ມີນໍ້າໃຈຮັກຊາດ, ຮັກບ້ານເກີດເມືອງນອນ, ມີຄວາມເສຍສະຫຼະ, ປະກອບສ່ວນເຂົ້າໃນພາລະກິດປະຕິວັດ, ນໍາເອົາບົດຮຽນດັ່ງກ່າວໝູນໃຊ້ເຂົ້າໃນການປັບປຸງໜ້າທີ່ວຽກງານໃຫ້ມີຄຸນນະພາບ ແລະ ປະສິດທິຜົນໃຫ້ນັບມື້ສູງຂຶ້ນ.    ພ້ອມນັ້ນ, ສະຫາຍ ນ. ວັນສີ ພວງມະໄລ ຮອງເລຂາຫນ່ວຍພັກສະພາປະຊາຊົນແຂວງ, ໄດ້ຕາງໜ້າທາງຄະນະພັກ ສືບຕໍ່ຜ່ານຮ່າງບົດສະຫຼຸບການເຄື່ອນໄຫວນໍາພາ-ຊີ້ນໍາ ຂອງຄະນະໜ່ວຍພັກສະພາປະຊາຊົນແຂວງ ປະຈໍາເດືອນ ສິງຫາ ແລະ ວາງທິດທາງແຜນການເດືອນ ກັນຍາ 2023. ຫຼັງຈາກນັ້ນ, ບັນດາສະຫາຍສະມາຊິກພັກ ໄດ້ປະກອບຄໍາຄິດຄໍາເຫັນ ຕໍ່ເນື້ອໃນຂອງຮ່າງບົດສະຫຼຸບດັ່ງກ່າວຢ່າງກົງໄປກົງມາ, ຕໍານິສົ່ງຂ່າວເຊິ່ງກັນ ແລະ ກັນ, ຕີລາຄາຄືນໃນການນໍາພາ-ຊີ້ນໍາ ຂອງຄະນະໜ່ວຍພັກສະພາປະຊາຊົນແຂວງຜ່ານມາ, ເຫັນໄດ້ດ້ານດີຜົນງານ, ຂໍ້ຄົງຄ້າງ ແລະ ເພື່ອຊອກຫາວິທີທາງແກ້ໄຂໃນຕໍ່ໜນ້າ.