ວັນທີ 22 ມີນາ 2023  ໜ່ວຍພັກສະພາປະຊາຊົນແຂວງ ໄດ້ຈັດພິທີເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນ ໂດຍການເປັນປະທານຂອງສະຫາຍ ນາງ ຈັນທະຄອນ ສີອໍາພອນ , ກຳມະການພັກແຂວງ, ຮອງປະທານສະພາປະຊາຊົນແຂວງວຽງຈັນ,ເລຂາໜ່ວຍພັກສະພາປະຊາຊົນແຂວງ ເຂົ້າຮ່ວມມີຄະນະພັກ, ແຂກຖືກເຊີນຈາກຄະນະຈັດຕັ້ງແຂວງ,ຄະນະກວດກາແຂວງອົງການໄອຍະການປະຊາຊົນແຂວງ, ສານປະຊາຊົນແຂວງ, ພະແນກຍຸຕິທໍາແຂວງ, ຄະນະໂຄສະນາ-ອົບຮົມແຂວງ, ພະແນກແຜນການ ແລະ ການລົງທຶນແຂວງ ແລະ ສະມາຊິກພັກພາຍໃນໜ່ວຍສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.

ກອງປະຊຸມຍັງໄດ້ຮັບຟັງການຂື້ນຜ່ານມະຕິຕົກລົງຂອງຄະນະບໍລິຫານງານພັກແຂວງ ວ່າດ້ວຍການອະນຸມັດເລື່ອນສະມາຊິກພັກສໍາຮອງຂຶ້ນສົມບູນ ສະບັບເລກທີ 67 ແລະ ສະບັບເລກທີ 68 ລົງວັນທີ 07 ມີນາ 2023 ຕາມກົດລະບຽບຂອງພັກປະຊາຊົນປະຕິວັດລາວ; ໃນພິທີດັ່ງກ່າວ ສະຫາຍ ນາງ ຈັນທະຄອນ ສີອໍາພອນ ໄດ້ໃຫ້ກຽດກ່າວໂອ້ລົມ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍກັບບັນດາສະຫາຍທີ່ໄດ້ເອົາໃຈໃສ່ໃນການຕັ້ງໜ້າຝຶກຝົນຫຼໍ່ຫຼອມຕົນເອງໃນທຸກໆດ້ານເພື່ອສ້າງຕົນເອງຈົນໄດ້ເລື່ອນຂຶ້ນມາເປັນສະມາຊິກພັກສົມບູນ ແລະ ຈົ່ງພ້ອມກັນສືບຕໍ່ຮັກສາມູນເຊື້ອດັ່ງກ່າວ ແລະ ພ້ອມກັນຝຶກຝົນຫຼໍ່ຫຼອມຕົນເອງ ປະຕິບັດມະຕິ, ຄໍາສັ່ງຂອງຂັ້ນເທິງ ກໍ່ຄືກົດລະບຽບຂອງພັກວາງອອກຢ່າງເຂັ້ມງວດ.