ວັນທີ 11 ພະຈິກ 2022 ຜ່ານມານີ້ ໜ່ວຍຊາວໜຸ່ມ ສະພາປະຊາຊົນ ແຂວງຫົວພັນ ໄດ້ຈັດກອງປະຊຸມດຳເນີນບັ້ນຊີວິດການເມືອງ, ກວດກາ, ຕີລາຄາແບ່ງປະເພດການຈັດຕັ້ງປະຕິບັດ ຂໍ້ແຂ່ງຂັນ 4 ບຸກ ຄັ້ງທີ II ປະຈໍາປີ 2022 ຂຶ້ນຢູ່ທີ່ຫ້ອງປະຊຸມຊັ້ນ 3 ສະພາປະຊາຊົນແຂວງ ພາຍໃຕ້ການເປັນປະທານ ຂອງສະຫາຍ ຄອນສະຫວັນ ຂັນທະວີໄຊ ເລຂາໜ່ວຍຊາວໜຸ່ມ ສະພາປະຊາຊົນ ແຂວງຫົວພັນ ໃຫ້ກຽດເຂົ້າຮ່ວມຂອງ ສະຫາຍ ຄຳຟອງ ກົ້ວມີໄຊ ຮອງເລຂາໜ່ວຍພັກ, ເລຂາທິການສະພາປະຊາຊົນ ແຂວງຫົວພັນ ມີຜູ້ຕາງໜ້າມາຈາກຄະນະບໍລິຫານງານຊາວໜຸ່ມແຂວງ ພ້ອມດ້ວຍບັນດາສະມາຊິກຊາວໜຸ່ມ ພາຍໃນໜ່ວຍເຂົ້າຮ່ວມ ທັງໝົດ.

         ກອງປະຊຸມ ໄດ້ຮັບຟັງບົດສະຫຼຸບ ຂໍ້ແຂ່ງຂັນ 4 ບຸກ ປະຈໍາປີ 2022 ແລະ ທິດທາງແຜນການເຄື່ອນໄຫວ ປະຈຳປີ 2023 ຂອງໜ່ວຍຊາວໜຸ່ມ ສະພາປະຊາຊົນແຂວງ ຈາກ ສະຫາຍ ຄອນສະຫວັນ ຂັນທະວີໄຊ ເລຂາໜ່ວຍຊາວໜຸ່ມ; ພ້ອມທັງປະກອບຄຳຄິດຄຳເຫັນໃສ່ບົດສະຫຼຸບ ໃຫ້ມີເນື້ອໃນຄົບຖ້ວນ ແລະ ການວາງທິດທາງແຜນການໃຫ້ເໝາະສົມກັບຈຸດພິເສດຄວາມເປັນຈິງ ຂອງໜ່ວຍ ສາມາດຈັດຕັ້ງປະຕິບັດໃຫ້ໄດ້ຕາມຄາດໝາຍ. ຈາກນັ້ນ, ສະມາຊິກຊາວໜຸ່ມທຸກສະຫາຍ ໄດ້ຜ່ານໃບສໍາຫຼວດຕົນເອງ ແລ້ວພ້ອມກັນຕີລາຄາ ແບ່ງປະເພດຕາມມາດຖານເງື່ອນໄຂຕາມເນື້ອໃນຂໍ້ແຂ່ງຂັນການສ້າງຊາວໜຸ່ມ 4 ບຸກ. ພາຍໃນໜ່ວຍມີສະມາຊິກຊາວໜຸ່ມທັງໝົດ 36 ສະຫາຍຍິງ 14 ສະຫາຍ, ປະເມີນຜົນຕົວຈິງ 31 ສະຫາຍ, ຍິງ 12 ສະຫາຍ.

          ຕອນທ້າຍກອງປະຊຸມ ສະຫາຍ ຄຳຟອງ ກົ້ວມີໄຊ ໄດ້ມີຄຳເຫັນໂອ້ລົມ ເຊິ່ງກ່ອນອື່ນ ສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຊາວໜຸ່ມສະພາປະຊາຊົນແຂວງ ຍາດມາໄດ້ໃນໄລຍະໜຶ່ງປີຜ່ານມາ; ເນັ້ນໜັກໃຫ້ຄະນະໜ່ວຍຊາວໜຸ່ມ ເອົາໃຈໃສ່ຊີ້ນຳ – ນໍາພາ ສະມາຊິກຂອງຕົນຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ, ຕິດຕາມກວດກາການຈັດຕັ້ງປະຕິບັດໜ້າທີ່ວຽກງານ ຂອງສະມາຊິກພາຍໃນໜ່ວຍ ພ້ອມທັງປັບປຸງແບບແຜນວິທີເຮັດວຽກ ແລະ ຮຽກຮ້ອງໃຫ້ສະມາຊິກຊາວໜຸ່ມທຸກສະຫາຍຈົ່ງພ້ອມກັນ ຮັກສາມູນເຊື້ອຄວາມສາມັກຄີ ພາຍໃນ ແລະ ພາຍນອກ ໃຫ້ແໜ້ນແຟ້ນ,ຝຶກຝົນຫຼໍ່ຫຼອມຕົນເອງ ຊອກສະແຫວງຫາຄວາມຮູ້ໃໝ່ໆ ມາພັດທະນາຕົນເອງ ແລະ ການຈັດຕັ້ງໃຫ້ດີຂຶ້ນ ເອົາໃຈໃສ່ສ້າງເສດຖະກິດຄອບຄົວໃຫ້ໄດ້ລາຍຮັບຫຼາຍຂຶ້ນ, ເປັນເຈົ້າການຮັກສາມູນເຊື້ອໜ່ວຍຊາວໜຸ່ມ 4 ບຸກຕະຫຼອດໄປ.

ພາບ ແລະ ຂ່າວ: ສພຂ ຫົວພັນ