ໜ່ວຍຊາວໜຸ່ມຮາກຖານສະພາປະຊາຊົນແຂວງ ຫລວງນ້ຳທາ ລົງມອບເຄື່ອງຊ່ວຍເຫລືອນ້ອງນັກຮຽນຢູ່ໂຮງຮຽນຊົນເຜົ່າເມືອງວຽງພູຄາ ແຂວງຫລວງນ້ຳທາ ນຳໂດຍທ່ານ ວຽງໄຊ ສັກລຳດວນ ຄະນະບໍລິຫານງານຊາວໜຸ່ມແຂວງ ເລຂາໜ່ວຍຊາວໜຸ່ມຮາກຖານສະພາປະຊາຊົນແຂວງ ພ້ອມດ້ວຍຄະນະ ໃນວັນທີ 8 ເມສາ 2022 ໄດ້ມີພິທີມອບ-ຮັບ ຢູ່ທີ່ໂຮງຮຽນຊົນເຜົ່າເມືອງວຽງພູຄາ ແຂວງຫລວງນ້ຳທາ ໂດຍໃຫ້ກຽດເຂົ້າຮ່ວມຂອງທ່ານ ນາງ ເຮືອຍ ສົມຫວັງ ກຳມະການພັກເມືອງ ຮອງເຈົ້າເມືອງ ຜູ້ຊີ້ນຳວຽກງານອົງການຈັດຕັ້ງມາຫາຊົນຂອງເມືອງ ແລະ ທ່ານ ໜານ ຄຳແພງ ຄະນະບໍລິຫານງານຊາວໜຸ່ມແຂວງ, ເລຂາຊາວໜຸ່ມເມືອງ, ,ມີຄະນະອຳນວຍການໂຮງຮຽນ, ຄູ-ອາຈານ, ສະມາຊິກຊາວໝຸ່ມສະພາປະຊາຊົນແຂວງ ແລະ ນ້ອງນັກຮຽນໂຮງຮຽນຊົນເຜົ່າ ເຂົ້າຮ່ວມຢ່າງພ້ອມພຽງ.

ຈຸດປະສົງລົງຊ່ວຍເຫລືອໃນຄັ້ງນີ້ເພື່ອບັນເທົາທຸກໃຫ້ນ້ອງນັກຮຽນທີ່ຂາດເຂີນ, ດ້ອຍໂອກາດ ໄດ້ຮັບການຊູກຍູ້ສົ່ງເສີມ ແລະ ເຄື່ອງທີ່ນຳລົງຊ່ວຍເຫລືອໃນຄັ້ງນີ້ແມ່ນໄດ້ມາຈາກການລະດົມທຶນຊ່ວຍເຫລືອຂອງສະມາຊິກຊາວໝຸ່ມພາຍໃນໜ່ວຍຊາວໜຸ່ມຮາກຖານ ສະພາປະຊາຊົນແຂວງ, ປະກອບມີອຸປະກອນການຮຽນຄື: ປື້ມ, ບິກ,  ເຄື່ອງນຸ່ງຫົ່ມ  ແລະ ຜ້າອັດປາກ-ດັງ ລວມມູນຄ່າທັງໝົດ 4,750,000 ກີບ, ໃຫ້ກຽດມອບຂອງທ່ານ ວຽງໄຊ ສັກລຳດວນ ຄະນະບໍລິຫານງານຊາວໜຸ່ມແຂວງ ເລຂາໜ່ວຍຊາວໜຸ່ມຮາກຖານສະພາປະຊາຊົນແຂວງ, ໃຫ້ກຽດຮັບຂອງທ່ານ ສິງ ລໍວັນກູ່ ອຳນວຍການໂຮງຮຽນຊົນເຜົ່າ ເມືອງວຽງພູຄາ ແຂວງຫລວງນ້ຳທາ.

ໂອກາດລົງມອບເຄື່ອງຊ່ວຍເຫລືອຄັ້ງນີ້ ຍັງໄດ້ຮັບຟັງຄຳເຫັນໂອ້ລົມຂອງທ່ານ ນາງ ເຮືອຍ ສົມຫວັງ ກຳມະການພັກເມືອງ ຮອງເຈົ້າເມືອງ ກ່ອນອື່ນທ່ານໄດ້ສະແດງຄວາມຂອບໃຈຕໍ່ກັບໜ່ວຍຊາວໜຸ່ມຮາກຖານສະພາປະຊາຊົນແຂວງ ທີ່ເຫັນໄດ້ເຖິງຄວາມສຳຄັນ, ໄດ້ລະດົມທຶນຊ່ວຍເຫລືອນ້ອງນ້ອຍນັກຮຽນທີ່ດ້ອຍໂອກາດພາຍໃນເມືອງ ແລະ ເຄື່ອງທີ່ໄດ້ຮັບການຊ່ວຍເຫລືອຄັ້ງນີ້ແມ່ນຈະມອບໃຫ້ຄູ-ອາຈານ ແຈກຢາຍໃຫ້ນ້ອງນັກຮຽນໃຫ້ທົ່ວເຖິງ, ນຳໃຊ້ຢ່າງເກີດປະໂຫຍດສູງສຸດ ແລະ ໂອກາດໜ້າຫວັງວ່າຈະໄດ້ຮັບການຊ່ວຍເຫລືອຈາກໜ່ວຍຊາວໜຸ່ມຮາກຖານສະພາປະຊາຊົນແຂວງ ເຮົາຕື່ມອິກ.

ນອກນັ້ນ ຍັງໄດ້ສ້າງກິດຈະກຳຫລິ້ນກິລາບານເຕະຊາຍ ເພື່ອຜູກແໜ້ນຄວາມສາມັກຄີ ລະຫວ່າງ ໜ່ວຍຊາວໜຸ່ມຮາກຖານສະພາປະຊາຊົນແຂວງ ແລະ ໜ່ວຍຊາວໜຸ່ມເມືອງວຽງພູຄາ, ແຂວງຫລວງນ້ຳທາ ດ້ວຍບັນຍາກາດອັນເບິກບານມ່ວນຊື່ນທີ່ເຕັມໄປດ້ວຍຄວາມໝາຍສຳຄັນຂອງທັງສອງໜ່ວຍ

ພາບ ແລະ ຂ່າວ ນາງ ວັນນີ ແຝງບົວວັນ