ຕອນບ່າຍວັນທີ 1 ເມສາ  2022 ຢູ່ທີ່ຫ້ອງປະຊຸມຊັ້ນ 3 ສະພາປະຊາຊົນແຂວງໄດ້ຈັດພິທີມອບຮັບນາມມະຍົດ 4 ບຸກ ແລະ ທຸງໄຊນຳໜ້າຂະບວນການແຂ່ງຂັນ 4 ບຸກຂອງໜ່ວຍຊາວໜຸ່ມສະພາປະຊາຊົນແຂວງ ເປັນກຽດມອບໂດຍແມ່ນສະຫາຍ ນາງ ແສງເພັດ ພິມມະນີ ຮອງເລຂາຄະນະບໍລິຫານງານຊາວໜຸ່ມແຂວງ ກ່າວຮັບໂດຍ ສະຫາຍ ຄອນສະຫວັນ ຂັນທະວີໄຊ ເລຂາໜ່ວຍຊາວໜຸ່ມສະພາປະຊາຊົນແຂວງໃຫ້ກຽດເຂົ້າຮ່ວມຂອງ ສະຫາຍຄຳຟອງ ກົ້ວມີໄຊ ຮອງເລຂາໜ່ວຍພັກ ກຳມະການຄະນະປະຈຳ ເລຂາທິການສະພາປະຊາຊົນແຂວງ ມີແຂກຖືກເຊີນຈາກ ຄະນະຊາວໜຸ່ມແຂວງ, ອົງການພາຄີ ແລະ ຊາວໜຸ່ມແຮກສ່ຽວຫ້ອງວ່າການແຂວງ ຕະຫລອດຮອດສະມາຊິກພາຍໃນໜ່ວຍເຂົ້າຮ່ວມຢ່າງພ້ອມພຽງ.

ໜ່ວຍຊາວໜຸ່ມສະພາປະຊາຊົນແຂວງໄດ້ຮັບທຸງໄຊນຳໜ້າ 4 ບຸກຄັ້ງນີ້ ເປັນຄັ້ງທຳອິດ ແລະ ຄັ້ງປະຫວັດສາດ ຂອງໜ່ວຍເຊິ່ງມັນໄດ້ສະແດງໃຫ້ເຫັນໝາກຜົນ ແລະ ຜົນສຳເລັດໃນການຈັດຕັ້ງຜັນຂະຫຍາຍວຽກງານຊາວໜຸ່ມພາຍໃນໜ່ວຍກໍຄືການຈັດຕັ້ງປະຕິບັດຂໍ້ແຂ່ງ 4 ບຸກຂອງຊາວໜຸ່ມປະຊາຊົນປະຕິວັດລາວວາງອອກ. ໜ່ວຍຊາວໜຸ່ມສະພາປະຊາຊົນ ແຂວງຫົວພັນມີສະມາຊິກພາຍໃນໜ່ວຍທັງໝົົດ 37 ສະຫາຍ ຍິງ14 ສະຫາຍ ໃນໂອກາດທີ່ ສະຫາຍ ນາງ ແສງເພັດ ພິມມະນີ ຮອງເລຂາຄະນະບໍລິຫານງານຊາວໜຸ່ມ ແຂວງທີ່ໄດ້ເຂົ້າຮ່ວມໃນພິທີສະຫາຍຍັງໄດ້ມີຄຳເຫັນໂອ້ລົມຕໍ່ບັນດາສະມາຊິກຊາວໜຸ່ມພາຍໃນໜ່ວຍເຊິ່ງກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຜົນງານດ້ານຕ່າງໆ ທີ່ຄະນະໜ່ວຍຊາວໜຸ່ມ ແລະ ສະມາຊິກຊາວໜຸ່ມພາຍໃນໜ່ວຍ ຍາດມາໄດ້ຕະຫຼອດໄລຍະຜ່ານມາ, ພ້ອມນັ້ນ ສະຫາຍຍັງໄດ້ຮຽກຮ້ອງໃຫ້ຊາວໜຸ່ມພາຍໃນໜ່ວຍຈົ່ງສືບຕໍ່ຮັກສາມູນເຊື້ອນາມມະຍົດຄັ້ງນີ້ໃຫ້ໝັ້ນຄົງ ແລະ ສືບຕໍ່ຈັດປະຕິບັດມະຕິກອງປະຊຸມໃຫຍ່ຜູ້ແທນຊາວໜຸ່ມແຂວງຫົວພັນ ກໍຄືມະຕິກອງປະຊຸມໃຫຍ່ຂອງໜ່ວຍຊາວໜຸ່ມຂອງຕົນໂດຍສະເພາະແມ່ນຂໍ້ແຂ່ງຂັນ 4 ບຸກຂອງຊາວໜຸ່ມປະຊາຊົນປະຕິວັດລາວວາງອອກໃຫ້ໄດ້ຮັບຜົນສຳເລັດ ແລະ ປະກົດຜົນເປັນຈິງ.

ເວີນ ແກ້ວບຸນມີ