ຕອນເຊົ້າຂອງວັນອັງຄານ, ວັນທີ 21 ມີນາ 2023 ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມແລກປ່ຽນບົດຮຽນລະຫວ່າງ ໜ່ວຍຊາວໜຸ່ມຄະນະໂຄສະນາອົບຮົມແຂວງ ກັບ ໜ່ວຍຊາວໜຸ່ມສະພາປະຊາຊົນແຂວງ, ໂດຍການເປັນປະທານຮ່ວມຂອງສະຫາຍ ບຸນເສີນ ເຍືອນຂັວນພະຈັນ ເລຂາຊາວໜຸ່ມໜ່ວຍຮາກຖານ ຄະນະໂຄສະນາອົບຮົມແຂວງ ແລະ ສະຫາຍ ຄໍາດອນ ສີປະເສີດ ເລຂາຊາວໜຸ່ມໜ່ວຍຮາກຖານ ສະພາປະຊາຊົນແຂວງ, ມີສະມາຊິກຊາວໜຸ່ມພາຍໃນຂອງ 2 ໜ່ວຍຮາກຖານເຂົ້າຮ່ວມທັງໜົດ 24 ສະຫາຍ, ຍິງ 11 ສະຫາຍ;
ກອງປະຊຸມໄດ້ຮັບຟັງການເຜີຍແຜ່ຜັນຂະຫຍາຍມູນເຊື້ອແຫ່ງການນໍາພາຂອງພັກ ເຂົ້າໃນການຈັດຕັ້ງປະຕິບັດ ພາລະກິດປຽ່ນແປງໃໝ່ຢ່າງແຂງແຮງ ແລະ ເລິກເຊິ່ງ, ເນື່ອງໃນໂອກາດວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 68 ປີ(22 ມີນາ 1955 – 22 ມີນາ 2023), ສະເໜີໂດຍສະຫາຍ ບຸນເສີນ ເຍືອນຂັວນພະຈັນ ເລຂາໜ່ວຍຊາວໜຸ່ມ ຄະນະໂຄສະນາອົບຮົມແຂວງ.
ພ້ອມດຽວກັນນີ້ ກອງປະຊຸມໄດ້ຮັບຟັງການລາຍງານໂດຍຫຍໍ້ກ່ຽວກັບການເຄື່ອນໄຫວວຽກງານຂອງໜ່ວຍຊາວໜຸ່ມ 2 ໜ່ວຍຮາກຖານ ໂດຍສະຫາຍເລຂາຊາວໜຸ່ມ ເພື່ອພ້ອມກັນຄົ້ນຄ້ວາ, ປະກອບຄຳເຫັນ, ແລກປ່ຽນຖອດຖອນບົດຮຽນເຊິ່ງກັນ ແລະ ກັນ ຢ່າງເລິກເຊິ່ງຂອງສະມາຊິກຊາວໜຸ່ມ 2 ໜ່ວຍ ໃນການຈັດຕັ້ງປະຕິບັດວຽກງານເປັນຕົ້ນ: ວຽກງານການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງຊາວໜຸ່ມປະຊາຊົນປະຕິວັດລາວ; ການຄັດເລືອກຜົນງານຂອງສະມາຊິກຊາວໜຸ່ມຜູ້ດີເດັ່ນ; ການຮ່ວມຊີວິດການເມືອງ; ການສ້າງຄອບຄົວຕົວແບບພາຍໃນໜ່ວຍ; ການຊອກແຫຼ່ງລາຍຮັບເຂົ້າຄັງ, ການສ້າງຕັ້ງ ແລະ ຄຸ້ມຄອງກອງທຶນພາຍໃນໜ່ວຍ; ການເກັບກໍາຫາງສຽງຂອງສັງຄົມ; ການເປັນເສນາທິການໃຫ້ແກ່ການນໍາ ແລະ ຫົວຂໍ້ອື່ນໆ.
ໃນຕອນທ້າຍ, ກອງປະຊຸມໄດ້ເປັນເອກະພາບກັນ ວາງຄາດໝາຍສູ້ຊົນໃນປີຕໍ່ໜ້າຄື: ສືບຕໍ່ຈັດກອງປະຊຸມແລກປ່ຽນ, ຖອດຖອນບົດຮຽນເຊິ່ງກັນ ແລະ ກັນ ໃຫ້ໄດ້ 01 ຄັ້ງຂຶ້ນໄປ, ໂດຍການພັດປ່ຽນກັນເປັນເຈົ້າພາບ.
ພາບ/ຂ່າວ: ແສງພອນ ອິນນະລົງ.