(ສພຊ) – ການພົບປະສອງຝ່າຍລະຫວ່າງທ່ານ ປອ. ພິດສະໄໝ ບຸນວິໄລ ຫົວໜ້າກົມສື່ມວນຊົນ, ສະພາແຫ່ງຊາດ ກັບ ທ່ານ ນາງ ແພງພັນ ບຸບຜາພອນ ຫົວໜ້າກົມໂຄສະນາ, ສູນກາງແນວລາວສ້າງຊາດ (ສນຊ) ພ້ອມດ້ວຍຄະນະພະແນກ ແລະ ວິຊາການຂອງສອງກົມ ໄດ້ຈັດຂຶ້ນໃນຕອນບ່າຍວັນສຸກທີ 16 ສິງຫາ 2024 ທີ່ ສນຊ; ຈຸດປະສົງແມ່ນເພື່ອແລກປ່ຽນບົດຮຽນວຽກງານຫ້ອງມູນເຊື້ອຂອງສູນກາງແນວລາວສ້າງຊາດ ເປັນຕົ້ນ: ການກະກຽມເນື້ອໃນ, ການຈັດວາງຮູບພາບໃຫ້ຖືກກັບຫຼັກການຂອງການວາງສະແດງ, ວິທີການນຳສະເໜີ, ການນຳທ່ຽວ, ການປະສານງານທັງພາຍໃນ-ພາຍນອກ, ການບໍລິຫານວຽກງານຮອບດ້ານໃຫ້ແກ່ຫ້ອງມູນເຊື້ອ.

ທ່ານ ປອ. ພິດສະໄໝ ບຸນວິໄລ ໄດ້ມີຄຳເຫັນວ່າ: ການພົບປະໃນຄັ້ງນີ້ ມີຄວາມໝາຍສໍາຄັນຫຼາຍ ໂດຍໄດ້ມີໂອກາດແລກປ່ຽນບົດຮຽນເຊິ່ງກັນແລະກັນລະຫວ່າງສອງກົມ ເຊິ່ງກົມສື່ມວນຊົນຈະນໍາເອົາບົດຮຽນດັ່ງກ່າວໄປໝູນໃຊ້ເຂົ້າໃນການປະຕິບັດວຽກງານຕົວຈິງໃຫ້ມີຄວາມພ້ອມຮອບດ້ານ ແລະ ໃຫ້ຕິດພັນກັບປະຫວັດມູນເຊື້ອຂອງສະພາແຫ່ງຊາດໃນແຕ່ລະຊຸດ.

ຕອນທ້າຍ, ສອງຝ່າຍເຫັນດີເປັນເອກະພາບມອບໃຫ້ພະແນກທີ່ກ່ຽວຂ້ອງຂອງສອງກົມດັ່ງກ່າວ ເປັນເຈົ້າການສືບຕໍ່ພົວພັນປະສານງານກັນ ເພື່ອຈັດຕັ້ງປະຕິບັດວຽກງານຫ້ອງມູນເຊື້ອ ໃຫ້ບັນລຸໄດ້ຕາມຈຸດປະສົງ ແລະ ລະດັບຄາດໝາຍທີ່ວາງໄວ້.