(ສພຊ) – Page Facebook ກະດານຂ່າວ ມຊ ໃຫ້ຮູ້ວ່າ: ວັນທີ 21 ມີນາຜ່ານມາ ທີ່ຫ້ອງປະຊຸມຄະນະເສດຖະສາດ ແລະ ບໍລິຫານທຸລະກິດ, ມະຫາວິທະຍາໄລແຫ່ງຊາດລາວ (ມຊ) ໄດ້ຈັດພິທີມອບ-ຮັບຕຳແໜ່ງວິຊາການຄູຂັ້ນສາດສະດາຈານ (ສຈ) ແລະ ຂັ້ນຮອງສາດສະດາຈານ (ຮສ) ໂດຍການເຂົ້າຮ່ວມຂອງທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ.
ແຕ່ງຕັ້ງດຳລົງຕຳແໜ່ງສາດສະດາຈານ ຈຳນວນ 2 ທ່ານ ຄື: ທ່ານ ຮສ. ປອ. ວຽງວິໄລ ທ່ຽງຈັນໄຊ ຮອງປະທານກໍາມາທິການຍຸຕິທຳ ເປັນສາດສະດາຈານສາຂາກົດໝາຍອາຍາ ແລະ ທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ ເປັນສາດສະດາຈານສາຂາປະຫວັດສາດການພັດທະນາ; ແຕ່ງຕັ້ງດຳລົງຕຳແໜ່ງຮອງສາດສະດາຈານ ຈຳນວນ 15 ທ່ານ ເປັນຍິງ 6 ທ່ານ.