ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງເຊກອງ ຊຸດທີ II ໃນວັນທີ 25 ມັງກອນ 2023 ກ່ຽວກັບການເຄື່ອນໄຫວວຽກງານທີ່ພົ້ນເດັ່ນຂອງອົງການປົກຄອງແຂວງປະຈໍາປີ 2022 ແລະ ສະເໜີທິດທາງແຜນວຽກຈຸດສຸມປີ 2023 ໂດຍຈະປະຕິບັດ 11 ວຽກຈຸດສຸມໃຫ້ບັນຜົນສໍາເລັດຄື: ປັບປຸງກົນໄກການຄຸ້ມຄອງການລົງທຶນຂອງລັດ, ເອກະຊົນພາຍໃນ ແລະ ຕ່າງປະເທດ ແລະ ການຄຸ້ມຄອງທຶນຊ່ວຍເຫຼືອເພື່ອການພັດທະນາໃຫ້ມີປະສິດທິພາບ ແລະ ປະສິດທິຜົນສູງຂຶ້ນນກ່ວາເກົ່າ; ສູ້ຊົນເກັບລາຍຮັບເຂົ້າງົບປະມານໃຫ້ໄດ້ຕາມແຜນ ແລະ ລື່ນຄາດໝາຍແຜນການທີ່ວາງໄວ້ຕິດພັນກັບມາດຕະການຕ້ານການຮົ່ວໄຫຼຂອງລາຍຮັບງົບປະມານຢ່າງເຄັ່ງຄັດ, ເຂັ້ມງວດ ແລະ ນໍາໃຊ້ເຄື່ອງມືທັນສະໄໝເຂົ້າຊ່ວຍໃນການຄຸ້ມຄອງງົບປະມານໃຫ້ຫຼາຍກ່ວາເກົ່າ, ຍົກສູງຄຸນນະພາບການຄຸ້ມຄອງລາຍຈ່າຍງົບປະມານ, ການປະຕິບັດມາດຕະການປະຢັດຕ້ານການຟຸມເຟືອຍໃນກົງຈັກລັດໃຫ້ເກີດຜົນເປັນຈິງຫຼາຍຂຶ້ນ.
ພ້ອມນີ້ ສືບຕໍ່ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ໂດຍສະເພາະສຸມໃສ່ປະຕິບັດບັນດາໂຄງການຕ່າງໆທີ່ໄດ້ກຳນົດໃວ້ໃຫ້ເປັນຮູບປະທຳ; ຊຸກຍູ້ສົ່ງເສີມການຜະລິດເປັນສິນຄ້າ ແລະ ການພັດທະນາສິນຄ້າໂອດອບ; ພັດທະນາຕົວເມືອງເທສະບານຂອງແຂວງ ແລະ ເທສະບານເມືອງຕ່າງໆໃຫ້ໄດ້ 4 ສ 3 ຄ; ຄຸ້ມຄອງສິ່ງແວດລ້ອມທຳມະຊາດ-ສັງຄົມ, ການຟື້ນຟູປ່າໄມ້ ແລະ ປົກປັກຮັກສາປ່າໄມ້ປະເພດຕ່າງໆໃຫ້ຍືນຍົງ ຕິດພັນກັບການແກ້ໄຂຜົນກະທົບຂອງໂຄງການລົງທຶນຕ່າງປະເທດຕໍ່ສະພາບແວດລ້ອມ ແລະ ສັງຄົມໃຫ້ມີປະສິດທິພາບ; ຍົກສູງຄຸນນະພາບໃນການຄຸ້ມຄອງບໍລິຫານລັດ, ການຫັນເປັນທັນສະໃໝ, ການສ້າງເມືອງໃໝ່ ແລະ ກະກຽມສະເຫຼີມສະຫຼອງວັນສ້າງຕັ້ງແຂວງເຊກອງຄົບຮອບ 40 ປີ; ພັດທະນາການທ່ອງທ່ຽວ, ພັດທະນາພື້ນຖານໂຄງລ່າງ, ຄຸນນະພາບຂອງການບໍລິການຮ້ານອາຫານ, ໂຮງແຮມ, ເຮືອນພັກ ເພື່ອຮອງຮັບການພັດທະນາແຫຼ່ງທ່ອງທ່ຽວຕ່າງໆໃຫ້ສຳເລັດ ເພື່ອຕ້ອນຮັບນັກທ່ອງທ່ຽວທີ່ຈະມາທ່ຽວແຂວງເຊກອງນັບມື້ນັບເພີ່ມຂຶ້ນ; ປະຕິບັດຄາດໝາຍຕົວຊີ້ວັດຕ່າງໆຂອງສຶກສາ, ສາທາລະ ນະສຸກ ແລະ ຂົງເຂດອື່ນໆໃຫ້ໄດ້ຕາມແຜນການທີ່ວາງໄວ້; ປະຕິບັດວາລະແຫ່ງຊາດ ວ່າດ້ວຍມາດຕະການແກ້ໄຂບັນຫາຢາເສບຕິດ, ສ້າງຄວາມເຂັ້ມແຂງໂປ່ໃສໃນກຳລັງປ້ອນກັນຄວາມສະຫງົບ, ປາບປາມຜູ້ຄ້າຂາຍ-ຜູ້ເສບໃຫ້ແຂງແຮງກ່ວາເກົ່າ, ກໍ່ສ້າງ-ສ້ອມແປງສູນບຳບັດຢາເສບຕິດໃຫ້ສຳເລັດໂດຍໄວ, ສ້າງຂະແໜງການກົມກອງຂັ້ນແຂວງ-ເມືອງ ແລະ ສ້າງຄອບຄົວສ້າງບ້ານປອດຢາເສບຕິດ, ເພີ່ມທະວີການໂຄສະນາຜົນຮ້າຍຂອງຢາເສບຕິດໃຫ້ແຂງແຮງກ່ວາເກົ່າ ແລະ ຜັນຂະຫຍາຍບົດບັນທຶກການຮ່ວມມືລະ ຫວ່າງແຂວງເຊກອງ ກັບ ແຂວງແຮກສ່ຽວ ແລະ ກັບບັນດາແຂວງຕ່າງໆຂອງ ສສຫວຽດນາມ ທີ່ການນຳຂັ້ນສູງຂອງແຂວງໄດ້ມີການພົວພັນໃນປີ 2022 ຜ່ານມາ ແລະ ປະເທດອື່ນໆທີ່ເປັນຄູ່ຮ່ວມມືໃຫ້ເກີດເປັນຮູບປະທຳຫລາຍກ່ວາເກົ່າ.
—
ຂ່າວ: ສັນຍາ.
ພາບ: ນາລີວັນ.