ຕອນເຊົ້າຂອງວັນພຸດ, ວັນທີ 4 ພຶດສະພາ 2022 ຢູ່ທີ່ສະໂມສອນແຂວງ(ບ້ານເຈງ) ໄດ້ຈັດກອງປະຊຸມປະເມີນການຈັດຕັ້ງປະຕິບັດກົດໝາຍ ຈຳນວນ 4 ສະບັບ, ທີ່ຕິດພັນກັບວາລະແຫ່ງຊາດ, ໂດຍການເປັນປະທານຂອງທ່ານ ນາງ ຄໍາພອນ ພິມມະຈັນ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 04, ຮອງປະທານ ສພຂ, ເຂົ້າຮ່ວມມີທ່ານ ອ່ອນແກ້ວ ອຸ່ນອາລົມ ກຳມະການປະຈໍາພັກແຂວງ, ຮອງເຈົ້າແຂວງ, ມີບັນດາທ່ານຄະນະປະຈໍາ ສພຂ, ກໍາມະການພັກແຂວງ, ເຈົ້າເມືອງ-ຮອງເຈົ້າເມືອງ, ຫົວໜ້າ-ຮອງຫົວໜ້າພະແນກ, ແຂກເຊີນ, ຄະນະຮັບຜິດຊອບຂອງພະແນກການ ແລະ ຄະນະຮັບຜິດຊອບຂອງ ສພຂ ເຂົ້າຮ່ວມຢ່າງພ້ອມພຽງ.

ຈຸດປະສົງຂອງກອງປະຊຸມຄັ້ງນີ້ແມ່ນເພື່ອປະເມີນການຈັດຕັ້ງປະຕິບັດກົດໝາຍ 04 ສະບັບ, ທີ່ຕິດພັນກັບວາ ລະແຫ່ງຊາດຄື: ກົດໝາຍວ່າດ້ວຍ ທີ່ດິນ, ກົດໝາຍວ່າດ້ວຍ ການສົ່ງເສີມການລົງທຶນ, ກົດໝາຍວ່າດ້ວຍ ຊັບສິນຂອງລັດ ແລະ ກົດໝາຍວ່າດ້ວຍແຮ່ທາດ, ທັງນີ້ກໍ່ເພື່ອສະຫຼຸບຕີລາຄາການຈັດຕັ້ງປະຕິບັດກົດໝາຍເຫຼົ່ານັ້ນ ທີ່ໄດ້ຈັດຕັ້ງປະ ຕິບັດຢູ່ພາຍໃນແຂວງ, ພະແນກການ ແລະ ຢູ່ບັນດາເມືອງພາຍໃນແຂວງອຸດົມໄຊ ໃນໄລຍະຜ່ານມາ, ເພື່ອເປັນຂໍ້ມູນໃຫ້ແກ່ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 04, ປະກອບຄໍາຄິດຄໍາເຫັນ ແລະ ເພື່ອລາຍງານຕໍ່ຄະນະຮັບ ຜິດຊອບຂອງ ສພຊ, ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ພິຈາລະນາ ແລະ ຮັບຮອງ.

     ກອງປະຊຸມຜູ້ຕາງໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ໄດ້ຂຶ້ນລາຍງານ ກ່ຽວກັບຜົນຂອງການສຶກສາຄົ້ນຄວ້າ, ທົບທວນ ແລະ ປະເມີນການຈັດຕັ້ງປະຕິບັດກົດໝາຍວ່າດ້ວຍທີ່ດິນ ສະບັບເລກທີ່ 70/ສພຊ, ລົງວັນທີ 21 ມິຖຸນາ 2019, ຈາກນັ້ນທ່ານຮອງເຈົ້າແຂວງໄດ້ມີຄໍາເຫັນ ແລະ ມີທິດຊີ້ນຳໃນການປະກອບຄໍາເຫັນ ແລະ ຜູ້ແທນກອງປະຊຸມໄດ້ປະກອບຄໍາຄິດຄໍາເຫັນຕາມຄຳຖາມເຈາະຈີ້ມ ຂອງຄະນະປະຈໍາສະພາແຫ່ງຊາດ ຕໍ່ກັບບາງໝວດ, ບາງມາດຕາຂອງກົດໝາຍດັ່ງກ່າວ ເພື່ອເຮັດໃຫ້ບັນດາເນື້ອໃນຂອງກົດໝາຍທີ່ນໍາມາປະເມີນຄັ້ງນີ້ ມີຄວາມຖືກຕ້ອງສອດຄອງ, ໄປໃນທິດທາງດຽວກັນ ແລະ ແທດເໝາະກັບສະພາບຄວາມເປັນຈິງໃນປັດຈຸບັນ, ປະຕິບັດຕາມວາລະ ກອງປະຊຸມຄັ້ງນີ້ແມ່ນຈະດໍາເນີນເປັນເວລາ 2 ວັນ.

  ( ພາບ-ຂ່າວ: ແສງພອນ ອິນນະລົງ).