ຕອນເຊົ້າຂອງວັນທີ 14 ຕຸລາ 2022 ນີ້ ຢູ່ທີ່ສະໜາມກິລາຂອງແຂວງຫລວງນໍ້າທາ ໄດ້ຈັດພິທີຈູດທຳລາຍຢາເສບຕິດ ເນື່ອງໃນໂອກາດວັນຕ້ານຢາເສບຕິດຄົບຮອບ 21 ປີ ( 12 ຕຸລາ 2001-12 ຕຸລາ 2022 ) ໂດຍການໃຫ້ກຽດເປັນປະທານ ຂອງ ທ່ານ ຄໍາຟອງ ອີນມານີ ຮອງເລຂາພັກແຂວງ,  ປະທານສະພາປະຊາຊົນແຂວງ,ປະທານຄະນະກຳມະການກວດກາ ແລະ ຄວບຄຸມຢາເສບຕິດຂັ້ນແຂວງ ມີການນຳພັກ-ລັດ, ຄະນະພັກ, ຄະນະບັນຊາກອງບັນຊາການ ປກຊ-ປກສ, ບັນດາພະແນກການອ້ອມຂ້າງແຂວງ, ນັກຮຽນ ແລະ ປະຊາຊົນເຂົ້າຮ່ວມ.

ໃນພິທີ ທ່ານ ຄໍາຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ປະທານຄະນະກຳມະການກວດກາ ແລະ ຄວບຄຸມຢາເສບຕິດຂັ້ນແຂວງ ໄດ້ຂຶ້ນຜ່ານບົດລາຍງານຫຍໍ້ກ່ຽວກັບການເຄື່ອນໄຫວວຽກງານ ສະກັດກັ້ນ ແລະ ຕ້ານຢາເສບຕິດໃນໄລຍະ 1 ປີຜ່ານມາ ເຊິ່ງໄດ້ໂຄສະນາເຜີຍແຜ່ຜົນຮ້າຍຂອງຢາເສບຕິດ ດ້ວຍຫຼາຍຮູບການເຊັ່ນ: ລົງໂຄສະນາຢູ່ບັນດາບ້ານເປົ້າໝາຍ ແລະ ບໍລິສັດທີ່ມາລົງທຶນປູກພືດທົດແທນການປູກຝິ່ນ 4 ຄັ້ງ, ມີຜູ້ເຂົ້າຮ່ວມຮັບຟັງທັງໝົດ 295 ຄົນ, ຍິງ 99 ຄົນ; ລົງສ້າງບົດບັນທຶກສັນຍາຢຸດຕິການລັກລອບປູກຝິ່ນຢູ່ 5 ເມືອງ, ມີ 8 ກຸ່ມບ້ານ, ມີ 20 ບ້ານ ແລະ ມີຈໍານວນ 181 ຄອບຄົວ; ລົງສະກັດກັ້ນ, ທໍາລາຍສວນຝິ່ນ ທີ່ປະຊາຊົນລັກລອບປູກໄດ້ທັງໝົດ 90,15 ເຮັກຕາ (ເກົ້າສິບຈຸດສິບຫ້າເຮັກຕາ);ທົ່ວແຂວງມີຜູ້ຕິດຢາເສບຕິດ ທັງໝົດ 5,885 ຄົນ, ຍິງ 721 ຄົນ, ປະເພດຢາບ້າ ຈໍານວນ 3,236 ຄົນ, ຍິງ 253 ຄົນ ແລະ ຢາເສບຕິດປະເພດ ຢາຝິ່ນ ຈໍານວນ 2,649 ຄົນ, ຍິງ 568 ຄົນ, ໄດ້ຮັບການບໍາບັດຂັ້ນຊຸມຊົນໃຫ້ຜູ້ຕິດຢາເສບຕິດ ຈໍານວນ 3 ຊຸດ, ມີ 8 ບ້ານ, ມີຜູ້ເຂົ້າບໍາບັດ 195 ຄົນ, ຍິງ 43 ຄົນ;ກວດນ້ໍາປັດສະວະໃຫ້ນັກຮຽນ-ນັກສຶກສາ ແລະ ພະນັກງານ ທົ່ວແຂວງໄດ້ທັງໝົດ 1,734 ຄົນ, ຍິງ 370 ຄົນ, ປະເມີນໂຮງຮຽນປອດຢາເສບຕິດທົ່ວແຂວງ ໄດ້ຈໍານວນ 5 ເເຫ່ງ, ຜ່ານ 5 ແຫ່ງ. ເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງ ກໍໄດ້ເຄື່ອນໄຫວເຮັດໜ້າທີ່ຂອງຕົນຢ່າງຕັ້ງໜ້າ ໃນປີ 2021 ຜ່ານມາ ມີຄະດີຄ້າງ 104 ເລື່ອງ, ຜູ້ຖືກຫາ 147 ຄົນ, ຍິງ 17 ຄົນ, ຕ່າງປະເທດ 2 ຄົນ (ສັນຊາດຈີນ). ມາຮອດປີ 2022 ໄດ້ມ້າງຄະດີກ່ຽວກັບຢາເສບຕິດໄດ້ທັງໝົດ 138 ເລື່ອງ, ຜູ້ຖືກຫາ 187 ຄົນ, ຍິງ 16 ຄົນ, ຕ່າງປະເທດ 3 ຄົນ, (ສັນຊາດຫວຽດນາມ 2 ຄົນ) ແລະ (ສັນຊາດຈີນ 1 ຄົນ) ມີຄື: ຍຶດຂອງກາງຢາເສບຕິດປະເພດ ຢາບ້າ ຈໍານວນ 21,240 ເມັດ, ມີນໍ້າໜັກ 2.124 ກຣາມ (ສອງພັນໜຶ່ງຮ້ອຍຊາວສີ່ກຣາມ); ຢາເສບຕິດປະເພດ ຢາໄອສ໌ ມີນ້ໍາໜັກ 1,38 ກຣາມ (ໜຶ່ງຈຸດສາມສິບແປດກຣາມ);ຢາເສບຕິດປະເພດ ຝິ່ນ ມີນ້ໍາໜັກ 42,302 ກຣາມ (ສີ່ສິບສອງພັນສາມຮ້ອຍສອງກຣາມ);ນໍ້າກົດ ຈໍານວນ 376 ຕຸກ ເທົ່າກັບ 9,400 ລິດ (ເກົ້າພັນສີ່ຮ້ອຍລິດ);

ພິທີທໍາລາຍຢາເສບຕິດໃນຄັ້ງນີ້ ຄະນະຮັບຜິດຊອບ ໄດ້ນໍາເອົາຂອງກາງປະເພດຢາເສບຕິດ ເຊິ່ງສານໄດ້ຕັດສິນ ແລະ ນໍາໃຊ້ໄດ້ຢ່າງເດັດຂາດແລ້ວ ມາຈູດທໍາລາຍ ເຊິ່ງມີຢາເສບຕິດປະເພດ ຢາບ້າ ຈໍານວນ: 106,783 ເມັດ (ໜຶ່ງແສນຫົກພັນເຈັດຮ້ອຍແປດສິບສາມເມັດ ), ມີນໍ້າໜັກ ເທົ່າກັບ 10.678,3 ກຣາມ (ສິບກິໂລຫົກຮ້ອຍເຈັດສິບແປດຈຸດສາມກຣາມ); ຢາເສບຕິດປະເພດ ເຮໂຣອິນ ຈໍານວນ: 10 ແທ່ງ, ມີນໍ້າໜ້ກ ເທົ່າກັບ 3,5 ກິໂລກຣາມ (ສາມຈຸດຫ້າກິໂລກຣາມ);ຢາເສບຕິດປະເພດ ຢາຝິ່ນ ມີນໍ້າໜັກ 5.228,7 ກິໂລກຣາມ (ຫ້າກິໂລສອງຮ້ອຍຊາວແປດຈຸດເຈັດກຣາມ), ໂດຍອີງຕາມແຈ້ງການຂອງກົມໃຫຍ່ກະຊວງປ້ອງກັນຄວາມສະຫງົບ ຈະບໍ່ທໍາລາຍຖິ້ມ.

ໃນໂອກາດດັ່ງກ່າວ ໄດ້ມີການມອບອຸປະກອນກິລາຄື ບານເຕະ, ບານສົ່ງ, ກະຕໍ້ຫວາຍ ໃຫ້ກັບໂຮງຮຽນມັດທະຍົມຕອນຕົ້ນບ້ານທົ່ງອົ້ມ, ນ້ຳແງ້ນ,​ ທົ່ງໄຈ້ເໜືອ ລວມມູນຄ່າທັງໝົດ 2,500,000 ກວ່າກີບ ໂດຍການໃຫ້ກຽດມອບຂອງ ທ່ານ ຄໍາຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ປະທານຄະນະກຳມະການກວດກາ ແລະ ຄວບຄຸມຢາເສບຕິດຂັ້ນແຂວງ ໃຫ້ກຽດຮັບໂດຍຕາງໜ້າທັງ 3 ໂຮງຮຽນດັ່ງກ່າວ ທັງນີ້ກໍເພື່ອໃຫ້ນັກຮຽນໄດ້ນຳໃຊ້ເຂົ້າໃນການຫຼີ້ນກິລາ ເພື່ອຫ່າງໄກຈາກຢາເສບຕິດ.

ພາບ ແລະ ຂ່າວໂດຍ ນາງ ອຳພອນ ສີປະເສີດ