ໃນວັນທີ 5 ພຶດສະພາ 2023 ທີ່ແຂວງຄໍາມ່ວນ ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງ ພ້ອມດ້ວຍ ທ່ານ ປອ. ສົມສະອາດ ອຸ່ນສີດາ ຮອງເຈົ້າແຂວງຄໍາມ່ວນ ພ້ອມຄະນະ ເຂົ້າຮ່ວມກອງປະຊຸມສໍາມະນາວິທະຍາສາດ ລະດັບການນຳຂັ້ນສູງ ໃນຫົວຂໍ້: ເພີ່ມທະວີການຄຸ້ມຄອງການລົງທຶນຂອງລັດໃຫ້ມີປະສິດ ທິພາບ ແລະ ປະສິດທິຜົນ, ກອງປະຊຸມຈັດຂື້ນທີ່ສະພາແຫ່ງຊາດ ນະຄອນຫຼວງວຽງຈັນ (ໃນຮູບແບບອອນລາຍ ແລະ ກັບທີ່), ໂດຍການເປັນປະທານຮ່ວມຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ ແລະ ທ່ານ ສຈ. ປອ. ກິແກ້ວ ໄຂຄຳພິທູນ ຮອງນາຍົກລັດຖະຕີ; ມີບັນດາທ່ານປະທານ – ຮອງປະທານຈາກ 18ເຂດທົ່ວປະເທດ, ປະທານ-ຮອງປະທານກໍາມາທິການ, ລັດຖະມົນຕີ-ຮອງລັດຖະມົນຕີ, ຕາງຫນ້າພະແນກການບາງແຂວງ, ຕາງໜ້າຄະນະເລຂາທິການ, ຄະນະກົມ, ຄະນະພະແນກ, ພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ທັງນີ້, ກໍເພື່ອຈັດຕັ້ງປະຕິບັດຕາມແຜນການ ເພີ່ມທະວີການຄຸ້ມຄອງການລົງທຶນຂອງລັດໃຫ້ມີປະສິດທິພາບ ແລະ ປະສິດທິຜົນ ແນໃສ່ປະກອບສ່ວນເຂົ້າໃນການປະຕິບັດວາລະແຫ່ງຊາດ ກ່ຽວກັບການແກ້ໄຂຂໍ້ຫຍຸ້ງຍາກດ້ານເສດຖະກິດ-ການເງິນ ໃຫ້ບັນລຸຕາມແຜນ ກໍຄືການປະຕິບັດແຜນພັດທະນາເສດຖະກິດ-ສັງຄົມ ໃຫ້ຂະຫຍາຍຕົວຕາມທິດມີຄຸນນະພາບ, ໝັ້ນທ່ຽງ ແລະ ຍືນຍົງ ເຊິ່ງເປັນເປົ້າໝາຍທີ 1 ຂອງແຜນພັດທະນາເສດຖະກິດ-ສັງຄົມແຫ່ງຊາດ ຕາມທີ່ໄດ້ກໍານົດໃນແຜນ 5 ປີ ຄັ້ງທີ IX (2021-2025) ເວົ້າລວມ, ເວົ້າສະເພາະ ແມ່ນປະຕິບັດການຈັດສັນງົບປະມານລົງທຶນຂອງລັດໃຫ້ສອດຄ່ອງຕາມລັດຖະທໍາມະນູນ, ກົດໝາຍ ໃຫ້ມີຜົນສັກສິດ ແລະ ມີປະສິດທິພາບ ທັນເວລາພິຈາລະນາຮັບຮອງຢູ່ກອງປະຊຸມສະພາແຫ່ງຊາດ ແລະ ຈັດຕັ້ງປະຕິບັດຕາມແຜນງົບປະມານປະຈໍາປີ ໃຫ້ມີຜົນສັກສິດ ຕາມທີ່ໄດ້ກໍານົດໃນກົດໝາຍ ກໍຄືການສ້າງແຜນການລົງທຶນຂອງລັດ ໃຫ້ສອດຄ່ອງຕາມຄວາມສາມາດ ສະໜອງແຫຼ່ງທຶນຕົວຈິງ; ການຈັດສັນງົບປະມານຕົວຈິງ ຮັບປະກັນຄວາມຍຸຕິທໍາ, ມີຈຸດສຸມ, ເປັນບຸລິມະສິດ, ມີການກະຈາຍ ແລະ ການດຸນດ່ຽງການລົງທຶນ ລະຫວ່າງຂະແໜງການສູນກາງ ແລະ ທ້ອງຖິ່ນ ແລະ ລະຫວ່າງເຂດແຄວ້ນ ໃຫ້ສົມເຫດສົມຜົນ; ປັບປຸງຫຼັກການ ແລະ ກົນໄກການຈັດສັນງົບປະມານໃຫ້ຈະແຈ້ງ, ມີຄວາມໂລ່ງລ່ຽນ ແລະ ນໍາໃຊ້ເຕັກນິກການຈັດສັນງົບປະມານໃຫ້ທັນສະໄໝຫຼາຍຂຶ້ນ.
ກອງປະຊຸມ, ໄດ້ຮັບຟັງການລາຍງານຜົນກອງປະຊຸມສຳມະນາວິທະຍາສາດ ຂັ້ນວິຊາການ ຄັ້ງວັນທີ 2-3 ພຶດສະພາ 2023 ຈາກທ່ານ ປອ. ລີເບີ ລີບົວປາວ ປະທານກຳມາທິການແຜນການ, ການເງິນ ແລະ ການກວດສອບ ແລະ ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ; ຈາກນັ້ນ, ຜູ້ເຂົ້າຮ່ວມກອງປະຊຸມ ທັງສູນກາງ ແລະ ທ້ອງຖິ່ນ ໄດ້ປະກອບຄຳຄິດຄຳເຫັນຕໍ່ຜົນກອງປະຊຸມສຳມະນາວິທະຍາສາດ ກ່ຽວກັບການເພີ່ມທະວີການຄຸ້ມຄອງການລົງທຶນຂອງລັດໃຫ້ມີປະສິດທິພາບ ແລະ ປະສິດທິຜົນ ເພື່ອຊອກຫາທິດທາງ ແລະ ວິທີການແກ້ໄຂຂໍ້ຄົງຄ້າງ ເພື່ອເປັນການປະກອບສ່ວນໃສ່ການຈັດຕັ້ງປະຕິບັດວາລະແຫ່ງຊາດ ໃນການແກ້ໄຂຂໍ້ຫຍຸ້ງຍາກທາງດ້ານເສດຖະກິດ-ການເງິນ.
ໂດຍ: ເອື້ອ ມະໂນສິງ