ໂດຍປະຕິບັດຕາມແຈ້ງການຂອງຄະນະເລຂາທິການ ສະພາແຫ່ງຊາດ ສະບັບເລກທີ160/ຄລສ.ກກໝ, ລົງວັນທີ 25 ເມສາ 2023 ວ່າດ້ວຍການທາບທາມຄໍາເຫັນໃສ່ຮ່າງກົດໝາຍ 11 ສະບັບ ທີ່ຈະນຳເຂົ້າພິຈາລະນາ ຮັບຮອງໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ຈັດຕັ້ງປະຕິບັດຕາມກອງປະຊຸມແນະນໍາການທາບທາມຄໍາເຫັນຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ທົ່ວປະເທດ ໃສ່ຮ່າງກົດໝາຍ ຈໍານວນ 11 ສະບັບ ໃນຄັ້ງວັນທີ 25 ເມສາ 2023 ທີ່ຜ່ານມາ. ສະນັ້ນ, ເປັນເວລາ 4 ວັນເຕັມໃນລະຫວ່າງວັນທີ 1-4 ພຶດສະພາ 2023 ທີ່ສຳນັກງານສະພາປະຊາຊົນແຂວງຄໍາມ່ວນ ໄດ້ເປີດກອງປະຊຸມທາບທາມຄໍາຄິດຄໍາເຫັນໃສ່ຮ່າງກົດໝາຍ ຈໍານວນ 11 ສະບັບ ໂດຍການເປັນປະທານຂອງທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ ເປັນກຽດເຂົ້າຮ່ວມໂດຍ ທ່ານ ປອ. ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ ມີບັນດາທ່ານ ຄະນະປະຈໍາສະພາປະຊາຊົນແຂວງ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ, ຄະນະສະມາຊິກສະພາປະຊາຊົນຂັ້ນແຂວງ, ບັນດາພະແນກການ ແລະ ແຂກຖືກເຊີນເຂົ້າຮ່ວມທັງໝົດ 123 ເທື່ອຄົນ.
ພາຍຫຼັງປະທານກອງປະຊຸມໄດ້ກ່າວເປີດກອງປະຊຸມ ແລະນຳພາການທາບທາມ, ຜ່ານເນື້ອໃນຄໍາຖາມເຈາະຈີ້ມເພື່ອເປັນທິດໃຫ້ແກ່ການປະກອບຄໍາເຫັນໃສ່ຮ່າງ ກົດໝາຍຈໍານວນ 11 ເຊິ່ງປະກອບມີ ຮ່າງກົດໝາຍສ້າງໃໝ່ ຈໍານວນ 5 ສະບັບ, ຮ່າງກົດໝາຍສະບັບປັບປຸງ ຈໍານວນ 6 ສະບັບ ຄື: ຮ່າງກົດໝາຍວ່າດ້ວຍ ການຊົດເຊີຍຄ່າເສຍຫາຍຈາກລັດ (ສ້າງໃໝ່); ຮ່າງກົດໝາຍວ່າດ້ວຍ ການປົກຄອງ (ສ້າງໃໝ່); ຮ່າງກົດໝາຍວ່າດ້ວຍ ການຈັດຫາງານ (ສ້າງໃໝ່); ຮ່າງກົດໝາຍວ່າດ້ວຍ ອາກອນທີ່ດິນ (ສ້າງໃໝ່); ຮ່າງກົດໝາຍວ່າດ້ວຍ ສາທາລະນະສຸກ (ສ້າງໃໝ່);ຮ່າງກົດໝາຍວ່າດ້ວຍ ການຈັດພິມຈໍາໜ່າຍ (ປັບປຸງ); ຮ່າງກົດໝາຍວ່າດ້ວຍ ສັດນໍ້າ ແລະ ການປະມົງ (ປັບປຸງ); ຮ່າງກົດໝາຍວ່າດ້ວຍ ສັດປ່າ (ປັບປຸງ); ຮ່າງກົດໝາຍວ່າດ້ວຍ ການປົກປ້ອງສິດ ແລະ ຜົນປະໂຫຍດຂອງເດັກ (ປັບປຸງ); ຮ່າງກົດໝາຍວ່າດ້ວຍ ທະນາຄານທຸລະກິດ (ປັບປຸງ); ຮ່າງກົດໝາຍວ່າດ້ວຍ ສານທະຫານ (ປັບປຸງ). ຈາກນັ້ນ, ບັນດາທ່ານ ຄະນະປະຈໍາສະພາປະຊາຊົນແຂວງ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ, ຄະນະສະມາຊິກສະພາປະຊາຊົນຂັ້ນແຂວງ, ບັນດາພະແນກການ ແລະ ແຂກຖືເຊີນເຂົ້າຮ່ວມກອງປະຊຸມໄດ້ພ້ອມກັນຄົ້ນຄວ້າລະດົມຄວາມຄິມຄໍາເຫັນຕໍ່ຮ່າງກົດໝາຍ 11 ສະບັບດັ່ງກ່າວເຂົ້າໃນ ພາກ, ໝວດ ແລະ ມາດ ຊຶ່ງມີການປະກອບຄໍາເຫັນໄດ້ທັງໝົດ 119 ເທື່ອຄົນ, ເພື່ອໃຫ້ມີເນື້ອໃນຄົບຖ້ວນສົມບູນ, ຮັດກຸມສອດຄ່ອງກັບສະພາບການຂະຫຍາຍຕົວຂອງເສດຖະກິດ-ສັງຄົມ ແລະ ໃຫ້ສາມາດນຳເອົາຮ່າງກົດໝາຍ ຈໍານວນ 11 ສະບັບນີ້, ເຂົ້າພິຈາລະນາຮັບຮອງໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ທີ່ຈະໄດ້ໄຂຂຶ້ນໃນບໍ່ດົນຕໍ່ໜ້ານີ້.
ສຳລັບກອງປະຊຸມໃນເວລາ 4 ວັນເຕັມ, ຄະນະປະທານສະພາປະຊາຊົນແຂວງກໍ່ໄດ້ຜັດປ່ຽນກັນເຂົ້າຮ່ວມເປັນປະທານຍ້ອນອີງຕາມໜັງສືເຊີນເຂົ້າຮ່ວມກອງປະຊຸມເປີດກວ້າງຄົບຄະນະກາງສະໄໝ ຂອງຄະນະບໍລິຫານງານພັກເມືອງ.
ໂດຍ: ເອື້ອ ມະໂນສິງ