ເພື່ອເປັນການສຶກສາອົບຮົມດ້ານການເມືອງແນວຄິດໃຫ້ຖັນແຖວພະນັກງານ-ສະມາຊິກພັກ ແລະ ລັດຖະກອນ ໄດ້ເຊື່ອມຊຶມກຳແໜ້ນມູນເຊື້ອ ເປັນບົດຮຽນ ແລະ ເປັນພື້ນຖານໃຫ້ແກ່ການຝຶກຝົນຫຼໍ່ຫຼອມຕົນເອງ ໃຫ້ມີຄຸນທາດການເມືອງ ມີຄຸນນະສົມບັດ ສິນທຳປະຕິວັດ ແລະ ໃຫ້ກາຍເປັນພະນັກງານຮຸ່ນສືບທອດທີ່ດີ; ໃນຕອນບ່າຍຂອງວັນທີ 1 ມິຖຸນາ 2023 ທີ່ຜ່ານມາ ສະພາປະຊາຊົນແຂວງສາລະວັນ ຈັດພິທີ ປາຖະກະຖາ ເລົ່າຄືນມູນເຊື້ອ ວັນຜ່າວົງປິດລ້ອມຂອງກອງພັນທີ 2 ວິລະຊົນທົ່ງໄຫຫີນ ຊຽງຂວາງ ຄົບຮອບ 64 ປີ (18/5/1959-18/5/2023); ວັນໂຕນຄຸກຂອງທ່ານຜູ້ນຳ ຄົບຮອບ 63 ປີ(24/5/1960-24/5/2023) ແລະ ຕິດພັນກັບການເຜີຍແຜ່ແຈ້ງການ ກ່ຽວກັບການແຈ້ງຊັບສິນ; ເອກະສານແຈ້ງການຂອງຄະນະໂຄສະນາອົບຮົມແຂວງ ສະບັບເລກທີ 15/ຄອຂ ລົງວັນທີ 24/4/2023 ກ່ຽວກັບການຈັດຕັ້ງຜັນຂະຫຍາຍເນື້ອໃນກອງປະຊຸມວຽກງານການເມືອງ-ແນວຄິດທົ່ວປະເທດ ຄັ້ງທີ V ແລະ ວຽກງານການເມືອງແນວຄິດທົ່ວແຂວງສາລະວັນ ຄັ້ງທີ I; ໂດຍການເປັນປະທານ ແລະ ປາຖະກະຖາຂອງທ່ານ ນາງ ສູນໄຖ ໄຊະແສງ ກຳມະການພັກແຂວງ ຮອງປະທານ ສະພາປະຊາຊົນແຂວງ ແລະ ທ່ານ ສົມພອນ ແສງສຸລິຈັນ ຄະນະປະຈໍາ ເລຂາທິການສະພາປະຊາຊົນແຂວງ; ມີຄະນະກຳມະການ, ຫົວໜ້າ-ຮອງຫົວໜ້າ ຕະຫຼອດຮອດພະນັກງານ ພາຍໃນສະພາປະຊາຊົນແຂວງ ເຂົ້າຮ່ວມຮັບຟັງເຊື່ອມຊືມໃນຄັ້ງນີ້;

ສອງວັນດັ່ງກ່າວ ແມ່ນເປັນວັນທີ່ມີຄວາມໝາຍ ເຊິ່ງສະແດງໃຫ້ເຫັນມູນເຊື້ອຄວາມສຳຄັນຂອງ 2 ວັນປະຫວັດສາດທີ່ເປັນບົດຮຽນອັນລ້ຳຄ່າ ແລະ ຄຸນງາມຄວາມດີຂອງນັກປະຕິວັດທີ່ຍິ່ງໃຫຍ່ຂອງຜູ້ນຳພັກ-ລັດ ທີ່ປີຊາສາມາດສະຫຼາດສ່ອງໃສ, ມີນ້ຳໃຈພິລະອາດຫານ ອົງອາດກ້າແກ່ນ ເດັດດ່ຽວໜຽວແໜ້ນ ແລະ ມີພິກໄຫວອັນສະຫລາດສ່ອງໃສຂອງພະນັກງານ-ນັກຮົບກອງພັນທີ 2 ພາຍໃຕ້ການນຳພາຂອງພັກປະຊາຊົນ ປະຕິວັດລາວ ທີ່ບໍ່ຍອມຈຳນົນຕໍ່ພວກຈັກກະພັດສັດຕູຜູ້ມາຮຸກຮານ ການຜ່າວົງປິດລ້ອມຂອງກອງພັນທີ 2 ແມ່ນໄຊຊະນະອັນໃຫຍ່ຫຼວງ ຂອງກຳລັງປະກອບອາວຸດເຮົາ ທີ່ຢູ່ພາຍໃຕ້ການນຳພາຂອງພັກ ເຊິ່ງເປັນເຫດການປະຫວັດສາດອັນສຳຄັນຂອງຊາດ ທີ່ສາມາດທັບມ້າງກົນອຸບາຍຂອງພວກຈັກກະພັດ ແລະ ລູກແຫຼງຕີນມືຂອງພວກເຂົາ ທີ່ຫວັງດັບມ້າງກຳລັງປະຕິວັດ ໂດຍສະເພາະແມ່ນກອງພັນທີ 2; ມູນເຊື້ອທີສອງ ແມ່ນມູນເຊື້ອວິລະກຳໂຕນຄຸກ ຢ່າງມະຫັດສະຈັນຂອງບັນດາທ່ານຜູ້ນຳພັກ ແລະ ແນວລາວຮັກຊາດ ຍ້ອນການນຳພາອັນສະຫຼາດສ່ອງໃສ ແລະ ນ້ຳໃຈຮັກຊາດອັນແຮງກ້າຂອງບັນດາທ່ານຜູ້ນຳເຮົາ ທີ່ມີຄວາມກ້າຫານ ຕັດສິນໃຈຕໍ່ສູ້ເສຍສະຫຼະ ມີຄວາມປີຊາສາມາດ ແລະ ສາມາດຂົນຂວາຍ ສຶກສາອົບຮົມສາລະວັດທະຫານ ໃຫ້ມີນ້ຳໃຈຮັກຊາດອັນດູດດື່ມ ມີຄວາມຕື່ນຕົວ ເຮັດໃຫ້ສັດຕູກາຍເປັນມິດສະຫາຍ ຮ່ວມຕາຍນຳກັນ ຈົນສາມາດໂຕນຄຸກໄດ້ຢ່າງມະຫັດສະຈັນ.
ສອງເອກະສານທີ່ນຳມາເຜີຍແຜ່ໃນຄັ້ງນີ້ ກໍ່ເພື່ອໃຫ້ຖັນແຖວພະນັກງານ-ລັດຖະກອນ ຮັບຮູ້, ເຂົ້າໃຈ, ກໍາແໜ້ນເນື້ອໃນຂອງກອງປະຊຸມວຽກງານການເມືອງ-ແນວຄິດ ທົ່ວປະເທດ ຄັ້ງທີ່ V ແລະ ວຽກງານການເມືອງແນວຄິດທົ່ວແຂວງສາລະວັນ ຄັ້ງທີ I ຢ່າງເລິກເຊິ່ງ, ຍົກສູງນໍ້າໃຈຮັກຊາດ, ຈິດໃຈເອກະລາດ, ເປັນເຈົ້າຕົນເອງ, ເສີມສ້າງຄວາມສາມັກຄີເປັນປຶກແຜ່ນ, ເພີ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ; ເພື່ອສ້າງກຳລັງແຮງ, ແຫ່ງຄວາມເປັນເອກະພາບທາງດ້ານການເມືອງ, ແນວຄິດ ແລະ ກໍາລັງແຮງການ ປະຕິວັດພາລະກິດຂອງພັກ, ຮັບປະກັນໃຫ້ປະເທດຊາດ ກໍ່ຄືແຂວງສາລະວັນ ໃຫ້ມີສະຖຽນລະພາບທາງດ້ານການເມືອງ, ມີຄວາມຫມັ້ນຄົງ ແລະ ຄວາມສະຫງົບສຸກຂອງສັງຄົມ, ເສດຖະກິດສືບຕໍ່ໄດ້ຮັບການພັດທະນາ ແລະ ຊີວິດການເປັນຢູ່ຂອງປະຊາຊົນບັນດາເຜົ່ານັບມື້ດີຂື້ນ.

ພາບ-ຂ່າວ: ດີລຳພົນ ພົມມະຈັນ