ໂອກາດທີ່ສະຫາຍ ເຫລັກໄຫລ ສີວິໄລ ເລຂາພັກແຂວງ, ເຈົ້າແຂວງ ເຊກອງ ເຂົ້າຮ່ວມເປັນປະທານກອງປະຊຸມກາງສະໄໝ ຄັ້ງທີ I ຂອງຄະນະພັກຮາກຖານ ສະພາປະຊາຊົນ ແຂວງ ເຊກອງ (ສພຂ) ໃນລະຫວ່າງວັນທີ 15-16 ພຶດສະພາ 2023 ຜ່ານມາ ທີ່ສະໂມສອນ ສະພາປະຊາຊົນແຂວງ, ມີສະຫາຍ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ, ສະຫາຍ ປອ ແພງສີ ສີລະວີ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງ, ສະຫາຍ ນາງ ຄໍາເສັງ ທຸມມະວົງສາ ກໍາມະການພັກແຂວງ, ເລຂາຄະນະພັກຮາກຖານ, ຮອງປະທານສະພາປະຊາຊົນແຂວງ, ຄະນະພັກຮາກຖານ, ຄະນະໜ່ວຍພັກ, ຫົວໜ້າຈຸ-ຮອງຈຸ ພ້ອມດ້ວຍແຂກຖືກເຊີນເຂົ້າຮ່ວມ.

          ໂອກາດດັ່ງກ່າວ ສະຫາຍ ເລຂາພັກແຂວງ ກໍໄດ້ໃຫ້ກຽດໂອ້ລົມ ຊີ້ທິດເຍືອງທາງ ໃຫ້ຄະນະພັກຮາກຖານ, ຄະນະໜ່ວຍພັກ, ພະນັກງານນໍາພາຫຼັກແຫຼ່ງ ຂອງສະພາປະຊາຊົນແຂວງ ເອົາໃຈໃສ່ຕື່ມຫຼາຍບັນຫາທີ່ສໍາຄັນ ເປັນຕົ້ນ: ຄະນະພັກຮາກຖານ ທຸກສະຫາຍ ເອົາໃຈໃສ່ເຊື່ອມຊຶມບົດສະຫຼຸບຕີລາຄາການນໍາພາຮອບດ້ານ ຂອງຄະນະພັກຮາກຖານ ສພຂ ໃນໄລຍະກາງສະໄໝ ໃຫ້ເລິກເຊິ່ງເຖິງຖອງ ແລະ ແທດເຖິງກັບໜ້າວຽກຕົວຈິງ, ມີຄວາມເດັດດ່ຽວ, ປັບປຸງ, ປົວແປງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ; ສືບຕໍ່ສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ-ພະນັກງານ ມີຄວາມຮັບຮູ້ ແລະ ເຂົ້າໃຈຕໍ່ແນວທາງການເມືອງ ແລະ ທິດທາງປ່ຽນແປງໃໝ່ຢ່າງຮອບດ້ານທີ່ມີຫຼັກການຂອງພັກ.

ພ້ອມນັ້ນ, ກໍໃຫ້ສຸມໃສ່ປັບປຸງ, ກໍ່ສ້າງພັກ-ພະນັກງານໃຫ້ໜັກແໜ້ນ, ເຂັ້ມແຂງ ທາງດ້ານການເມືອງ-ແນວຄິດ, ການຈັດຕັ້ງ, ແບບແຜນວິທີນຳພາ-ວິທີເຮັດວຽກ ໃຫ້ສົມຄູ່ ແລະ ສອດຄ່ອງ ກັບສະພາບແວດລ້ອມຂະແໜງການຕົນ; ສຸມໃສ່ການຕິດຕາມ, ກວດກາ, ຊຸກຍູ້ວຽກງານອົງການຈັດຕັ້ງມະຫາຊົນ ໃຫ້ໄດ້ເຄື່ອນໄຫວເປັນປົກກະຕິ ແລະ ສ້າງເງື່ອນໄຂເອື້ອອຳນວຍຄວາມສະດວກໃຫ້ເຂົາເຈົ້າເຂົ້າເຖິງຂໍ້ມູນຂ່າວສານຂອງພັກ-ລັດ ແລະ ສ້າງກິດຈະກຳຕ່າງໆ ຢ່າງເປັນຂະບວນຟົດຟື້ນ, ເອົາໃຈໃສ່ປັບປຸງແບບແຜນນໍາພາ ແລະ ວິທີເຮັດວຽກ ໃຫ້ເຂັ້ມງວດ ແລະ ສັກສິດ, ປະຕິບັດລະບອບປະຊຸມສ່ອງແສງລາຍງານເປັນປົກກະຕິ, ກອງປະຊຸມຕ້ອງມີເນື້ອໃນຈະແຈ້ງ, ປະຕິບັດລະບອບຄວບຕໍາແໜ່ງພັກ-ລັດ ໂດຍຈໍາແນກພາລະບົດບາດນໍາພາຂອງພັກ ແລະ ພາລະບົດບາດຄຸ້ມຄອງບໍລິຫານລັດໃຫ້ສູງຂຶ້ນ, ເວົ້າຄຽງຄູ່ກັບການກະທໍາ, ເວົ້າຕາມມະຕິ, ເຄົາລົບ ແລະ ປະຕິບັດຕໍ່ກົດລະບຽບຂອງພັກ ແລະ ກົດໝາຍຂອງລັດຢ່າງເຂັ້ມງວດ.

          ຄຽງຄູ່ກັນນັ້ນ, ສະມາຊິກພັກ, ພະນັກງານຫຼັກແຫຼ່ງ ຕ້ອງເຄົາລົບ ແລະ ປະຕິບັດຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ, ບຸກຄົນຮັບຜິດຊອບຢ່າງເຂັ້ມງວດ, ເດັດດ່ຽວແກ້ໄຂພະຍາດອາດຍາສິດ, ພະຍາດເອກະຊົນ ແລະ ຕ້ານການສໍ້ລາດບັງຫຼວງຢ່າງຕັ້ງໜ້າ ພ້ອມກັນແກ້ໄຂປະກົດການຫຍໍ້ທໍ້ຕ່າງໆພາຍໃນໜ່ວຍຂອງຕົນໃຫ້ໝົດໄປ, ມີຄວາມເຊື່ອໝັ້ນຢ່າງຕາຍໃຈຕໍ່ອຸດົມການສັງຄົມນິຍົມ, ມີນໍ້າໃຈເສຍຍສະຫຼະເພື່ອຊາດ, ເພື່ອປະຊາຊົນ, ຈໍາແນກໄດ້ມິດ, ສັດຕູຢ່າງຈະແຈ້ງ, ມີຄວາມຕື່ນຕົວ ແລະ ຮັບຜິດຊອບສູງຕໍ່ໜ້າທີ່ວຽກງານທີ່ໄດ້ມອບໝາຍ ແລະ ບຸກບືນພັດທະນາຕົນເອງຢູ່ສະເໝີໂດຍສຸມໃສ່ຍົກສູງຄວາມຮູ້, ຄວາມສາມາດ ທາງດ້ານທິດສະດີ, ວິຊາສະເພາະ, ແບບແຜນວິທີເຮັດວຽກ, ແບບແຜນດຳລົງຊີວິດ ພາຍໃຕ້ວິໄນພັກ ແລະ ກົດໝາຍລັດ.

#ໂດຍ: ອາລົມດີ.