ໃນລະຫວ່າງວັນທີ 25-27 ກຸມພາ 2023 ນີ້, ທ່ານ ນາງແກ້ວລາ ມະນີຈິດ ເລຂາທິການສະພາປະຊາຊົນແຂວງ ພ້ອມດ້ວຍຄະນະ ໄດ້ຕ້ອນຮັບ ທ່ານ ນາງ ເອີນຊີໄຊຄັງ ລົບຊັງດໍຣຈ໌ເລຂາທິການສະພາຄູຣານໃຫຍ່ ແຫ່ງ ມົງໂກລີ ພ້ອມດ້ວຍຄະນະທີ່ໄດ້ມາຢ້ຽມຢາມ ແລະ ແລກປ່ຽນບົດຮຽນນຳສະພາປະຊາຊົນແຂວງຫຼວງພະບາງ, ຢູ່ຫ້ອງປະຊຸມຂອງສະພາ

ປະຊາຊົນແຂວງ,ໂອກາດນີ້ ທ່ານ ນາງ ແກ້ວລາ ມະນີຈິດ ໄດ້ກ່າວຕ້ອນຮັບ ແລະລາຍງານຫຍໍ້ ກ່ຽວກັບພາລະບົດບາດ ຂອງຄະນະເລຂາທິການສະພາປະຊາຊົນແຂວງ ໃຫ້ຄະນະຜູ້ແທນສະພາຄູຣານໃຫຍ່ໄດ້ຮັບຊາບ, ພ້ອມທັງໄດ້ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ ໃນການຈັດຕັ້ງປະຕິບັດວຽກງານຂອງສະພາປະຊາຊົນແຂວງ ແລະຂໍຄວາມຊ່ວຍເຫຼືອນຳສະພາຄູຣານໃຫຍ່ ໃນການຊຸກຍູ້ສົ່ງເສີມແລະ ຍົກລະດັບຄວາມຮູ້ ໃຫ້ແກ່ບຸກຄະລາກອນຂອງສະພາປະຊາຊົນແຂວງ, ພ້ອມນີ້ ທ່ານເລຂາທິການສະພາຄູຣານໃຫຍ່ ກໍໄດ້ຮັບເອົາການສະເໜີ ຂອງທ່ານເລຂາທິການສະພາປະຊາຊົນແຂວງ ທັງເປັນການ

ແລກປ່ຽນບົດຮຽນເຊິ່ງກັນ ແລະ ກັນ ເປັນຕົ້ນແມ່ນ ການຝຶກອົບຮົມໄລຍະສັ້ນ ແລະ ໄລຍະຍາວ, ທັງນີ້ແມ່ນຍົກສູງການພົວພັນຮ່ວມມື ລະຫວ່າງ ສປປລາວ ແລະ ມົງໂກລີກໍຄືສະພາປະຊາຊົນແຂວງຫຼວງພະບາງ ແລະ ສະພາຄູຣານໃຫຍ່ແຫ່ງ ມົງໂກລີ ໃຫ້ຫຼາຍຂຶ້ນ; ພາຍຫຼັງສໍາເລັດການເຮັດວຽກຢູ່ສະພາປະຊາຊົນແຂວງແລ້ວ, ຄະນະຜູ້ແທນສະພາຄູຣານໃຫຍ່ ກໍຍັງໄດ້ເຂົ້າພົບປະຢ້ຽມຢາມ ທ່ານ ວົງສະຫວັນ ເທບພະຈັນ ຮອງເລຂາພັກແຂວງ, ປະທານສະພາປະຊາຊົນແຂວງ ທີ່ຫ້ອງຮັບແຂກຫ້ອງວ່າການແຂວງ, ຈຸດປະສົງ ແມ່ນເພື່ອລາຍງານກ່ຽວກັບການເດີນທາງມາຢ້ຽມຢາມລາວໃນຄັ້ງນີ້ ໃຫ້ຮັບຊາບ,ໂອກາດນີ້ ທ່ານ ວົງສະຫວັນ ເທບພະຈັນ ໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ແຂວງຫຼວງພະບາງ ຂອງຄະນະເລຂາທິການສະພາຄູຣານໃຫຍ່ ໃນຄັ້ງນີ້, ພ້ອມທັງໄດ້ແລກປ່ຽນບາງວຽກງານຂອງສະພາປະຊາຊົນແຂວງ ໃນການຈັດຕັ້ງປະຕິບັດໃນ 3 ພາລະບົດບາດ ຄື: ການສ້າງ ແລະ ປັບປຸງນິຕິກຳ, ການຕົກລົງບັນດາບັນຫາສຳຄັນພື້ນຖານຂອງທ້ອງຖິ່ນ ແລະການຕິດຕາມກວດກາຕາມມະຕິທີ່ສະພາໄດ້ຮັບຮອງ ໃຫ້ຄະນະຜູ້ແທນສະພາຄູຣານໃຫຍ່ ໄດ້ຮັບຊາບ;

ນອກຈາກນີ້ ຄະນະຜູ້ແທນສະພາຄູຣານໃຫຍ່ ຍັງໄດ້ເດີນທາງທ່ຽວຊົມສະຖານທີທ່ອງທ່ຽວອັນລືຊື່ ແລະ ວັດທະນະທຳ–ຮີດຄອງປະເພນີຂອງຊາວຫຼວງພະບາງ ເຊັ່ນ: ຫໍພິພິທະພັນ, ວັດຊຽງທອງ, ຫັດຖະກຳບ້ານຜານົມ, ຕາດກວາງຊີ, ຕາດຮ້ອຍຄົວ, ຕະຫຼາດກາງຄືນແລະ ຮ່ວມໃສ່ບາດແດ່ພະສົງຕອນເຊົ້າ.

 ພາບ ວິລິຍະ ວັນນະສີ: ຂ່າວ ສຸດາກອນ ໂພສະຫວັດ