(ສພຊ) ລະຫວ່າງວັນທີ 7-9 ກໍລະກົດ 2020 ທີ່ຫ້ອງວ່າການປົກຄອງແຂວງ ຫລວງນໍ້າທາ ໄດ້ມີກອງປະຊຸມ ດໍາເນີນຊີວິດການເມືອງຂອງຄະນະບໍລິຫານງານພັກ ແຂວງ ຫລວງນໍ້າທາ ຊຸດທີ VII  ໂດຍການເປັນປະທານຂອງ ສະຫາຍ ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ; ເຂົ້າຮ່ວມມີສະຫາຍ ເພັດຖາວອນ ພິລາວັນ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ; ມີຮອງຫົວຫນ້າຄະນະຈັດຕັ້ງສູນກາງ;  ບັນດາສະຫາຍຄະນະປະຈໍາພັກແຂວງ, ກໍາມະການພັກແຂວງ ແລະ ພະນັກງານທີ່ກ່ຽວຂ້ອງ ຈໍານວນໜຶ່ງເຂົ້າຮ່ວມ.

ໃນພິທີໄຂກອງປະຊຸມ ສະຫາຍ ແສງນວນ ໄຊຍະລາດ ໄດ້ມີຄໍາເຫັນ ແລະ ໃຫ້ທິດຊີ້ນໍາກອງປະຊຸມ ເຊິ່ງສະຫາຍໄດ້ກ່າວວ່າ: ການດໍາເນີນຊີວິດການເມືອງຂອງຄະນະບໍລິຫານງານພັກແຂວງຫລວງນໍ້າທາໃນຄັ້ງນີ້ ແມ່ນມີຄວາມສໍາຄັນຫລາຍ ເພາະວ່າເປັນກອງປະຊຸມດໍາເນີນຊີວິດການເມືອງ ທ້າຍສະໄໝຂອງຄະນະບໍລິຫານງານພັກແຂວງ ຊຸດທີ VII;  ສະຫາຍຍັງໄດ້ຮຽກຮ້ອງໃຫ້ບັນດາສະຫາຍໃນຄະນະບໍລິຫານງານພັກແຂວງ ເອົາໃຈໃສ່ ສຸມສະຕິປັນຍາເຂົ້າໃນການປະກອບຄໍາຄິດຄໍາເຫັນ ຢ່າງກົງໄປກົງມາ ແລະ ດ້ວຍຄວາມຮັບຜິດຊອບສູງ.

ໃນກອງປະຊຸມດໍາເນີນຊີວິດການເມືອງ ຂອງຄະນະບໍລິຫານງານພັກ ແຂວງ ຫລວງນໍ້າທາ ຊຸດທີ VII ທ້າຍສະໄໝຄັ້ງນີ້ ໄດ້ຜ່ານບົດສໍາຫລວດການນໍາພາລວມຂອງຄະນະບໍລິຫານງານພັກແຂວງ, ຈາກນັ້ນ ບັນດາສະຫາຍ ທີ່ເຂົ້າຮ່ວມກອງປະຊຸມ ໄດ້ປະກອບຄໍາເຫັນດ້ວຍຄວາມເອົາໃຈໃສ່, ກົງໄປກົງມາ ແລະ ດ້ວຍຄວາມຮັບຜິດຊອບສູງ; ກອງປະຊຸມຍັງໄດ້ຜ່ານບົດສໍາຫລວດບຸກຄົນ ຂອງແຕ່ລະສະຫາຍໃນຄະນະບໍລິຫານງານພັກແຂວງ ເພື່ອເປັນການສໍາຫລວດກວດກາຕົນເອງ ແລະ ໃຫ້ໝູ່ຄະນະຕໍານິກໍ່ສ້າງຕໍ່ບັນຫາທີ່ຍັງຄົງຄ້າງ.

ຄະນະບໍລິຫານງານພັກແຂວງຫລວງນໍ້າທາ ຊຸດທີ VII ປະກອບມີທັງໝົດ 29 ສະຫາຍ ຍິງ 4 ສະຫາຍ, ໄດ້ອອກຮັບບໍານານ 11 ສະຫາຍ ຍິງ 2 ສະຫາຍ, ປັດຈຸບັນມີ 18 ສະຫາຍ ຍິງ 2 ສະຫາຍ.

ແຫຼ່ງຂ່າວທີ່ມາ: ສະພາແຫ່ງຊາດ