loader image

ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ເລຂາທິການສະພາປະຊາຊົນແຂວງຜົ້ງສາລີ ຖະແຫຼ່ງຂ່າວການດໍາເນີນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II

​ກ.ກ. 20, 2024 | ເຂດ 2 ຜົ້ງສາລີ

ຕອນເຊົ້າວັນທີ 19 ກໍລະກົດ 2024, ທ່ານ ນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງ ຖະແຫຼ່ງຂ່າວ ຕໍ່ສື່ມວນຊົນ ກ່ຽວກັບການດໍາເນີນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ທ່ານໄດ້ກ່າວວ່າ:

ບັນດາທ່ານທີ່ເຄົາລົບ ແລະ ນັບຖື !

ອີງຕາມ ລັດຖະທໍາມະນຸນແຫ່ງສາທາລະນະລັດ ປະຊາທິປະໄຕ ປະຊາຊົນລາວ (ສະບັບປັບປຸງປີ 2015) ເລກທີ 63/ສພຊ, ລົງວັນທີ 8 ທັນວາ 2015 ມາດຕາ 80, ອີງຕາມກົດ​ໝາຍ​ວ່າ​ດ້ວຍ​ການບັບ​ປັບ​ປຸງບາງ​ມາດ​ຕາ​ຂອງ​ກົດ​ໝາຍ​ວ່າ​ດ້ວຍ ສະ​ພາ​ແຫ່ງ​ຊາດ ແລະ ​ສະ​ພາ​ປະ​ຊາ​ຊົນ​ແຂວງ ສະ​ບັບ​ເລກ​ທີ 82/ສ​ພ​ຊ, ລົງ​ວັນ​ທີ 30 ມິ​ຖຸນາ 2020, ມາດຕາ 60 ວ່າດ້ວຍກອງປະຊຸມສະໄໝສາມັນປະຈໍາຫົກເດືອນຕົ້ນປີຂອງສະພາປະຊາຊົນຂັ້ນແຂວງ; ອີງຕາມ ມະຕິຂອງຄະນະປະຈໍາສະພາປະຊາຊົນແຂວງ ສະບັບເລກທີ 343/ຄປຈຂ, ລົງວັນທີ 18 ກໍລະກົດ 2024 ວ່າດ້ວຍການດໍາເນີນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II. ຂ້າພະເຈົ້າ ໃນນາມຕາງໜ້າຄະນະປະຈຳສະພາປະຊາຊົນແຂວງ ມີຄວາມຮູ້ສຶກຍິນດີ ແລະ ຖືເປັນກຽດຢ່າງສູງແຈ້ງມາຍັງບັນດາທ່ານການນຳພັກ-ລັດຂັ້ນແຂວງ, ພະນັກງານ-ລັດຖະກອນ, ທະຫານ, ຕຳຫຼວດ, ນັກຮຽນ-ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງປະຊາຊົນບັນດາເຜົ່າໃນທົ່ວແຂວງຜົ້ງສາລີ ຮັບຊາບວ່າ:

ສະພາປະຊາຊົນແຂວງຜົ້ງສາລີ ຈະໄດ້ດໍາເນີນກອງປະຊຸມ ເຊິ່ງປະກອບມີ 2 ເນື້ອໃນກອງປະຊຸມ ຄື: ກອງປະຊຸມປະເມີນຜົນການຈັດຕັ້ງປະຕິບັດລັດຖະທໍາມະນູນແຫ່ງ ສປປ ລາວ (ສະບັບປີ 2015) ແລະ ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ໃນວັນທີ 23-25 ກໍລະກົດ 2024 ເປັນເວລາ 3 ວັນ, ຢູ່ທີ່ຫ້ອງປະຊຸມສະພາປະຊາຊົນແຂວງ ສະນັ້ນ, ໃນນາມຄະນະຮັບຜິດຊອບກອງປະຊຸມ ຂໍອະນຸຍາດແຈ້ງວາລະດຳເນີນກອງປະຊຸມໃຫ້ຮັບຊາບວ່າ: ວັນທີ 23 ກໍລະກົດ 2024 ແມ່ນກອງປະຊຸມປະເມີນຜົນການຈັດຕັ້ງປະຕິບັດລັດຖະທໍາມະນູນແຫ່ງ ສປປ ລາວ (ສະບັບປີ 2015) ແລະ ວັນທີ 24 – 25 ກໍລະກົດ 2024 ແມ່ນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ ຊຸດທີ II

ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ ຊຸດທີ II ຈະໄດ້ສຸມໃສ່ຄົ້ນຄ້ວາ ເພື່ອພິຈາລະນາ ແລະ ຮັບຮອງເອົາບັນຫາສໍາຄັນຂອງແຂວງ ດັ່ງນີ້:

  1. ວຽກງານຂອງອົງການປົກຄອງແຂວງ:
  • ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານຂອງແຂວງ ໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024;
  • ບົດລາຍງານ ກ່ຽວກັບການຈັດຕັ້ງປະຕິບັດບັນດາຄາດໝາຍຂອງວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ໄລຍະຜ່ານມາ ແລະ ທິດທາງແຜນ ປະຈໍາປີ 2024

ນອກຈາກຮັບຟັງການລາຍງານຂອງອົງການປົກຄອງແຂວງແລ້ວ, ກອງປະຊຸມຍັງຈະໄດ້ຮັບຟັງການຊີ້ແຈງຈາກພະແນກການ, ອົງການທີ່ກ່ຽວຂ້ອງ 16 ພາກສ່ວນ ຕໍ່ກັບການແກ້ໄຂບັນຫາຕ່າງໆ ທີ່ປະຊາຊົນໃຫ້ຄວາມສົນໃຈ ແລະ ບັນຫາຫາງສຽງໃນສັງຄົມ ຕາມຄຳຊັກຖາມຂອງຄະນະປະຈໍາສະພາປະຊາຊົນແຂວງ.

  1. ວຽກງານ ອົງການໄອຍະການປະຊາຊົນແຂວງ ແລະ ສານປະຊາຊົນແຂວງ ເຊິ່ງຈະໄດ້ລາຍງານ-ຊີ້ແຈງ ຕາມຄຳຊັກຖາມຂອງຄະນະຮັບຜິດຊອບກອງປະຊຸມ.
  2. ວຽກງານຂອງສະພາປະຊາຊົນແຂວງ:
  • ບົດລາຍງານຂອງສະພາປະຊາຊົນແຂວງ ຊຸດທີ II ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ແຕ່ກອງປະຊຸມສະໄໝສາມັນ ເທື່ອທີ 6 ຫາ ເທື່ອທີ 7 ແລະ ແຜນການເຄື່ອນໄຫວວຽກງານ ຮອດກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງ ຊຸດທີ II;
  • ບົດປະກອບຄໍາເຫັນຂອງຄະນະປະຈໍາສະພາປະຊາຊົນແຂວງ ຕໍ່ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024; ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກໃນໄລຍະຜ່ານມາ ແລະ ທິດທາງແຜນການ ປະຈໍາປີ 2024;
  1. ມະຕິກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ມີ 4 ສະບັບ

ກອງປະຊຸມຄັ້ງນີ້ ຈະໄດ້ຄົ້ນຄ້ວາພິຈາລະນາ ແລະ ຮັບຮອງເອົາວຽກງານ ເປັນມະຕິກອງປະຊຸມຄັ້ງນີ້ ລວມມີ 4 ສະບັບ, ກວມເອົາ 2 ຂົງເຂດວຽກງານ ໃນນັ້ນ, ມະຕິຮັບຮອງເອົາບົດລາຍງານຂອງອົງການປົກຄອງແຂວງ 3 ສະບັບ; ມະຕິຮັບຮອງເອົາບົດລາຍງານຂອງສະພາປະຊາຊົນແຂວງ 1 ສະບັບ.

ບັນດາທ່ານທີ່ນັບຖື ແລະ ຮັກແພງ !

ອີກເທື່ອໜຶ່ງ, ໃນນາມຕາງໜ້າໃຫ້ຄະນະປະຈຳສະພາປະຊາຊົນແຂວງ, ຂ້າພະເຈົ້າ ຂໍເຊີນຊວນບັນດາທ່ານ ພະນັກງານ-ລັດຖະກອນ, ທະຫານ, ຕຳຫຼວດ, ນັກຮຽນ-ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງປະຊາຊົນບັນດາເຜົ່າທຸກຊັ້ນຄົນໃນທົ່ວແຂວງຜົ້ງສາລີ ຈົ່ງຕິດຕາມ ການດໍາເນີນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ ຊຸດທີ II ໃນຄັ້ງນີ້, ໃນໄລຍະການກະກຽມ ແລະ ດຳເນີນກອງປະຊຸມ, ຄະນະຮັບຜິດຊອບກອງປະຊຸມ ໄດ້ຈັດຕັ້ງ ໜ່ວຍງານຮັບຜິດຊອບໂທລະສັບສາຍດ່ວນ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໄປຍັງກອງປະຊຸມໃນວັນລັດຖະການ ໂດຍຜ່ານໂທລະສັບສາຍດ່ວນທີ່ບໍ່ເສຍຄ່າ ຕາມໝາຍເລກ ໂທລະສັບ 088 156 ຫຼື ແຟັກ 088 210 102.

ຂໍຂອບໃຈ

ພາບ-ຂ່າວ: ສູນທອງ