ທ່ານ ຄໍາຫຼ້າ ສີສຸວົງ ເລຂາທິການສະພາປະຊາຊົນແຂວງວຽງຈັນ ຖະແຫຼ່ງຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ II  ເຊິງທ່ານໄດ້ກ່າວວ່າ ກອງປະຊຸມສະໄໜສາມັນເທື່ອທີ 4 ສະພາປະຊາຊົນແຂວງວຽງຈັນຊຸດທີ II ໄດ້ດໍາເນີນເປັນເວລາ 4 ວັນ ໂດຍພາຍໃຕ້ການເປັນປະທານ ຂອງ ທ່ານ ບຸນສອນ ເພັດລາວັນ ຮອງເລຂາພັກແຂວງ, ປະທານສະພາປະຊາຊົນແຂວງວຽງຈັນ ແລະ ບັນດາທານສະມາຊິກສະພາປະຊາຊົນແຂວງ ໄດ້ສຸມເຫື່ອແຮງສະຕິປັນຍາໃນການຄົ້ນຄວ້າ, ປະກອບຄໍາຄິດເຫັນ ແລະ ໄດ້ຮັບການປະກອບສວ່ນຈາກອົງການປົກຄອງແຂວງ ແລະ ພາກສ່ວນທີ່ກ່ຽວຂ້ອງ ເຂົ້າໃນການດໍາເນີນກອງປະຊຸມສະໄໜສາມັນເທື່ອທີ 4 ສະພາປະຊາຊົນແຂວງ ຊຸດທີ II, ກອງປະຊຸມສະໄໜສາມັນເທື່ອທີ 4 ເທື່ອນີ້ ໄດ້ພິຈາລະນາ ແລະ ຮັບຮອງເອົາບັນຫາສໍາຄັນຂອງແຂວງ ຕາມສິດ ແລະ ໜ້າທີຂອງສະພາປະຊາຊົນແຂວງ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໜາຍ, ໄດ້ຮັບຜົນສໍາເລັດຕາມລະດັບຄາດໜາຍທີ່ວາງໄວ້

ຂ້າພະເຈົ້າໃນນາມຕາງໜ້າຄະນະປະຈໍາສະພາປະຊາຊົນແຂວງວຽງຈັນ ເລຂາທິການສະພາປະຊາຊົນແຂວງ ມີຄວາມຍິນດີ ແລະ ຖືເປັນກຽດຢ່າງສູງແຈ້ງມາຍັງບັນດາທ່ານພະນັກງານ-ລັດ,ພະນັກງານ, ທະຫານ, ຕໍາຫຼວດ, ນັກຮຽນ, ນັກສຶກສາ, ປັນຍາຊົນ, ກໍາມະກອນ, ຊາວຜູ້ອອກແຮງງານ, ຜູ້ປະກອບການ,ພໍ່ແມ່ພິນ້ອງປະຊາຊົນລາວບັນດາເຜົ່າ, ຊາວຕ່າງດ້າວ, ທີດໍາລົງຊິວິດຢູ່ແຂວງວຽງຈັນຊາບເຖິ່ງຜົນສໍາເລັດກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ II ດັ່ງນີ້:

1. ກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ II ໄດ້ໄຂຂື້ນໃນຕອນເຊົ້າຂອງ ວັນທີ 31 ມັງກອນ ຫາ 3 ກຸມພາ 2023 ລວມ 4 ວັນເຕັມ,ກອງປະຊຸມຄັ້ງນີ້ ນອກຈາກສະມາຊິກສະພາປະຊາຊົນແຂວງເຂົ້າຮ່ວມແລ້ວ ກອງປະຊຸມເປັນກຽດຢ່າງສູງຕ້ອນຮັບ ທ່ານ ຄໍາພັນ ສິດທິດໍາພາ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ແຂວງວຽງຈັນ, ທ່ານ ສຈ ປອ ຈະເລີນ ເຍຍປ່າວເຮີ ກໍາມະການສູນກາງພັກ ຮອງປະທານສະພາແຫ່ງຊາດ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 10 ແຂວງວຽງຈັນ, ມີບັນດາທ່ານການນໍາ ພັກ-ລັດ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 10, ອາດີດການນໍາຂັ້ນສູງຂອງແຂວງຕາງໜ້າແນວລາວສ້າງຊາດ, ອົງການຈັດຕັ້ງມະຫາຊົນ,ພະນັກງານອາວຸໂສບໍານານ,ພາກສ່ວນທີກ່ຽວຂ້ອງ ແລະ ແຂກຖຶກເຊີນເຂົ້າຮ່ວມຢ່າງພ້ອມພຽງ.
2. ກອງປະຊຸມໄດ້ຮັບຟັງການລາຍງານຂອງອົງການປົກຄອງແຂວງ ທີ່ຕິດພັນກັບການປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ,ແຜນງົບປະມານແຫ່ງລັດຂອງແຂວງ,ການລາາຍງານຂອງອົງການກວດສອບປະຈໍາພາກກາງ-ອົງການກວດກາລັດແຂວງ,ການລາຍງານບັນຫາທີ່ພົ້ນເດັ່ນທີ່ຕິດພັນກັບ 2 ພາກສ່ວນຄື: ພະແນກສຶກສາທິການ ແລະ ກິລາແຂວງ, ພະແນກຖະແຫຼງຂ່າວວັດທະນາທໍາ ແລະ ທ່ອງທ່ຽວແຂວງ, ການລາຍງານຂອງອົງການໄອຍະການປະຊາຊົນແຂວງ, ສານປະຊາຊົນ, ສະພາປະຊາຊົນແຂວງ ປີ 2022 ແລະ ທິດທາງແຜນການປີ 2023 ອັນທີພົ້ນເດັ່ນ ແມ່ນໄດ້ປະກອບຄໍາຄິດຄໍາເຫັນໃສ່ຮ່າງນິຕິກໍາໃຕ້ກົດໝາຍຂອງອົງການປົກຄອງແຂວງຈໍານວນ 2 ສະບັບ.
3. ກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ II ໄດ້ພິຈາລະນາຮັບຮອງ ເອົາບັນຫາສໍາຄັນພື້ນຖານຂອງແຂວງ ດັ່ງນີ້:

1. ຮັບຮອງເອົາບົດລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2022 ແລະ ທິດທາງແຜນການ ປະຈໍາປີ 2023.
2. ຮັບຮອງເອົາບົດລາຍງານ ການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ປະຈໍາປີ 2022 ແລະ ທິດທາງແຜນການ ປະຈໍາປີ 2023.
3. ຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022, ທິດທາງແຜນການປີ 2023 ແລະ ບົດລາຍງານຜົນການກວດສອບບົດສະຫຼຸບຂາດຕົວງົບປະມານ ປະຈໍາປີ 2021 ແລະ ເອກະສານລາຍງານການເງິນ ວິສາຫະກິດລັດລົງທຶນ ປະຈໍາປີ 2021 ຂອງແຂວງວຽງຈັນ ແລະ ບົດລາຍງານການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023 ຂອງອົງການກວດກາລັດແຂວງວຽງຈັນ.
4. ຮັບຮອງເອົາບົດລາຍງານການຈັດຕັ້ງປະຕິບັດວຽກງານ ປີ 2022 ແລະ ທິດທາງແຜນການປີ 2023 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ.
5. ຮັບຮອງເອົາ ບົດລາຍງານການເຄື່ອນໄຫວວຽກງານ ປີ 2022 ແລະ ທິດທາງແຜນການ ປີ 2023 ຂອງສະພາປະຊາຊົນແຂວງວຽງຈັນ ຊຸດທີ II.
6. ຮັບຮອງເອົານິຕິກໍາໃຕ້ກົດໝາຍຂອງອົງການປົກຄອງແຂວງ ຈໍານວນ 2 ສະບັບ ຄື:

– ຮ່າງຂໍ້ຕົກລົງຂອງທ່ານເຈົ້າແຂວງວ່າດ້ວຍ: ການຄຸ້ມຄອງ ແລະ ນໍາໃຊ້ຢາປາບສັດຕູພືດ ຢູ່ແຂວງວຽງຈັນ.

– ຮ່າງຂໍ້ຕົກລົງຂອງທ່ານເຈົ້າແຂວງວ່າດ້ວຍ: ການສະກັດກັ້ນ ແລະ ຫຼຸດຜ່ອນອຸບັດຕິເຫດຕາມເສັ້ນທາງບົກທົ່ວແຂວງວຽງຈັນ.

ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສໍາຄັນດັ່ງກ່າວມາຂ້າງເທິ່ງນັ້ນ,ໃນໄລຍະດໍາເນີນກອງປະຊູມສະໄໜສາມັນເທື່ອທີ 4 ສະພາປະຊາຊົນແຂວງ ຊຸດທີ II ໄດ້ມີປະຊາຊົນບັນດາເຜົ່າ ສົ່ງຄໍາຄິດຄໍາເຫັນຜ່ານໂທລະສັບສາຍດ່ວນ 023 156 ຈໍານວນ 6 ສາຍ, ຕິດພັນກັບ 5 ພາກສ່ວນ, ເຊິ່ງເນື້ອໃນແມ່ນພົວພັນເຖິ່ງການຄຸ້ມຄອງ-ບໍລິຫານລັດ,ການພັດທະນາເສດຖະກິດ-ສັງຄົມ,ການພັດທະນາທີ່ມີຜົນກະທົບຕໍ່ສັງຄົມ ແລະ ສີ່ງແວດລອ້ມຕໍ່ກັບຄໍາຄິດເຫັນຂອງປະຊາຊົນດັ່ງກ່າວ ກອງເລຂາກອງປະຊຸມໄດ້ສັງລວມ ແລະ ຈະມອບໃຫ້ພາກສ່ວນທີ່ກ່ຽວຂ້ອງຄົ້ນຄວ້າແກ້ໄຂໃຫ້ຖຶກຕ້ອງສ່ອດຄອ່ງ ຕາມກົດໜາຍ ແລະ ລະບຽບ ສະພາປະຊາຊົນແຂວງ ຈະໄດ້ເພີ່ມທະວີຄວາມເປັນເຈົ້າການໃນການເຮັດໜ້າທີ່ຕິດຕາມ-ກວດກາ ແລະ ຊຸກຍູ້ ຕາມພາລະບັດບາດຢ່າງເປັນເຈົ້າການ.

ອີກເທື່ອໜຶ່ງ ຕາງໜ້າຄະນະປະຈໍາສະພາປະຊາຊົນແຂວງວຽງຈັນ, ຂ້າພະເຈົ້າຂໍຂອບໃຈມາຍັງທຸກພາກສ່ວນ ທີ່ໄດ້ມີຄວາມພະຍາຍາມຕິດຕາມ, ຮັບຟັງ ແລະ ໃຊ້ສິດປະຊາທິປະໄຕຂອງຕົນ ໃນການມີຄໍາຄິດ-ຄໍາເຫັນຄືດັ່ງກ່າວ ເຊິ່ງມັນສະແດງເຖິງຄວາມຮັບຜິດຊອບທາງດ້ານການເມືອງຂອງຜູ້ມີສິດເລືອກຕັ້ງ ທີ່ໄດ້ໃຫ້ຄວາມເປັນຫ່ວງ-ເປັນໃຍຕໍ່ການພັດທະນາເສດຖະກິດ-ສັງຄົມ ແຂວງພວກເຮົາ.

ຂໍສະແດງຄວາມຂອບໃຈ ແລະ ຊົມເຊີຍຢ່າງຈິງໃຈມາຍັງພາກສ່ວນສື່ມວນຊົນ ຂອງແຂວງວຽງຈັນທີ່ໄດ້ຕິດຕາມຢ່າງໃກຊິດ ເພື່ອເກັບກໍາຂ່າວ ແລະ ເຜີຍແຜ່ຢ່າງທັນການ ກ່ຽວກັບການດໍາເນີນກອງປະຊຸມໃນຄັ້ງນີ້ ໃຫ້ແກ່ສັງຄົມຮັບຊາບຢ່າງທົ່ວເຖິ່ງ.

ຂໍອວຍພອນແດ່ທຸກໆທ່ານ ຈົ່ງມີສຸຂະພາບເຂັ້ມແຂງມີຄວາມຜາສຸກໃນຊິວິດສ່ວນຕົວ ແລະ ຄອບຄົວ ປະສົບຜົນສໍາເລັດໃນໜ້າທີ່ການງານທຸກປະການ ແລະ ພ້ອມກັນພັດທະນາແຂວງວຽງຈັນຂອງພວກເຮົາ ໃຫ້ກາຍເປັນແຂວງມັ່ງຄັ່ງ,ເຂັ້ມແຂງ,ສັງຄົມມີຄວາມສະຫງົບ,ຍຸຕິທໍາ ແລະ ສີວິໄລ ເປັນກ້າວໆ.