ໃນວັນທີ 07 ສິງຫາ 2024 ນີ້, ຢູ່ທີ່ສະໂມສອນຂອງເມືອງສຸຂຸມາ ໄດ້ຈັດກອງປະຊຸມເຜີຍແຜ່ເຊື່ອມຊືມ ແລະຜັນຂະຫຍາຍ ເອກະສານສໍາຄັນຂອງສູນກາງພັກ ໂດຍການໃຫ້ກຽດເຂົ້າຮ່ວມເປັນປະທານ ແລະ ບັນລະຍາຍເອກະສານຂອງ ສະຫາຍ ແກ້ວລັດຕະນະ ສີຫາວົງ ຄະນະປະຈຳພັກແຂວງ, ຮອງປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ15 ແຂວງຈຳປາສັກ ທັງເປັນຮອງປະທານຄະນະປະຈຳສະພາປະຊາຊົນແຂວງຈໍາປາສັກ ຜູ້ຊີ້ນຳວຽກງານຮອບດ້ານຢູ່ເມືອງສຸຂຸມາ, ມີສະຫາຍ ສົມເພັດ ບຸດສະດີ ກຳມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງໆສຸຂຸມາ, ບັນດາສະຫາຍໃນຄະນະປະຈໍາພັກເມືອງ, ກຳມະການພັກເມືອງ, ກອງກໍ່ສ້າງຮາກຖານຂອງແຂວງປະຈຳເມືອງ, ເລຂາຄະນະພັກຮາກຖານກຸ່ມບ້ານ, ເລຂາພັກບ້ານໃຫ່ຍ, ສະມາຊິກພັກສົມບູນ ແລະສໍາຮອງພ້ອມດ້ວຍນັກທຸລະກິດ ເຂົ້າຮ່ວມ 198 ສະຫາຍ, ຍີງ 48 ສະຫາຍ.

ກອງປະຊຸມ, ໄດ້ຮັບຟັງ ແລະ ເຊື່ອມຊຶມ ເອກະສານສໍາຄັນຂອງສູນກາງພັກ ແລະ ລັດຖະບານ ຈໍານວນ 6 ສະບັບຄື: ມະຕິກອງປະຊຸມ ຄົບຄະນະຄັ້ງທີ 8 ຂອງຄະນະບໍລິຫານງານສູນກາງພັກ ສະໄໝທີXI, ມະຕິຂອງກົມການເມືອງສູນກາງພັກ ສະບັບເລກທີ 04/ກມ.ສພ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໄໝ່ ບັນລະຍາຍໂດຍ ສະຫາຍ ແກ້ວລັດຕະນະ ສີຫາວົງ ຄະນະປະຈໍາພັກແຂວງ; ຈາກນັ້ນ, ກອງປະຊຸມໄດ້ຮັບຟັງເຊື່ອມຊຶມ ເອກະສານກ່ຽວກັບ ຄຳແນະເລກທີ 700/ຄອສພ, ຄຳສັ່ງແນະນຳເລກທີ02/ຄຈ,ພຂ.ຈສ ແລະ ມະຕິຂອງລັດຖະບານສະບັບເລກທີ05/ລບ,ວ່າດ້ວຍການແບ່ງຄວາມຮັບຜິດຊອບການຈັດຕັ້ງຜັນຂະຫຍາຍມະຕິລັດຖະບານ ສະບັບເລກທີ05/ລບ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງ ບັນລະຍາຍໂດຍ ສະຫາຍ ສົມເພັດ ບຸດສະດີກໍາມະການພັກແຂວງ. ໂອກາດດຽວກັນ, ສະຫາຍ ສົມສະໜິດ ສີສັງວອນ ຄະນະປະຈຳພັກເມືອງ ໄດ້ຂື້ນຜ່ານມະຕິຂອງຄະນະປະຈຳພັກເມືອງ ວ່າດ້ວຍການແບ່ງຄວາມຮັບຜິດຊອບ ການຈັດຕັ້ງຜັນຂະຫຍາຍເອກະສານສໍາຄັນຂອງສູນກາງພັກ ແລະ ລັດຖະບານ ທີ່ນໍາມາເຜີຍແຜ່ເຊື້ອມຊຶມ ໃນກອງປະຊຸມຄັ້ງນີ້ ເພື່ອໃຫ້ຄະນະຮັບຜິດຊອບນໍາໄປຈັດຕັ້ງຜັນຂະຫຍາຍລົງສູ້ຮາກຖານຂັ້ນຕ່າງໆຂອງເມືອງ.

ໃນໂອກາດດັ່ງກ່າວ, ສະຫາຍ ແກ້ວລັດຕະນະ ສີຫາວົງ ຄະນະປະຈໍາພັກແຂວງ, ປະທານກອງປະຊຸມ ໄດ້ມີຄໍາເຫັນໂອ້ລົມ ແລະ ເນັ້ນໜັກໃຫ້ຄະນະພັກເມືອງ, ຄະນະພັກຮາກຖານກຸ່ມບ້ານ, ສະມາຊິກພັກ ຂອງເມືອງສຸຂຸມາ ຈົ່ງເພີ່ມທະວີໃນການຈັດຕັ້ງປະຕິບັດວຽກງານການຄົ້ນຄວ້າ, ເຊື່ອມຊຶມ, ກໍາແໜ້ນ ບັນດາເນື້ອໃນຈິງໃຈເອກະສານສໍາຄັນຂອງສູນການພັກ ທີ່ນໍາມາເຜີຍແຜ່ເຊື່ອມໃນກອງປະຊຸມຄັ້ງນີ້ ໃຫ້ເລິກເຊິ່ງ ແລະ ຖືເປັນໜ້າທີ່, ຄວາມຮັບຜິດຊອບການເມືອງ ໃນການຈັດຕັ້ງຜັນຂະຫຍາຍເຂົ້າສູ່ວຽກງານຂອງຂະແໜງການ ແລະ ທ້ອງຖິ່ນ; ເພີ່ມທະວິການຈັດຕັ້ງປະຕິບັດວຽກງານການຫັນລົງກໍ່ສ້າງຮາກຖານໃຫ້ແຂງແຮງ, ໜັກແໜ້ນ ແລະ ເປັນກໍາລັງແຮງໃຫ້ແກ່ການຂັບເຄື່ອນຂອງລະບົບການເມືອງ; ເພີ່ມທະວີການນໍາພາເດັດຂາດ, ໂດຍກົງ, ຮອບດ້ານ ຂອງພັກ ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ມີຄວາມເຂັ້ມແຂງ, ໜັກແໜ້ນ, ມີແບບແຜນວິທີ່ຈັດຕັ້ງປະຕິບັດໜ້າທີ່ວຽກງານ ຮັບປະກັນຄວາມສະຫງົບຂອງທ້ອງຖິ່ນ ແລະ ສືບຕໍ່ເສີ່ມຂະຫຍາຍສິດເປັນເຈົ້າຂອງປະຊາຊົນ, ສ້າງເງື່ອນໄຂໃຫ້ປະຊາຊົນເຂົ້າຮ່ວມ ແລະ ມີສ່ວນຮ່ວມໃນການຈັດຕັ້ງປະຕິບັດວຽກງານການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ, ສ້າງເງື່ອນໄຂສະພາບແວດລ້ອມທີ່ເອື້ອອໍານວຍໃຫ້ແກ່ການພັດທະນາປະເທດຊາດ.

(ຂ່າວ-ພາບ: ປັນຍາ ແກ້ວພິລົມ ແລະ ສົມວິຈິດ ໄຊມົນຕີ)