ລະຫວ່າງວັນທີ 25-27 ກັນຍາ 2023 ນີ້, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງເຊກອງ ເຊິ່ງນຳໂດຍ ທ່ານ ນາງ ທັດສະດາພອນ ຈັນທະມາດ ຮອງປະທານກຳມາທິການບັນດາເຜົ່າສະພາແຫ່ງຊາດ ສະມະຊິກສະພາແຫ່ງຊາດ ປະຈຳເຂດເລືອກຕັ້ງທີ 16, ທ່ານ ນາງ ໄຮມະນີ ວົງໜໍ່ແກ້ວ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16, ປະທານກຳມະການວັດທະນະທຳ-ສັງຄົມ ແລະ ບັນດາເຜົ່າສະພາປະຊາຊົນແຂວງ, ທ່ານ ເພັງນາ ຈັນທະພອນ ເລຂາພັກເມືອງ ເຈົ້າເມືອງດາກຈຶງ ທັງເປັນສະມາຊິກສະພາປະຊາຊົນແຂວງເຊກອງ ປະຈຳເຂດເລືອກຕັ້ງເມືອງດາກຈຶງ ພ້ອມດ້ວຍຄະນະ ໄດ້ລົງຜັນຂະຫຍາຍມະຕິກອງປະຊຸມ ສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງເຊກອງ ຊຸດທີ II ໃຫ້ແກ່ຄະນະປະຈໍາພັກເມືອງ, ກໍາມະການພັກເມືອງ, ສອງກຳລັງປະກອບອາວຸດ, ຫົວໜ້າຫ້ອງການ, ອົງການທຽບເທົ່າ ແລະ ພະນັກງານນໍາພາຫຼັກແຫຼ່ງຂັ້ນເມືອງ ພ້ອມດ້ວຍພໍ່ແມ່ປະຊາຊົນບ້ານຊຽງຫຼວງ, ບ້ານມັງຫາ ແລະ ບ້ານພາຍໃນເທດສະບານເມືອງດາກຈຶງ.
ທ່ານ ນາງ ທັດສະດາພອນ ຈັນທະມາດ ໃຫ້ຮູ້ວ່າກອງປະຊຸມ ສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງເຊກອງ ຊຸດທີ II, ແມ່ນເຫດການ ການເມືອງທີ່ສໍາຄັນທາງປະຫວັດສາດຂອງພັກເຮົາ, ເປັນກອງປະຊຸມສືບຕໍ່ຢຶດໝັ້ນ ແລະ ເພີ່ມເຕີມເສີມຂະຫຍາຍແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກເຂົ້າສູ່ລວງເລິກ ແລະ ກໍານົດທັດສະນະແຫ່ງການສ້າງການຫັນປ່ຽນຢ່າງແຂງແຮງຕໍ່ການນໍາພາ-ຊີ້ນໍາປົກປັກຮັກສາ ແລະສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງກ້າວຂຶ້ນສູ່ຈຸດໝາຍສັງຄົມນິຍົມ ຕາມທີ່ພັກ-ລັດເຮົາວາງໄວ້; ການຈັດຕັ້ງເຊື່ອມຊຶມຄັ້ງນີ້ ກໍເພື່ອແນໃສ່ເຮັດໃຫ້ພະນັກງານນໍາພາຫຼັກແຫຼ່ງ, ພະນັກງານນໍາພາຄຸ້ມຄອງແຕ່ລະຂັ້ນ ພ້ອມດ້ວຍພໍ່ແມ່ປະຊາຊົນໃນທົ່ວເມືອງໄດ້ຮັບຮູ້ ເຂົ້າໃຈຢ່າງເລິກເຊິ່ງ ແລະກໍາແໜ້ນເນື້ອໃນ ມະຕິທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ຈຳນວນ 10 ມະຕິ ແລະ ມະຕິກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງເຊກອງ ຊຸດທີ II ຈຳນວນ 12 ມະຕິ, ໂດຍສະເພາະແມ່ນເນື້ອໃນສໍາຄັນຕົ້ນຕໍ ແລະ ວຽກງານຈຸດສຸມທີ່ຕ້ອງເອົາໃຈໃສ່ນໍາພາ-ຊີ້ນໍາຢູ່ໃນແຕ່ລະຂົງເຂດວຽກງານຕາມຄວາມຮັບຜິດຊອບ, ຕິດພັນກັບການເສີມຂະຫຍາຍຄວາມເປັນເຈົ້າການໃນການນໍາພາ-ຊີ້ນໍາຈັດຕັ້ງປະຕິບັດໃຫ້ເປັນແຜນງານ, ເປັນໂຄງການ ແລະ ກິດຈະກໍາລະອຽດໃນແຕ່ລະຂະແໜງການ ແລະ ອົງການປົກຄອງບ້ານຂອງຕົນ, ເພື່ອຈັດຕັ້ງປະຕິບັດໃຫ້ເກີດດອກອອກຜົນຕົວຈິງ, ສ້າງໄດ້ຜົນສໍາເລັດໃໝ່ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືເມືອງດາກຈຶງ ແຂວງເຊກອງ; ກອງປະຊຸມຍັງໄດ້ຮັບຟັງການລາຍງານສະພາບລວມການນຳພາ-ຊີ້ນຳວຽກງານຮອບດ້ານຂອງອົງການປົກຄອງບ້ານ, ເຂດຈຸດສຸມພັດທະນາ ແລະ ຮັບຟັງຂໍ້ຄິດເຫັນ, ຂໍ້ສະເໜີຈາກພໍ່ແມ່ປະຊາຊົນ.
ຈາກນັ້ນ ທ່ານ ນາງ ທັດສະດາພອນ ຈັນທະມາດ ພ້ອມດ້ວຍຄະນະ ກໍໄດ້ລົງຕິດຕາມ, ຊຸກຍູ້ ແລະ ຮັບຟັງລາຍງານຄວາມຄືບໜ້າໃນການປະຕິບັດວຽກງານຂອງບັນດາໂຄງການລົງທຶນໃນເມືອງດາກຈຶງ ເຊັ່ນ: ໂຄງການ ເຂື່ອນໄຟຟ້ານ້ຳອີ່ມູນ, ໂຄງການ ອຸດສາຫະກຳບົກຊິດ-ອາລູມີນາ ແລະ ໂຄງການ ໄຟຟ້າພະລັງງານລົມ ມອນຊູນວິນ 600 ເມກາວັດ, ເປັນຕົ້ນແມ່ນ ຮັບຟັງການປະຕິບັດຊົດເຊີຍແກ່ປະຊາຊົນທີ່ໄດ້ຮັບຜົນກະທົບ, ການສ້າງວຽກເຮັດງານທຳໃຫ້ແກ່ປະຊາຊົນໃນພື້ນທີ່ ເພື່ອເປັນການສ້າງອາຊີບທີ່ໝັ້ນຄົງ ເຮັດໃຫ້ປະຊາຊົນມີຊີວິດການເປັນຢູ່ດີຂຶ້ນເທື່ອລະກ້າວ.#ຂ່າວ-ພາບ: ພຸດທະໄຊ ຍົວມະນີ
#ກວດແກ້: ອິນແປງ ພົມມະນິດ