ວັນທີ 2 ສິງຫາ 2024 ນີ້, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14 ແລະ ສະມາຊິກສະພາປະຊາຊົນແຂວງສາລະວັນ ປະຈໍາເຂດເລືອກຕັ້ງເມືອງ ສົມທົບກັນເຄື່ອນໄຫວພົບປະຜູ້ມີສິດເລືອກຕັ້ງຂອງຕົນ ແລະ ໂຄສະນາເຜີຍແຜ່ມະຕິກອງປະຊຸມສະໄໝສາມັນຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງສາລະວັນ ຊຸດທີ II ຢູ່ທີ່ເທດສະບານ ສະໂມສອນຂອງເມືອງຄົງເຊໂດນ ແລະ ເມືອງເທດສະບານ ສະໂມສອນເມືອງວາປີ ແຂວງສາລະວັນ; ຄະນະສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ຈັດແບ່ງຄະນະລົງເຄື່ອນໄຫວເປັນ ສອງ ທີມຄື: ຄະນະທີ 1 ນໍາໂດຍ ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14 ປະທານສະພາປະຊາຊົນແຂວງສາລະວັນ, ມີທ່ານ ຄໍາສິງ ໄຊສົມແພງ ຮອງປະທານກໍາມາທິການວຽກງານສະມາຊິກສະພາແຫ່ງຊາດ, ຮ່ວມມີບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ກອງເລຂາຕິດຕາມຄະນະ ເຄື່ອນໄຫວຢູ່ທີ່ເມືອງຄົງເຊໂດນ; ເມືອງວາປີ ນໍາໂດຍ ທ່ານ ຂັນໄຊ ລັດຖະເຮົ້າ ຄະນະປະຈໍາພັກແຂວງ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14 ຮອງປະທານສະພາປະຊາຊົນແຂວງສາລະວັນ, ມີທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການ-ສັງຄົມສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14, ຮ່ວມມີບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ກອງເລຂາຕິດຕາມຄະນະ ເຄື່ອນໄຫວຢູ່ທີ່ເມືອງວາປີ; ໄດ້ຮັບການຕ້ອນຮັບຈາກຄະນະນໍາຂອງເມືອງ, ບັນດາຕາງໜ້າຈາກອົງການປົກຄອງເມືອງ, ພະນັກງານ-ລັດຖະກອນ, ທະຫານ, ຕໍາຫຼວດ, ຄະນະພັກບ້ານ, ນາຍບ້ານອ້ອມຂ້າງເມືອງ ແລະ ພໍ່ແມ່ປະຊາຊົນຜູ້ມີສິດເລືອກຕັ້ງຂອງສອງເມືອງດັ່ງກ່າວ;

ການເຄື່ອນໄຫວໃນຄັ້ງນີ້, ໄດ້ຮັບຟັງການບົດລາຍງານ ໂດຍຫຍໍ້ ກ່ຽວກັບວຽກງານທີ່ພົ້ນເດັ່ນ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໄລຍະ 6 ເດືອນຕົ້ນປີ 2024 ຂອງທ່ານເຈົ້າເມືອງຄົງເຊໂດນ ແລະ ເມືອງວາປີ; ຈາກນັ້ນ,ບັນດາທ່ານ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ໄດ້ຜັດປ່ຽນກັນນຳສະເໜີບັນດາເນື້ອໃນມະຕິສຳຄັນຕ່າງໆທີ່ຮັບຮອງເອົາໃນກອງປະຊຸມສະພາແຫ່ງຊາດ, ສະພາປະຊາຊົນແຂວງ ຢ່າງເປັນເຈົ້າການຕາມພາລະບົດບາດ, ສິດ ແລະ ໜ້າທີ່ທີ່ໄດ້ກຳນົດໄວ້ໃນກົດໝາຍ ຂອງສະພາແຫ່ງຊາດ, ສະພາປະຊາຊົນແຂວງ; ໂອກາດດຽວກັນທ່ານປະທານກອງປະຊຸມຍັງໄດ້ເປີດໂອກາດໃຫ້ຜູ້ເຂົ້າຮ່ວມຮັບຟັງ ມີການແລກປ່ຽນ, ສົນທະນາ, ຖາມ-ຕອບກັບທີ່ຕໍ່ກັບບັນຫາຕ່າງທີ່ທີ່ເກີດຂຶ້ນຕົວຈິງໃນວຽກງານ ແລະ ຊີວິດການເປັນຢູ່ທີ່ຍັງບໍ່ທັນໄດ້ຮັບການແກ້ໄຂ.

ພາບ-ຂ່າວ: ດີລໍາພົນ ພົມມະຈັນ