(ສພຂ) – ວັນທີ 24-27 ພະຈິກຜ່ານມາ ໄດ້ມີຈັດກອງປະຊຸມເຝິກອົບຮົມເພື່ອຄວາມຮັບຮູ້ ແລະ ເຂົ້າໃຈຕໍ່ພາລະບົດບາດຂອງສະພາແຫ່ງຊາດ, ສະພາປະຊາຊົນຂັ້ນແຂວງ, ວຽກງານໂຄງປະກອບກົງຈັກການຈັດຕັ້ງ ແລະ ບຸກຄະລາກອນຂອງສະພາປະຊາຊົນຂັ້ນແຂວງ ແລະ ວຽກງານກະກຽມດໍາເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ V ໃຫ້ແກ່ເລຂາ-ຮອງເລຂາພັກແຂວງ-ເມືອງ, ປະທານຄະນະກໍາມະການປົກຄອງແຂວງ-ເມືອງ, ສະມາຊິກສະພາແຫ່ງຊາດ (ສສຊ), ສະມາຊິກສະພາປະຊາຊົນແຂວງ (ສສຂ), ພະນັກງານ-ລັດຖະກອນພາຍໃນສະພາປະຊາຊົນແຂວງ (ສພຂ) ແລະ ພາກສ່ວນທີ່ກ່ຽວຂ້ອງ ຢູ່ 3 ແຂວງຄື: ຈຳປາສັກ, ອັດຕະປື ແລະ ເຊກອງ ໂດຍການເປັນປະທານຮ່ວມຂອງທ່ານ ສຸບັນ ສະວະບຸດ ກໍາມະການຄະນະປະຈໍາສະພາແຫ່ງຊາດ (ຄປຈສພຊ), ປະທານກໍາມາທິການວຽກງານສະມາຊິກສະພາແຫ່ງຊາດ ແລະ ທ່ານ ປະທານສະພາປະຊາຊົນແຂວງ 3 ແຂວງດັ່ງກ່າວ.
ທັງນີ້, ກໍເພື່ອເຜີຍແຜ່, ໂຄສະນາກ່ຽວກັບພາລະບົດບາດ, ສິດ ແລະ ໜ້າທີ່ຂອງ ສພຊ ກໍຄື ສພຂ ແນໃສ່ສ້າງຄວາມຮັບຮູ້, ເຂົ້າໃຈຕໍ່ວຽກງານດັ່ງກ່າວ ໃຫ້ມີຄວາມເລິກເຊິ່ງ ທັງຊຸກຍູ້, ແນະນໍາ ແລະ ສ້າງຄວາມເປັນເອກະພາບ ກ່ຽວກັບໂຄງປະກອບກົງຈັກການຈັດຕັ້ງ ແລະ ບຸກຄະລາກອນຂອງ ສພຂ, ການກະກຽມໃຫ້ແກ່ການດໍາເນີນການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ພ້ອມທັງເປັນຂໍ້ມູນ, ບ່ອນອີງໃຫ້ແກ່ການຄົ້ນຄວ້າ, ປັບປຸງກົງຈັກການຈັດຕັ້ງຂອງສະພາໃນຊຸດຕໍ່ໄປ ໃຫ້ເປັນລະບົບ, ມີຄວາມເປັນເອກະພາບ ແລະ ສອດຄ່ອງກັບກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ ແລະ ຮັບປະກັນໃຫ້ແກ່ການເສີມຂະຫຍາຍ ແລະ ການຍົກສູງບົດບາດການນໍາພາຂອງພັກ ເວົ້າລວມ, ເວົ້າສະເພາະການຍົກສູງບົດບາດຂອງສະພາ ໃຫ້ມີຄວາມເຂັ້ມແຂງ, ເລິກເຊິ່ງ, ຮອບດ້ານ ສົມຄູ່ກັບການເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ.
ກອງປະຊຸມໄດ້ຮັບຟັງການສະເໜີພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ການຄົ້ນຄວ້າໂຄງປະກອບກົງຈັກການຈັດຕັ້ງ, ບຸກຄະລາກອນຂອງສະພາປະຊາຊົນຂັ້ນແຂວງ, ການກະກຽມ ແລະ ດໍາເນີນການເລືອກຕັ້ງ ສສຊ ແລະ ສສຂ ຊຸດຕໍ່ໄປ ຕາມເນື້ອໃນຄໍາແນະນໍາຂອງຄະນະປະຈໍາສະພາແຫ່ງຊາດ ສະບັບເລກທີ 19/ຄປຈ.ສພຊ, ລົງວັນທີ 26 ສິງຫາ 2025. ຈາກນັ້ນ, ໄດ້ພ້ອມກັນປະກອບຄໍາເຫັນຢ່າງມີບັນຍາກາດຟົດຟື້ນ ສາມາດຍົກໃຫ້ເຫັນຂໍ້ຫຍຸ້ງຍາກ, ບົດຮຽນທີ່ຖອດຖອນໄດ້ ຂອງທ້ອງຖິ່ນ ແລະ ສູນກາງ ໃນການຈັດ ຕັ້ງປະຕິບັດວຽກງານໃນໄລຍະຜ່ານມາ ໂດຍສະເພາະບັນດາເນື້ອໃນນິຕິກໍາທີ່ຈະເປັນບ່ອນອີງ ເພື່ອໃຫ້ມີຄວາມຖືກຕ້ອງສອດຄ່ອງຕາມລັດຖະທໍາມະນູນ ແລະ ກົດໝາຍ.
ທ່ານ ສຸບັນ ສະວະບຸດ ໄດ້ເນັ້ນໜັ້ກໃຫ້ທຸກພາກສ່ວນ ເຜີຍແຜ່ເຊື່ອມຊຶມວຽກງານເລືອກຕັ້ງໃຫ້ກວ້າງຂວາງທົ່ວສັງຄົມ ທັງຮີບຮ້ອນຄົ້ນຄວ້າແຕ່ງຕັ້ງຄະນະກຳມະການເລືອກຕັ້ງລະດັບທ້ອງຖິ່ນຂອງຕົນ ໃຫ້ມີຄວາມຖືກຕ້ອງ, ສອດຄ່ອງຕາມກົດໝາຍ, ຄໍາແນະນໍາຂອງ ຄປຈສພຊ ແລະ ຄົ້ນຄວ້າໄວ້ແຕ່ຫົວທີ ກ່ຽວກັບເປົ້າໝາຍບຸກຄະລາກອນທີ່ຈະລົງສະໝັກຮັບເລືອກຕັ້ງເປັນ ສສຊ ແລະ ສສຂ ຊຸດຕໍ່ໄປ ແລະ ພ້ອມກັນສະໜັບສະໜູນ, ຊ່ວຍເຫຼືອ ຕໍ່ການເຄື່ອນໄຫວຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງ ສພຂ ຊຸດທີ V ທີ່ໄດ້ກຳນົດໄວ້ໃນລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ໃຫ້ມີຄວາມເຂັ້ມແຂງ, ໜັກແໜ້ນເທື່ອລະກ້າວ.
(ສົມວິຈິດ ໄຊມົນຕີ, ວິນັດ ສີສຸລາດ ແລະ ນາງ ນາລີວັນ)