(ສພຊ) – ວັນທີ 29-31 ມັງກອນ 2025 ທີ່ທ່າລາດ ແຂວງວຽງຈັນ, ໄດ້ມີກອງປະຊຸມເຝິກອົບຮົມເຕັກນິກການບໍລິຫານ-ນຳພາອົງກອນ ແລະ ການຮ່າງເອກະສານ ໃຫ້ພະນັກງານສະພາປະຊາຊົນຂັ້ນແຂວງ (ສພຂ) ໂດຍການເປັນປະທານຂອງທ່ານ ສິນທະລາ ຫຼ້າສຸກສະໄໝ ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ ເຊິ່ງມີວິທະຍາກອນຮັບເຊີນຈາກຄະນະເລຂາທິການສະພາແຫ່ງຊາດ, ຫ້ອງວ່າການສູນກາງພັກ ແລະ ມະຫາວິທະຍາໄລແຫ່ງຊາດ, ສໍາມະນາກອນທີ່ມາຈາກ ສພຂ ທັງ 18 ແຂວງ ພ້ອມດ້ວຍຄະນະຮັບຜິດຊອບ ແລະ ກອງເລຂາກອງປະຊຸມ ເຂົ້າຮ່ວມ 50 ກວ່າທ່ານ.

ທ່ານ ສິນທະລາ ຫຼ້າສຸກສະໄໝ ໄດ້ກ່າວເປີດກອງປະຊຸມວ່າ: ການເຝິກອົບຮົມຄັ້ງນີ້ ເພື່ອຍົກສູງຂີດຄວາມສາມາດໃຫ້ແກ່ສໍາມະນາກອນ ໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ໃຫ້ມີປະສິດທິຜົນ ແນ ໃສ່ເຮັດໃຫ້ພະນັກງານ-ລັດຖະກອນທີ່ເປັນເສນາທິການ ມີຄວາມຊໍານານງານ-ຊ່ຽວຊານ ແລະ ເປັນມືອາຊີບ. ຕະ ຫຼອດໄລຍະການເຄື່ອນໄຫວໜ້າທີ່ວຽກງານຕົວຈິງ, ເຊື່ອໄດ້ວ່າສໍາມະນາກອນກໍລ້ວນແຕ່ມີບົດຮຽນ, ປະສົບປະ ການ ບໍ່ວ່າຈະເປັນການເຂົ້າຮ່ວມເຝິກອົບຮົມ, ຍົກລະດັບໃນແຕ່ລະຂັ້ນຕ່າງໆ; ແຕ່ການເຂົ້າຮ່ວມຍົກລະດັບຄວາມຮັບຮູ້ ກໍຄືການສ້າງຄວາມເຂັ້ມແຂງໃຫ້ແກ່ພະນັກງານ-ລັດຖະກອນສະພາປະຊາຊົນຂັ້ນແຂວງໃນຄັ້ງນີ້ ຖືວ່າເປັນການຮຽນຮູ້ເອົາບົດຮຽນ, ຫຼັກການອັນໃໝ່ໆ ຈາກວິທະຍາກອນຜູ້ທີ່ມີບົດຮຽນ, ປະສົບການໃນການສິດສອນ ກໍຄືການລົງເລິກວຽກງານອັນສະເພາະຢ່າງຫຼາກຫຼາຍພໍສົມຄວນ ແລະ ຈະເປັນໂອກາດດີທີ່ຈະໄດ້ແລກປ່ຽນຄວາມເຫັນ, ຖອດຖອນບົດຮຽນ ແລະ ປະສົບການເຊິ່ງກັນແລະກັນ, ທັງນີ້ ກໍເພື່ອຖ່າຍທອດໃຫ້ແກ່ພະນັກງານເສນາທິການ ກໍຄືພະນັກງານຜູ້ສືບທອດ ເພື່ອສ້າງຄວາມເຂັ້ມແຂງໃຫ້ແກ່ສະພາປະຊາຊົນຂັ້ນແຂວງໃນປັດຈຸບັນ ແລະ ຕໍ່ໜ້າ.

ບັນດາຜູ້ເຂົ້າຮ່ວມໄດ້ຮັບຟັງການສະເໜີເຕັກນິກການບໍລິຫານ ແລະ ນໍາພາອົງກອນ, ການຮ່າງບົດຄໍາເຫັນ ແລະ ບົດໂອ້ລົມຂອງການນໍາ, ການສ້າງຮ່າງມະຕິກອງປະຊຸມ ແລະ ການສັງລວມຄໍາເຫັນຂອງປະທານຢູ່ໃນກອງປະຊຸມ; ຈາກນັ້ນ, ສຳມະນາໄດ້ຄົ້ນຄວ້າ, ແລກປ່ຽນປະກອບຄວາມຄິດເຫັນຢ່າງກົງໄປກົງມາ ແລະ ເຝິກແອບເຮັດບົດເຝິກຫັດຕົວຈິງ.

ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກມູນນິທິເອເຊຍ (The Asia Foundation – TAF) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະເລຂາທິການສະພາແຫ່ງຊາດ.

(ນາງ ກຸກກິກ ບຸດດາໄຊ)