(ສພຊ) – ກອງປະຊຸມເຝິກອົບຮົມວຽກງານໄອທີ ໃຫ້ແກ່ພະນັກງານ-ລັດຖະກອນພາຍໃນສະພາແຫ່ງຊາດ (ສພຊ) ແລະ ສະພາປະຊາຊົນແຂວງ (ສພຂ) 9 ແຂວງຄື: ນະຄອນຫຼວງວຽງຈັນ, ຜົ້ງສາລີ, ຫຼວງນຳ້ທາ, ອຸດົມໄຊ, ບໍ່ແກ້ວ, ຫຼວງພະບາງ, ໄຊຍະບູລີ, ຫົວພັນ ແລະ ຊຽງຂວາງ ໂດຍການເປັນປະທານຂອງທ່ານ ນາງ ອຳໄພວອນ ລ້ອມບຸນແພງ ເລຂາທິການສະພາແຫ່ງຊາດ ເຊິ່ງມີວິທະຍາກອນຈາກ ສພຊ, ກະຊວງເຕັກໂນໂລຊີ ແລະ ການສື່ສານ, ທີ່ປຶກສາວຽກງານໄອຊີທີປະຈໍາໂຄງການສະເຕັບສ໌ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ; ທັງນີ້, ກໍເພື່ອ​ການຫັນເປັນດິຈິຕອນເທື່ອລະກ້າວ ໂດຍສະເພາະແມ່ນການນຳໃຊ້ລະບົບໄອທີ ແລະ ສິ່ງອຳນວຍຄວາມສະດວກຕ່າງໆ ເຂົ້າໃນການປະຕິ ບັດໜ້າທີ່ວຽກງານຂອງພະນັກງານ-ລັດຖະກອນ ສພຊ ແລະ ສພຂ ໃຫ້ມີຄວາມວ່ອງໄວ, ທັນສະໄໝຂຶ້ນ.

ບັນດາຜູ້ເຂົ້າຮ່ວມໄດ້ຮັບຟັງການແນະນຳລະບຽບການຄຸ້ມຄອງ, ນຳໃຊ້ຫ້ອງປະຊຸມສະພາແຫ່ງຊາດ ແລະ ສິ່ງອຳນວຍຄວາມສະດວກດ້ານອຸປະກອນໄອທີ; ການສ້າງຄວາມເຂັ້ມແຂງດ້ານວຽກງານໄອຊີທີ ໃຫ້ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຕາມບຸລິມະສິດການຫັນເປັນທັນສະໄໝຂອງສະພາແຫ່ງຊາດ; ການນໍາໃຊ້ລະບົບຈັດເກັບ ແລະ ການນໍາໃຊ້ຂໍ້ມູນຮ່ວມກັນຂອງພາກລັດ (G-Share, G-Drive); ການນຳໃຊ້ລະບົບສື່ສານພາກລັດ (G-Chat ); ການຕິດຕັ້ງແອັບພລິເຄເຊິນ G-Share, G-Drive ແລະ G-Chat ຜ່ານທາງໂທລະສັບມືຖືສະມາດໂຟນ ແລະ ແທັບເລັດ (tablet); ລະບົບບໍລິການພາກລັດປະຕູດຽວ (Gov-X). ຈາກນັ້ນ, ກໍໄດ້ແລກປ່ຽນຖາມ-ຕອບຢ່າງກົງໄປກົງມາ ທັງໄດ້ລົງທະບຽນສະໝັກເຂົ້ານຳໃຊ້, ທົດລອງນຳໃຊ້ຕົວຈິງໃນການເຂົ້າລະບົບ, ຊອກຄົ້ນບັນດາຂໍ້ມູນທີ່ຕ້ອງ ການ, ວິທີບຳລຸງຮັກສາລະບົບດັ່ງກ່າວ ໃຫ້ມີຄວາມປອດໄພ ເພື່ອເຮັດໃຫ້ສາມາດເຂົ້າໃຈຢ່າງຈະແຈ້ງ ແລະ ນຳໃຊ້ໄດ້ຢ່າງຄ່ອງຕົວ ເພື່ອຈະສືບຕໍ່ນຳເອົາບົດຮຽນໃນຄັ້ງນີ້ ໄປເຝິກຕໍ່ໃຫ້ແກ່ພະນັກງານ-ລັດຖະກອນໃນຂົງເຂດຂອງຕົນ ສາ ມາດຮັບປະກັນໃນການຄົ້ນຄວ້າ ແລະ ສະໜອງຂໍ້ມູນໃຫ້ມີຄວາມວ່ອງໄວ ແລະ ໄດ້ຮັບຂໍ້ມູນຖືກຕ້ອງ.

ການເຝິກອົບຮົມຄັ້ງນີ້ ຈັດຂຶ້ນທີ່ເມືອງວັງວຽງ ແຂວງວຽງຈັນ ໃນວັນທີ 24-26 ສິງຫາ 2024 ໂດຍໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະ ພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະ​ເລຂາທິການ​ສະພາ​ແຫ່ງ​ຊາດ.

(ອານຸສອນ ພູມມີທອນ)