(ສພຊ) ວັນທີ 3 ມິຖຸນາ 2023 ທີ່ເມືອງວັງວຽງ ແຂວງວຽງຈັນ, ສະພາແຫ່ງຊາດ ໄດ້ຈັດກອງປະຊຸມເຝິກອົບຮົມວຽກງານເລຂານຸການໃຫ້ແກ່ເລຂາການນຳພາຍໃນສະພາແຫ່ງຊາດ ໂດຍການເປັນປະທານຂອງທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ; ໂດຍການເຂົ້າຮ່ວມຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ; ມີທ່ານຮອງເລຂາທິການສະພາແຫ່ງຊາດ, ນັກວິທະຍາກອນຈາກສະຖາບັນການເມືອງ ແລະ ການປົກຄອງແຫ່ງຊາດ, ວິທະຍາໄລເຕັກນິກປາກປ່າສັກ, ກົມພິທີການທູດ ກະຊວງການຕ່າງປະເທດ, ຫ້ອງວ່າການສູນກາງພັກ ແລະ ຈາກສະພາແຫ່ງຊາດ; ມີຄະນະກົມ, ຄະນະພະແນກ, ເລຂາການນຳ ແລະ ພະນັກງານ-ວິຊາການ ທີ່ກ່ຽວຂ້ອງ. ກອງປະຊຸມຄັ້ງນີ້ ໄດ້ຮັບການສະໜັບສະໜູນຈາກ UNDP ແລະ ຄະນະເລຂາທິການສະພາແຫ່ງຊາດ.

ທັງນີ້, ເພື່ອເຮັດໃຫ້ການເປັນເສນາທິການ ໃນວຽກງານກະກຽມ ແລະ ຮັບໃຊ້ ໂດຍສະເພາະການເກັບກຳ ແລະ ສະໜອງຂໍ້ມູນ-ຂ່າວສານ ໃຫ້ແກ່ການນໍາສະພາແຫ່ງຊາດ ໃຫ້ມີປະສິດທິພາບດີຂຶ້ນເລື້ອຍໆ ແລະ ສ້າງຄວາມເປັນເອກະພາບກັນ ໃນການຈັດຕັ້ງປະຕິບັດວຽກງານດ້ານຕ່າງໆ; ການປະສານງານວຽກງານດ້ານຕ່າງໆ; ເພື່ອຮັບຟັງບົດຮຽນກ່ຽວກັບການເປັນເລຂາການນໍາ ກັບພາກສ່ວນກ່ຽວຂ້ອງ ລວມທັງທັດສະນະ ຄຸນສົມບັດຂອງເລຂາການນໍາ ທັງເພື່ອຮັບຟັງ ແລະ ແລກປ່ຽນຄຳຄິດຄຳເຫັນ ແລະ ສະເໜີວິທີການແກ້ໄຂບັນຫາຕ່າງໆ ໃນການປະຕິບັດວຽກງານຕົວຈິງຜ່ານມາ ທີ່ມີທັງດ້ານດີ, ດ້ານອ່ອນ ແລະ ຂໍ້ຄົງຄ້າງ ທີ່ພາໃຫ້ການຈັດຕັ້ງປະຕິບັດວຽກງານບໍ່ທັນໄດ້ຮັບຜົນດີເທົ່າທີ່ຄວນ.

ໃນພິທີ, ທ່ານ ນາງ ປິ່ງຄຳ ລາຊະສິມມາ ໄດ້ກ່າວເປີດກອງປະຊຸມວ່າ: ກອງປະຊຸມເຝິກອົບຮົມວຽກງານເລຂານຸການ ໃຫ້ແກ່ເລຂາການນໍາພາຍໃນສະພາແຫ່ງຊາດຄັ້ງນີ້ ແມ່ນຈະໄດ້ສຸມໃສ່ຄົ້ນຄວ້າແລກປ່ຽນສົນທະນາ ແລະ ຈັດຕັ້ງແບ່ງກຸ່ມ ເພື່ອລົງເລິກເຝິກຫັດ ເຊິ່ງບັນດາເນື້ອໃນທີ່ນຳມາເຝິກອົບຮົມຄັ້ງນີ້ ລ້ວນແຕ່ເປັນຄວາມຮູ້ ແລະ ນິຕິກຳສຳຄັນ; ພ້ອມນັ້ນ, ທ່ານຍັງໄດ້ຮຽກຮ້ອງມາຍັງບັນດາທ່ານເລຂາການນໍາ, ຄະນະຮັບຜິດຊອບກອງປະຊຸມ ແລະ ບັນດາທ່ານທີ່ເຂົ້າຮ່ວມກອງປະຊຸມເຝິກອົບຮົມທຸກທ່ານ ຈົ່ງເອົາໃຈໃສ່ເຂົ້າຮ່ວມຮັບຟັງ ແລະ ສຸມສະຕິປັນຍາເຂົ້າໃນການຄົ້ນຄວ້າແລກປ່ຽນບົດຮຽນ ຕໍ່ບັນດາເນື້ອໃນທີ່ນໍາມາເຜີຍແຜ່ໃນກອງປະຊຸມຄັ້ງນີ້.

ກອງປະຊຸມ, ໄດ້ຮັບຟັງການສະເໜີບົດຮຽນກ່ຽວກັບພາວະການເປັນຜູ້ນຳ; ວຽກງານເລຂານຸການ, ເອກະສານ ແລະ ການບໍລິຫານຫ້ອງການ; ຄວາມຮູ້ພື້ນຖານກ່ຽວກັບພິທີການທູດ; ບົດຮຽນໃນການສຳເນົາເອກະສານຕ່າງໆ; ການຈໍລະຈອນເອກະສານພາຍໃນສະພາແຫ່ງຊາດ ແລະ ການຈໍລະຈອນເອກະສານຂອງສະພາແຫ່ງຊາດ ອອກສູ່ພາຍນອກ ແລະ ຄວາມຮູ້ພື້ນຖານກ່ຽວກັບພາລະບົດບາດຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ຈາກນັ້ນ, ບັນດາຜູ້ເຂົ້າຮ່ວມ ຍັງໄດ້ສົນທະນາແລກປ່ຽນບົດຮຽນ, ປະສົບການ ເຊິ່ງກັນ ແລະ ກັນ ແລະ ໄດ້ມີການແບ່ງກຸ່ມເພື່ອເຮັດເຝິກຫັດຕົວຈິງ.

ໂອກາດນີ້, ທ່ານ ປອ. ນາງ ສູນທອນ ໄຊຍະຈັກ ໄດ້ມີຄຳເຫັນ ແລະ ໃຫ້ທິດຊີ້ນຳຕໍ່ກອງປະຊຸມວ່າ: ກອງປະຊຸມຄັ້ງນີ້ ດຳເນີນໄປດ້ວຍບັນຍາກາດທີ່ດີ, ມີການສົນທະນາແລກປ່ຽນບົດຮຽນກົງໄປກົງມາຢ່າງສ້າງສັນ ຕໍ່ບັນດາເນື້ອໃນຕ່າງໆ ໂດຍແນໃສ່ເພີ່ມຄວາມຮັບຮູ້, ເຂົ້າໃຈເປັນເອກະພາບ ໃນການຈັດຕັ້ງປະຕິບັດຕົວຈິງ. ການເຄື່ອນໄຫວປະຕິບັດໜ້າທີ່ຂອງບັນດາເລຂາ ທີ່ເປັນເສນາທິການຊ່ວຍວຽກການນໍາສະພາແຫ່ງຊາດໂດຍກົງເປັນວຽກງານທີ່ສຳຄັນ ໃນການສ້າງສິ່ງອໍານວຍຄວາມສະດວກດ້ານຕ່າງໆ ໃຫ້ການເຄື່ອນໄຫວຂອງການນຳສະພາແຫ່ງຊາດ ເຊິ່ງໄລຍະຜ່ານມາ ບັນດາທ່ານກໍໄດ້ມີຜົນສຳເລັດ ເປັນຕົ້ນ ການສ້າງແຜນການ ແລະ ສະຫຼຸບການເຄື່ອນໄຫວ, ການຮ່າງຄຳເຫັນຕາມໜ້າທີ່ ກໍຄືການມອບໝາຍຂອງການນຳ, ການກະກຽມເອກະສານດ້ານຕ່າງໆ, ການກວດກາ ແລະ ເກັບຮັກສາເອກະສານຕ່າງໆຂອງການນຳ; ການລາຍງານວຽກເປັນປົກກະຕິ, ການຮັບເອົາທິດຊີ້ນຳຂອງຂັ້ນເທິງ ເພື່ອປະສານກັບພາກສ່ວນກ່ຽວຂ້ອງຢ່າງທັນການ, ການຕິດຕາມການເຄື່ອນໄຫວປະຕິບັດໜ້າທີ່ວຽກງານຂອງການນຳ, ການຕ້ອນຮັບແຂກລະດັບຕ່າງໆ ແລະ ອື່ນໆ. ວຽກງານດັ່ງກ່າວ ເຖິງວ່າຈະມີຄວາມຫຍຸ້ງຍາກ ແຕ່ເຫັນວ່າບັນດາເລຂາການນໍາຂອງສະພາແຫ່ງຊາດ ກໍໄດ້ມີຄວາມອົດທົນ, ມີຄວາມຮັບຜິດຊອບສູງ, ມີຄວາມພະຍາຍາມແກ້ໄຂ, ມີຄວາມຮັບຜິດຊອບໃຫ້ການຮັບໃຊ້ວຽກງານຕ່າງໆ ໄດ້ຮັບຜົນສຳເລັດໂດຍດີຕະຫຼອດມາ ແລະ ຫວັງຢ່າງຍິ່ງວ່າ ບັນດາທ່ານທີ່ເປັນເສນາທິການໃຫ້ແກ່ການນຳ ນຳເອົາບົດຮຽນຈາກບັນດາທ່ານວິທະຍາກອນທີ່ມີປະສົບການ ໄດ້ຖ່າຍທອດຄວາມຮູ້ຄວາມເຂົ້າໃຈ ທີ່ໄດ້ເຝິກອົບຮົມໃນຄັ້ງນີ້ ເພື່ອໄປໝູນໃຊ້ເຂົ້າໃນການປະຕິບັດໜ້າທີ່ວຽກງານໃຫ້ມີຜົນສຳເລັດ ແລະ ປະສິດທິພາບສູງ.

ກອງປະຊຸມຈະໄດ້ດຳເນີນ ຮອດວັນທີ 5 ມິຖຸນາ 2023 ຈຶ່ງຈະສຳເລັດ.

(ພາບ ແລະ ຂ່າວ: ນາງ ສຸພາວັນ ຫອມສະນິດ)