(ສພຊ) – ວັນເສົາທີ 28 ກັນຍານີ້, ສະພາແຫ່ງຊາດ (ສພຊ) ໄດ້ຈັດເຝິກອົບຮົມວຽກງານພິທີການທູດໃຫ້ແກ່ພັນລະຍາການນຳຂອງ ສພຊ ໂດຍການເປັນປະທານຂອງທ່ານ ນາງ ອຳໄພວອນ ລ້ອມບຸນແພງ ເລຂາທິການສະພາແຫ່ງຊາດ ເຊິ່ງມີທ່ານ ນາງ ເມແກນ ໂຈນສ໌ (Megan Jones) ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ອົດສະຕຣາລີ ປະຈຳ ສປປລາວ, ທ່ານ ດຣ. ນາງ ວິພາວັນ ພົມວິຫານ ພັນລະຍາທ່ານປະທານສະພາແຫ່ງຊາດ, ທ່ານ ນາງ ວຽງເງິນ ໄຂຄຳພິທູນ ພັນລະຍາທ່ານຮອງນາຍົກລັດຖະມົນຕີ (ອາຈານຮັບເຊີນກິດຕິມະສັກ), ວິທະຍາກອນຈາກກົມພິ ທີການທູດ, ກະຊວງການຕ່າງປະເທດ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມຢ່າງພ້ອມພຽງ.
ທ່ານ ນາງ ອຳໄພວອນ ລ້ອມບຸນແພງ ມີຄຳເຫັນກ່າວເປີດວ່າ: ວຽກງານພິທີການທູດ ເປັນວຽກງານໜຶ່ງທີ່ມີຄວາມໝາຍຄວາມສຳຄັນໃນການເຄື່ອນໄຫວພົວພັນໃນສັງຄົມ ໂດຍສະເພາະການພົວພັນສາກົນ; ການເຝິກອົບຮົມວຽກງານພິທີການທູດຄັ້ງນີ້ ມີຈຸດປະສົງເພື່ອກະກຽມຄວາມພ້ອມຮອບດ້ານໃຫ້ແກ່ພັນລະຍາການນຳຂອງສະພາແຫ່ງຊາດ ໃນການປະກອບສ່ວນເຂົ້າຮ່ວມການເຄື່ອນໄຫວ ແລະ ກິດຈະກຳຕ່າງໆ ຂອງພັນລະຍາການນຳຂອງຄະນະຜູ້ແທນຂັ້ນສູງທີ່ຈະເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ ຄັ້ງທີ 45 ທີ່ສະພາແຫ່ງຊາດລາວຈະເປັນເຈົ້າພາບໃນເດືອນຕຸລານີ້ ໃຫ້ບັນລຸໄດ້ຕາມແຜນການທີ່ວາງໄວ້ຢ່າງມີປະສິດທິຜົນສູງ.
ໃນການເຝິກອົບຮົມ, ຜູ້ເຂົ້າຮ່ວມໄດ້ຮັບຟັງຄວາມຮູ້ພື້ນຖານທາງດ້ານພິທີການທູດ, ການກະກຽມພິທີການຕ່າງໆໃຫ້ແກ່ການນຳຂັ້ນສູງເຄື່ອນໄຫວຕ່າງປະເທດ ແລະ ຕ້ອນຮັບການນຳຂັ້ນສູງຂອງຕ່າງປະເທດ; ມາລະຍາດທາງສັງຄົມ ແລະ ເຝິກຕົວຈິງວິທີການເຂົ້າຮ່ວມງານລ້ຽງທາງການຕ່າງໆ; ບົດຮຽນ ແລະ ປະສົບການຂອງທ່ານ ດຣ. ນາງ ວິ ພາວັນ ພົມວິຫານ ໃນການຕິດຕາມການນຳຂັ້ນສູງຂອງສະພາແຫ່ງຊາດ ໄປເຄື່ອນໄຫວຕ່າງປະເທດ ແລະ ຕ້ອນຮັບຄະ ນະຜູ້ແທນຂັ້ນສູງຂອງລັດຖະສະພາຕ່າງປະເທດ. ນອກຈາກນັ້ນ, ຍັງໄດ້ມີການສາທິດຕົວຈິງວິທີການເຂົ້າຮ່ວມງານລ້ຽງທາງການຕ່າງໆ, ປະກອບຄວາມຄິດເຫັນ, ສົນທະນາຖາມ-ຕອບ ຢ່າງສ້າງສັນ, ກົງໄປກົງມາ, ຍົກໃຫ້ເຫັນສະພາບການຕົວຈິງ ແລະ ບົດຮຽນປະສົບການທີ່ດີ ເພື່ອໝູນໃຊ້ເຂົ້າໃນການເຄື່ອນໄຫວຕົວຈິງໃນໄລຍະກອງປະຊຸມໄອປາ ໃຫ້ໄດ້ຮັບຜົນສຳເລັດຢ່າງຈົບງາມ.
(ນາງ ອາລິນ ສຸພິມມະປະດິດ)