(ສພຊ) – ວັນທີ 14-15 ທັນວາຜ່ານມາ ທີ່ເມືອງວັງວຽງ ແຂວງວຽງຈັນ ໄດ້ມີກອງປະຊຸມເຝິກອົບຮົມສ້າງຄວາມເຂັ້ມແຂງກ່ຽວກັບການເປັນເລຂາການນໍາທີ່ດີ ໃຫ້ແກ່ບັນດາເລຂານຸການການນໍາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ພາຍໃຕ້ການເປັນປະທານຂອງທ່ານ ສິງຄໍາ ວົງພະຈັນ ຮອງເລຂາທິການສະພາແຫ່ງຊາດ ໂດຍການເຂົ້າຮ່ວມໂອ້ລົມຂອງທ່ານ ນາງ ອຳໄພວອນ ລ້ອມບຸນແພງ ກໍາມະການສໍາຮອງສູນກາງພັກ, ເລຂາທິການສະພາແຫ່ງຊາດ ເຊິ່ງມີວິທະຍາກອນຈາກຫ້ອງວ່າການສູນກາງພັກ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ 120 ກວ່າທ່ານ.

ທ່ານ ສິງຄຳ ວົງພະຈັນ ໄດ້ກ່າວເປີດກອງປະຊຸມວ່າ: ການເຝິກອົບຮົມຄັ້ງນີ້ ເພື່ອບໍາລຸງດ້ານທິດສະດີ ແລະ ບົດຮຽນຕົວຈິງ, ເສີມສ້າງທັກສະບຸກຄະລິກກະພາບ ໃຫ້ແກ່ພະນັກງານທີ່ກໍາລັງປະຕິບັດໜ້າທີ່ເປັນເລຂານຸການການນຳຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອປະກອບສ່ວນເຮັດໜ້າທີ່ວຽກງານທີ່ຕົນເອງຮັບຜິດຊອບໃຫ້ມີຄວາມສົມບູນ ແລະ ຕອບສະໜອງໄດ້ຕາມຄວາມຮຽກຮ້ອງຕ້ອງການໃນໜ້າທີ່ການເມືອງທີ່ໄດ້ຮັບມອບໝາຍ ໃຫ້ໄດ້ຮັບຜົນດີ, ມີປະສິດທິພາບ ແລະ ປະສິດທິຜົນສູງຂຶ້ນ; ເປີດໂອກາດໃຫ້ບັນດາເລຂານຸການການນຳ ທີ່ຢູ່ທັງສູນກາງ ແລະ ທ້ອງຖິ່ນ ໄດ້ຮຽນຮູ້ສິ່ງໃໝ່ຈາກບັນດາວິທະຍາກອນທີ່ມີປະສົບການ, ມີຄວາມຮູ້ຄວາມສາມາດ ທັງເປັນການແລກປ່ຽນບົດຮຽນ ແລະ ປະສົບການຈາກສຳມະນາກອນດ້ວຍກັນ.

ບັນດາຜູ້ເຂົ້າຮ່ວມໄດ້ຮັບຟັງບົດຮຽນໃນການຮ່າງເອກະສານທາງການ ເຊັ່ນ: ຮ່າງບົດຄໍາເຫັນ, ຮ່າງບົດໂອ້ລົມ, ຮ່າງບົດປະກອບຄໍາເຫັນ ແລະ ວຽກສຳຄັນໃດໜຶ່ງ ແລະ ບາງບົດຮຽນໃນການເປັນເລຂານຸການການນໍາ; ຈາກນັ້ນ, ໄດ້ພ້ອມກັນຍົກສູງຄວາມຮັບຜິດຊອບໃນການຄົ້ນຄວ້າ ແລະ ແລກປ່ຽນປະກອບຄວາມຄິດເຫັນຢ່າງກົງໄປກົງມາ ເພື່ອໃຫ້ມີຄວາມຮູ້ດ້ານທິດສະດີ ແລະ ບົດຮຽນຕົວຈິງ ທີ່ນັບມື້ຍິ່ງມີຄວາມຮຽກຮ້ອງຕ້ອງການໃນການເພີ່ມຄວາມຮູ້ໃຫ້ຫຼາຍຂຶ້ນ ຈົນກ້າວໄປເຖິງຄວາມຊໍານານງານ ເພື່ອຮັບໃຊ້ການນໍາຂັ້ນສູງໃຫ້ມີປະສິດທິຜົນຍິ່ງຂຶ້ນ.

ທ່ານ ນາງ ອຳໄພວອນ ລ້ອມບຸນແພງ ໄດ້ມີຄຳຄິດຄຳເຫັນເນັ້ນໜັກໃຫ້ມີຄວາມຮັບຜິດຊອບຕໍ່ໜ້າທີ່ວຽກງານ, ມີຄວາມອົດທົນເສຍສະຫຼະ-ດຸໝັ່ນ, ບຸກບືນຫ້າວຫັນ, ເອົາໃຈໃສ່ຄົ້ນຄວ້າຮ່ຳຮຽນ, ກໍາແໜ້ນແນວທາງນະໂຍບາຍ ກົດໝາຍ ລະບຽບການຕ່າງໆ, ມີມະນຸດສຳພັນດີໃນການປະສານງານ, ການປະຕິບັດວຽກງານຄ່ອງແຄ້ວ ນິ້ມນວນ ຫ້າວຫັນ ວ່ອງໄວ ຊັດເຈນ, ມີສະຕິປະຕິບັດກົດໝາຍ ແລະ ລະບຽບການຢ່າງເຂັ້ມງວດ, ບໍ່ສວຍໃຊ້ໜ້າທີ່ຂອງການນໍາຫາຜົນປະໂຫຍດ; ເອົາໃຈໃສ່ປັບປຸງ ຫຼື ປະຕິບັດລະບອບແບບແຜນວິທີເຮັດວຽກ, ຍົກລະດັບຄວາມຮູ້ຮອບດ້ານ, ຍົກສູງຄຸນນະພາບໃນການປະສານງານ ແລະ ການຮັກສາຄວາມລັບ.

(ນາງ ອາລິນ ສຸພິມມະປະດິດ)