(ສພຊ) – ກອງປະຊຸມເຝິກອົບຮົມການເປັນວິທະຍາກອນໃຫ້ແກ່ຄະນະກົມ, ສູນ, ຫ້ອງການ ຂອງສະພາແຫ່ງ ຊາດ (ສພຊ) ແລະ ຄະນະກຳມະການ, ຄະນະເລຂາທິການສະພາປະຊາຊົນແຂວງ (ສພຂ) ວຽງຈັນ, ບໍລິຄຳໄຊ ແລະ ໄຊສົມບູນ ໄດ້ຈັດຂຶ້ນໃນວັນທີ 13-16 ທັນວານີ້ ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງ ຊາດ, ມີບັນດາທ່ານຄະນະຮັບຜິດຊອບກອງປະຊຸມ ແລະ ວິທະຍາກອນ ເຂົ້າຮ່ວມ 50 ກວ່າທ່ານ; ຈຸດປະສົງແມ່ນເພື່ອພັດທະນາວິທະຍາກອນຂອງ ສພຊ ແລະ ສພຂ ໃຫ້ເປັນເອກະພາບລວມສູນ ແລະ ລົງເລິກສະເພາະດ້ານ ທັງຮັບປະກັນດ້ານເນື້ອໃນຫົວຂໍ້ຫຼັກສູດ, ຄູ່ມືການສອນຢ່າງມີຈຸດສຸມ, ຍົກສູງປະສິດທິພາບ ແລະ ປະສິດທິຜົນໃນການສະເໜີ, ອະທິບາຍເນື້ອໃນບົດຮຽນ ແລະ ການຄົ້ນຄວ້າເອກະສານໃຫ້ດີກວ່າເກົ່າ.

ທ່ານ ສຈ. ປອ. ຈະເລີນ ເຍຍປາວເຮີ ໄດ້ມີຄຳເຫັນກ່າວເປີດກອງປະຊູມວ່າ: ການເຝິກອົບຮົມຄັ້ງນີ້ ເປັນການຈັດຕັ້ງປະຕິບັດແຜນການຍົກສູງຂີດຄວາມສາມາດໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາ ຊົນຂັ້ນແຂວງ ແລະ ພະນັກງານທີ່ເປັນເສນາທິການ ໄລຍະປີ 2024-2025 ໃຫ້ສຳເລັດ ແນໃສ່ສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນຖານະເປັນອົງການຕົວແທນໃຫ້ແກ່ສິດ ແລະ ຜົນປະ ໂຫຍດຂອງປະຊາຊົນບັນດາເຜົ່າ ໃຫ້ນັບມື້ນັບດີຍິ່ງຂຶ້ນ.

ຜູ້ເຂົ້າຮ່ວມໄດ້ຮັບຟັງການສະເໜີ ແລະ ແລກປ່ຽນຄວາມເຫັນຕໍ່ການສ້າງຄວາມເຊື່ອໝັ້ນສຳຫຼັບວິທະຍາ ກອນ ແລະ ປາຖະກະຖາ, ບົດບາດການເປັນວິທະຍາກອນ, ແລະ ການສ້າງແຜນການສອນ-ການກະກຽມບົດນຳສະເໜີ; ບັນດາສຳມະນາກອນໄດ້ເອົາໃຈໃສ່ຕິດຕາມຮັບຟັງການສະເໜີ, ຄົ້ນຄວ້າ, ແລກປ່ຽນຄຳເຫັນຕໍ່ເນື້ອໃນຫົວຂໍ້ຕ່າງໆທີ່ວິທະຍາກອນນຳມາສະເໜີ ເພື່ອສາມາດເປັນວິທະຍາກອນທີ່ມີຄຸນນະພາບສູງຂຶ້ນ ແລະ ທົດລອງເປັນວິທະຍາກອນຕົວຈິງ.

ການເຝິກອົບຮົມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກມູນນິທິເອເຊຍ (TAF) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະເລຂາ ທິການສະພາແຫ່ງຊາດ.

(ສອນສັກ ວັນວິໄຊ)