ໂດຍປະຕິບັດຕາມ ແຈ້ງການ ຂອງພະແນກພາຍໃນແຂວງສາລະວັນ ສະບັບເລກທີ 36/ພນຂ ລົງວັນທີ 15 ຕຸລາ 2023 ກ່ຽວກັບ ການສັງລວມລາຍງານ ຜົນປະເມີນການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ (ວຽກງານ 3 ສ້າງ) ປະຈໍາປີ 2023 ໃຫ້ໄດ້ຮັບຜົນສຳເລັດຕາມຄາດໝາຍ ແລະ ທັນຕາມກຳນົດເວລາ; ຕອນເຊົ້າວັນທີ 23 ຕຸລາ 2023 ນີ້, ຢູ່ທີ່ຫ້ອງປະຊຸມສະພາປະຊາຊົນແຂວງສາລະວັນ ໄດ້ຈັດກອງປະຊຸມເຜີຍແຜ່ແນະນຳ ກ່ຽວກັບ ການປະເມີນຜົນການຈັດຕັ້ງປະຕິບັດ ການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ປະຈໍາປີ 2023 ພາຍໃນສະພາປະຊາຊົນແຂວງ, ໂດຍການເປັນປະທານກອງປະຊຸມຂອງທ່ານ ນາງ ສູນໄຖ ໄຊຍະແສງ ກຳມະການພັກແຂວງ ຮອງປະທານສະພາປະຊາຊົນແຂວງ, ເຂົ້າຮ່ວມມີຄະນະປະຈໍາ, ຄະນະກຳມະການ, ເລຂາທິການ, ບັນດາຫົວໜ້າຂະແໜງ ແລະ ຕາງໜ້າຈາກພະແນກການເງິນແຂວງ ເຂົ້າຮ່ວມຄັ້ງນີ້

;

ຈຸດປະສົງ ເພື່ອເປັນການເຜີຍແຜ່ແນະນຳກ່ຽວກັບ ວິທີການລະອຽດ ແລະ ຂັ້ນຕອນການປະເມີນ ແນ່ໃສ່ໃຫ້ມີການຄົ້ນຄວ້າ, ສ້າງຄວາມຮັບຮູ້ຢ່າງຈະແຈ້ງ ແລະ ເຂົ້າໃຈທີ່ເອກະພາບ ຕາມການຈັດຕັ້ງປະຕິບັດຕົວຈິງໄປໃນລວງດຽວກັນ ຕາມຮ່າງແບບຟອມການປະເມີນຜົນ ທີ່ໄດ້ກຳນົດເອົາ ມາດຖານສ້າງແຂວງເປັນຫົວໜ່ວຍຍຸດທະສາດ ແລະ ຕົວຊີ້ບອກ, ດ້ານຫຼັກການປະເມີນຕ້ອງໃຫ້ສອດຄ່ອງກັບມະຕິ, ຄຳສັງພັກ, ລະບຽບ ແລະ ກົດໝາຍຂອງລັດ ທັງຮັບປະກັນຄວາມຖືກຕ້ອງກັບຂໍ້ມູນກັບຕົວຈິງ  ແລະ ມີຄວາມໂປ່ງໃສ ສາມາດຢັ້ງຢືນລະດັບຄາດໝາຍໃນແຕ່ລະດ້ານໄດ້ຢ່າງສົມເຫດສົມຜົນ;

ວາລະຂອງກອງປະຊຸມ ທ່ານ ສີທາ ພັດທະຟອງ ວິຊາການຂະແໜງຈັດຕັ້ງ, ບໍລິຫານ ແລະ ຄຸ້ມຄອງບັນຊີ ພະແນກການເງິນແຂວງ ທັງເປັນກອງເລຂາໄດ້ຂຶ້ນຜ່ານເອກະສານແຈ້ງການ ຂອງພະແນກພາຍໃນແຂວງສາລະວັນ ສະບັບເລກທີ 36/ພນຂ ລົງວັນທີ 15 ຕຸລາ 2023 ກ່ຽວກັບ ການສັງລວມລາຍງານ ຜົນປະເມີນການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ (ວຽກງານ 3 ສ້າງ) ປະຈໍາປີ 2023 ພ້ອມທັງອະທິບາຍວິທີການ ແລະ ຫຼັກການປະເມີນຜົນຕາມຮ່າງແບບຟອມທີ່ກຳນົດ ມາດຖານສ້າງແຂວງເປັນຫົວໜ່ວຍຍຸດທະສາດ 7 ດ້ານ ແລະ 66 ຕົວຊີ້ບອກ ເປັນຕົ້ນ: ມາດຕະຖານ ຫົວໜ່ວຍຍຸດທະສາດດ້ານການກໍ່ສ້າງພັກ ແລະ ພະນັກງານ, ຫົວໜ່ວຍຍຸດທະສາດດ້ານການປົກຄອງບໍລິຫານລັດ, ຫົວໜ່ວຍຍຸດທະສາດດ້ານການໃນການຊຸກດັນການຂະຫຍາຍຕົວຂອງເສດຖະກິດແຫ່ງຊາດ, ຫົວໜ່ວຍຍຸດທະສາດດ້ານການການເງິນຂອງປະເທດ, ຫົວໜ່ວຍຍຸດທະສາດດ້ານການຄຸ້ມຄອງ, ຂຸດຄົ້ນ ແລະ ນຳໃຊ້ແຫຼ່ງຊັບພະຍາກອນທຳມະຊາດ, ຊັບສິນຂອງລັດ, ພື້ນຖານໂຄງການລ່າງດ້ານເສດຖະກິດ-ສັງຄົມ, ພື້ນຖານວັັດຖຸເຕັກນິກ ແລະ ປົກປັກຮັກສາສິ່ງແວດລ້ອມ, ຫົວໜ່ວຍຍຸດທະສາດດ້ານການຄຸ້ມຄອງວັດທະນະທຳສັງຄົມ ແລະ ການພັດທະນາຊັບພະຍາກອນມະນຸດ, ຫົວໜ່ວຍຍຸດທະສາດດ້ານປ້ອງກັນຊາດ-ປ້ອງກັນຄວາມສະຫງົບທີ່ເຂັ້ມແຂງ, ແຕ່ລະດ້ານຕ້ອງບັນລຸ 80 ສ່ວນຮ້ອຍຂຶ້ນໄປໂດຍທຽບໃສ່ຕົວຊີ້ບອກທັງໝົດເປັນ 100 ສ່ວນຮ້ອຍ; ທັງນີ້ເພື່ອເປັນບ່ອນອີງໃຫ້ສະພາປະຊາຊົນແຂວງ ນຳໄປຈັດຕັ້ງປະຕິບັດໄດ້ຢ່າງມີປະສິດທີພາບ ປະສິດທິຜົນ ແລະ ທັນກຳນົດເວລາ; ຈາກນັ້ນ, ຜູ້ທີ່ເຂົ້າຮ່ວມກອງປະຊຸມໄດ້ພ້ອມກັນຄົ້ນຄວ້າ, ປຶກສາຫາລື ບາງບັນຫາ ທີ່ຍັງບໍ່ທັນໄດ້ເປັນເອກະພາບຮ່ວມກັນຢ່າງເປັນເຈົ້າການ, ຕອນທ້າຍກໍ່ຮັບຟັງການໂອ້ລົມ ຈາກປະທານກອງປະຊຸມ ເພື່ອເປັນທິດຊີ້ນຳໃນການຈັດຕັ້ງປະຕິບັດການເມີນຜົນວຽກງານ 3 ສ້າງຕື່ມອີກ;

ພາບ-ຂ່າວ: ດີລຳພົນ ພົມມະຈັນ