(ສພຊ) ໃນວັນທີ 20 ພະຈິກ ນີ້, ທີ່ສະພາແຫ່ງຊາດ ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ເປີດເວັບໄຊ ກອງປະຊຸມສຸດຍອດລັດຖະສະພາກໍາປູເຈຍ-ລາວ-ຫວຽດນາມ (CLV) ຄັ້ງທີ I ຢ່າງເປັນທາງການ, ມີບັນດາທ່ານຮອງປະທານສະພາແຫ່ງຊາດ, ບັນດາທ່ານຄະນະປະຈໍາ ແລະ ສະມາຊິກສະພາແຫ່ງຊາດເຂົ້າຮ່ວມ.
ໂອກາດນີ້, ທ່ານ ຈັນທະວົງ ແສນອາມາດມົນຕີ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ, ຕາງໜ້າອະນຸກໍາມະການກອງເລຂາ ໄດ້ລາຍງານຫຍໍ້ກ່ຽວກັບການກະກຽມ ແລະ ເປີດໜ້າເວັບໄຊ ກອງປະຊຸດສຸດຍອດ ລັດຖະສະພາ ກໍາປູເຈຍ-ລາວ-ຫວຽດນາມ (CLV) ຄັ້ງທີ I ຢ່າງເປັນທາງການວ່າ: ອະນຸກໍາມະການກອງເລຂາ ໄດ້ສົມທົບກັບສູນບໍລິຫານດີຈີຕອນ ກະຊວງເຕັກໂນໂລຊີ ແລະ ການສື່ສານ ຄົ້ນຄວ້າ ແລະ ພັດທະນາ ສ້າງເວັບໄຊຂອງກອງປະຊຸມສຸດຍອດ ລັດຖະສະພາ (CLV) ຄັ້ງທີ I ດ້ວຍຈຸດປະສົງ ເພື່ອເຜີຍແຜ່ຂໍ້ມູນ-ຂ່າວສານ ຂອງກອງປະຊຸມສຸດຍອດລັດຖະສະພາ ກໍາປູເຈຍ-ລາວ-ຫວຽດນາມ (CLV) ຄັ້ງທີ I ອອກສູ່ສາທາລະນະ ເວົ້າລວມ, ເວົ້າສະເພາະ ກໍຄືປະຊາຊົນລາວບັນດາເຜົ່າ ໃນຂອບເຂດທົ່ວປະເທດ ແລະ ພາກພື້ນ ຮັບຊາບ, ເປັນຂໍ້ມູນພື້ນຖານໃຫ້ແກ່ສະພາແຫ່ງຊາດ ກໍາປູເຈຍ-ລາວ-ຫວຽດນາມ ໃນການຕິດຕາມເອກະສານຂອງກອງປະຊຸມຄັ້ງນີ້. ພ້ອມນີ້, ໂຄງຮ່າງໜ້າເວັບໄຊ ປະກອບມີ 2 ພາສາຄື: ພາສາລາວ ແລະ ພາສາອັງກິດ ໜ້າຫຼັກ (HOME): ສະແດງຮູບພາບ ແລະ ຂ່າວການເຄື່ອນໄຫວກິດຈະກໍາຕ່າງໆ ຂອງກອງປະຊຸມສຸດຍອດລັດຖະສະພາ ກໍາປູເຈຍ-ລາວ-ຫວຽດນາມ (CLV) ຄັ້ງທີ I; ໜ້າກ່ຽວກັບ (ABOUT): ແມ່ນໜ້າສະແດງຂໍ້ມູນຄໍາຂວັນກອງປະຊຸມ, ສານສະແດງຄວາມຍິນດີຕ້ອນຮັບ, ຖະແຫຼງການຮ່ວມຂອງສາມປະທານສະພາແຫ່ງຊາດ, ປະຫວັດຄວາມເປັນມາຂອງກອງປະຊຸມສຸດຍອດລັດຖະສະພາ ກໍາປູເຈຍ-ລາວ-ຫວຽດນາມ ແລະ ລະບຽບການດໍາເນີນກອງປະຊຸມ; ໜ້າເອກະສານ (DOCUMENTS) ແມ່ນໜ້າສະແດງຂໍ້ມູນເນື້ອໃນໜັງສືເຊີນ, ຮ່າງວາລະກອງປະຊຸມ, ຕາຕະລາງການດຳເນີນກອງປະຊຸມ, ຮ່າງຖະແຫຼງການຮ່ວມຂອງກອງປະຊຸມ, ລາຍຊື່ຄະນະຜູ້ແທນເຂົ້າຮ່ວມ, ຂໍ້ມູນທົ່ວໄປ, ຟອມການລົງທະບຽນ ແລະ ເອກະສານທີ່ກ່ຽວຂ້ອງອື່ນໆ; ໜ້າກອງປະຊຸມກໍາມາທິການ (COMMITTEE MEETING) ແມ່ນໜ້າ ສະແດງຂໍ້ມູນເນື້ອໃນການປະຊຸມສາມກໍາມາທິການຄື: ກໍາມາທິການການຕ່າງປະເທດ, ກໍາມາທິການ ເສດຖະກິດ-ສັງຄົມ ແລະ ກໍາມາທິການປ້ອງກັນຊາດ-ປ້ອງກັນຄວາມສະຫງົບ; ໜ້າກິດຈະກໍາປິ່ນອ້ອມ (SIDE EVENT): ແມ່ນໜ້າສະແດງຂໍ້ມູນກິດຈະກໍາການເຄື່ອນໄຫວ ກິລາແຂ່ງລົດຖີບ; ໜ້າຂ່າວສານ (MEDIA): ແມ່ນໜ້າສະແດງຂໍ້ມູນເນື້ອໃນຂ່າວຕ່າງໆ, ຮູບພາບ, ພາບເຄື່ອນໄຫວຂອງກອງປະຊຸມ; ໜ້າຕິດຕໍ່ພົວພັນ (CONTACT) ແມ່ນໜ້າສະແດງຂໍ້ມູນ ການຕິດຕໍ່ປະສານງານກອງເລຂາກອງປະຊຸມ ແລະ ພະນັກງານເຕັກນິກ.
