1 ພະຈິກ 2024 ທີ່ຜ່ານມາ, ຄະນະຜູ້ແທນຂັ້ນສູງ ສະພາປະຊາຊົນແຂວງ ເທືື່ອທຽນເຫວ້ ແຫ່ງ ສສ.ຫວຽດນາມ ພົບປະແລກປ່ຽນບົດຮຽນຮ່ວມກັບ ຄະນະຜູ້ແທນຂັ້ນສູງ ສະພາປະຊາຊົນແຂວງ ສາລະວັນ ແຫ່ງ ສປປລາວ ຢູ່ທີ່ຫ້ອງປະຊຸມສະພາປະຊາຊົນແຂວງ ເທື່ອທຽນເຫວ້ ສສ.ຫວຽດນາມ; ຝ່າຍແຂວງເທື່ອທຽນເຫວ້ ເຂົ້າຮ່ວມພົບປະແລກປ່ຽນບົດຮຽນໃນຄັ້ງນີ້ ຂອງສະຫາຍ ຫງວຽນ ກວາງ ຕ໋ວນ ຄະນະປະຈໍາພັກແຂວງ ຮອງປະທານ ຜູ້ປະຈໍາການ ສະພາປະຊາຊົນແຂວງ ເທື່ອທຽນເຫວ້ ແລະ ຝ່າຍແຂວງສາລະວັນ ເຂົ້າຮ່ວມຂອງສະຫາຍ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ ສາລະວັນ ມີຕາງໜ້າຄະນະຜູ້ແທນຂັ້ນສູງ ສະພາປະຊາຊົນ ສອງ ແຂວງ ເຂົ້າຮ່ວມ;

ໃນທີ່ປະຊຸມ ທັງສອງຝ່າຍໄດ້ຜັດປ່ຽນລາຍງານໃຫ້​ກັນ ແລະ ກັນ ຮັບຊາບກ່ຽວກັບ ສະພາບ​ການ​ພັດທະນາເສດຖະກິດ-ສັງຄົມ ​ຂອງແຂວງ ແລະ ສະພາບການ​ເຄື່ອນ​ໄຫວວຽກງານ​ອັນ​ພົ້ນ​ເດັ່ນ​ຂອງ​ສະພາ​ປະຊາຊົນ​ແຂວງ ແລະ ໄດ້ລົງເລິກຄົ້ນຄວ້າປຶກສາຫາລືແລກປ່ຽນບົດຮຽນນຳກັນໂດຍແລກປ່ຽນໃນຫົວຂໍ້ທີ່ສອງແຂວງມີຄວາມສົນໃຈ ຜ່ານການຈັດຕັ້ງປະຕິບັດຕົວຈິງໃນໄລຍະຜ່ານມາ, ​​ການ​ພົບ​ປະ 2 ຝ່າຍ​ໄດ້​ເຫັນ​ດີຮັບເອົາຄໍາສະເໜີ ​ໃນ​ຕໍ່ໜ້າ, ຈະ​ສືບ​ຕໍ່​ພົບປະ ​ແລະ ​ແລກປ່ຽນ​ບົດຮຽນ​ໃນ​ການ​ເຄື່ອນ​ໄຫວ​ວຽກ​ງານ​ສະພາ​ປະຊາຊົນ​ແຂວງ; ສືບ​ຕໍ່​ປະຕິບັດ​ຂໍ້​ຕົກລົງ​ທີ່​ໄດ້​ລົງ​ນາມ​ໃນ​ປີ 2022 ລະຫວ່າງ​ການ​ນຳ​ສອງ​ແຂວງ​ຢ່າງ​ມີ​ປະສິດທິ​ຜົນ; ​ເພີ່ມ​ທະວີ​ການ​ຮ່ວມ​ມື​ດ້ານ​ການ​ເມືອງ, ການ​ທູດ, ຍົກ​ສູງ​ປະສິດທິ​ຜົນ​ການ​ພົວພັນ​ຮ່ວມ​ມື​ໃນ​ທຸກ​ຂົງ​ເຂດ; ​​ໃຫ້ການນະ​ໂຍບາຍຍົກລະດັບດ້ານການສຶກສາໃຫ້ພະນັກງານ; ຄົ້ນຄວ້າ ແລະ ສະເໜີຊຸກຍູ້, ຂະຫຍາຍ ແລະ ຫັນປ່ຽນການເຄື່ອນໄຫວສົ່ງເສີມການຄ້າ ແລະ ຂົນສົ່ງສິນຄ້າຢູ່ແລວເສດຖະກິດຜ່ານທ່າເຮືອເຈີນເມີຍ-ລັງໂກ; ຄົ້ນຄວ້າ​ສ້າງ​ຄວາມ​ຫຼາກ​ຫຼາຍ​ດ້ານ​ໂຄງ​ປະກອບ​ການ​ສົ່ງ​ອອກ​ສິນຄ້າ ​ເພື່ອ​ເພີ່ມ​ໂອກາດ​ສົ່ງ​ອອກ​ສິນຄ້າ​ຈາກ​​ແຂວງ​ສາລະ​ວັນ ໄປຍັງປະເທດກົງກັນຂ້າມ;

ໂອກາດດຽວກັນ, ຄະນະຜູ້ແທນຂັ້ນສູງ ສະພາປະຊາຊົນແຂວງ ສາລະວັນ ໄດ້ເດີນທາງໄປທັດສະນະ ເຂດເສດຖະກິດ, ອຸດສາຫະກໍາ, ແຫຼ່ງທ່ອງທ່ຽວ ຂອງແຂວງເທືອທຽນເຫວ້ ເປັນຕົ້ນ: ຢ້ຽມຊົມບໍລິສັດ ຄິມ ລົງ ມໍເຕີ ເຊິ່ງເປັນບໍລິສັດດຳເນີນທຸລະກິດດ້ານການຜະລິດ ແລະ ຈຳໜ່າຍພາຫະນະ; ການຜະລິດລົດໃຫຍ່ (ລົດຕູ້, ລົດເມ), ຊິ້ນສ່ວນ & ສ່ວນປະກອບອາໄລ່; ເປັນທຸລະກິດພື້ນຖານໂຄງລ່າງສວນອຸດສາຫະກຳ ແລະ ຢ້ຽມຊົມ ເຂດເສດຖະກິດ ເຈິນເມີຍ-ລັງໂກ  ເປັນຈຸດສູນກາງທາງດ້ານເສດຖະກິດ ຂອງແຂວງເທື່ອທຽນເຫວ້ ແລະ ນະຄອນດານັງ (ທ່າກໍາປັນທະເລ) ແລະ ໄດ້ເດີນທາງໄປຢ້ຽມຊົມ ອັງສະນາ ລີສອດ ເຄມທະເລ, ສະໜາມກ໋ອບ ຕື່ມອີກ.