ເພື່ອເຮັດໃຫ້ພະນັກງານ-ລັດຖະກອນ ພາຍໃນແຂວງ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງກວ້າງຂວາງ ຕໍ່ພາລະບົດບາດ, ຜົນງານຂອງ ວຽກງານງານປ້ອງກັນຊາດ-ປ້ອງກັນຄວາມສະຫງົບ ແລະ ການມີສ່ວນຮ່ວມຂອງທົ່ວທຸກຂົງເຂດຢ່າງເປັນເຈົ້າການ; ມາໃນຕອນເຊົ້າຂອງວັນທີ 7 ພຶດສະພາ 2024 ທີ່ຜ່ານມານີ້, ພະນັກງານ-ລັດຖະກອນ ຂົງເຂດປົກປ້ອງກົດໝາຍ ແລະ ຂົງເຂດເສດຖະກິດ ໄດ້ເຊື່ອມຊຶມຮັບຟັງການເຜີຍແຜ່ຜົນສຳເລັດຂອງກອງປະຊຸມວຽກງານ ປ້ອງກັນຊາດ-ປ້ອງກັນຄວາມສະຫງົບ 4 ແຂວງພາກໃຕ້ (ເຊກອງ, ສາລະວັນ, ອັດຕະປື, ຈໍາປາສັກ ແລະ ກອງພັນທີ 5) ປະຈໍາປີ 2023 ແລະ ທິດທາງແຜນການວຽກງານຈຸດສຸມ ປີ 2024 ແລະ ຕີລາຄາການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ປະຈໍາປີ 2023 ແລະ ວາງທິດທາງແຜນການປະຈໍາປີ 2024 ຂອງແຂວງ; ໂດຍການເປັນປະທານກອງປະຊຸມຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງສາລະວັນ ຮອງປະທານຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບແຂວງ; ເຂົ້າຮ່ວມມີຫົວໜ້າຫ້ອງການປ້ອງກັນຊາດ-ປ້ອງກັນຄວາມສະຫງົບແຂວງ; ຮອງປະທານຄະນະກຳມະການ, ຄະນະເລຂາທິການ, ບັນດາທ່ານຫົວໜ້າ, ຮອງຫົວໜ້າພະແນກການ, ອົງການທຽບເທົ່າລັດຂັ້ນແຂວງ ຕະຫຼອດຮອດພະນັກງານພາຍໃນສອງຂົງເຂດດັ່ງກ່າວເຂົ້າຮ່ວມຮັບຟັງທັງໝົດ 170 ກວ່າທ່ານ;
ວາລະຂອງກອງປະຊຸມ ທ່ານ ພັອ ເຄນຄໍາ ວໍລະຈິດ ຫົວໜ້າຫ້ອງການປ້ອງກັນຊາດ-ປ້ອງກັນຄວາມສະຫງົບແຂວງ ໄດ້ຂຶ້ນເຜີຍແຜ່ ເນື້ອໃນສໍາຄັນຂອງກອງປະຊຸມວຽກງານ ປ້ອງກັນຊາດ-ປ້ອງກັນຄວາມສະຫງົບ 4 ແຂວງພາກໃຕ້ (ເຊກອງ, ສາລະວັນ, ອັດຕະປື, ຈໍາປາສັກ ແລະ ກອງພັນທີ 5) ປະຈໍາປີ 2023 ແລະ ທິດທາງແຜນການວຽກງານຈຸດສຸມ ປີ 2024 ແລະ ຕີລາຄາການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ປະຈໍາປີ 2023 ແລະ ວາງທິດທາງແຜນການປະຈໍາປີ 2024 ຂອງແຂວງ; ຈາກນັ້ນ, ປະທານກອງປະຊຸມໄດ້ມີຄໍາເຫັນເຈາະຈິ້ມລົງເລິກບາງບັນຫາ ເພື່ອໃຫ້ຜູ້ທີ່ເຂົ້າຮ່ວມຮັບຟັງ ໄດ້ແລກປ່ຽນສົນທະນາ ແລະ ປະກອບຄໍາຄິດເຫັນ ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ແນ່ໃສ່ປັບປຸງຂອດການເຄື່ອນໄຫວວຽກງານຂອງປ້ອງກັນຊາດ-ປ້ອງກັນຄວາມສະຫງົບ ໃຫ້ຄ່ອງຕົວດີຂຶ້ນກວ່າເກົ່າ;
ພ້ອມນີ້, ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງສາລະວັນ ຮອງປະທານ ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບແຂວງ ໄດ້ມີຄໍາເຫັນກ່າວໃນຕອນທ້າຍໃນທີ່ປະຊຸມວ່າ: ເພື່ອເປັນການປະຕິບັດ ຕໍ່ມະຕິຂອງກອງປະຊຸມວຽກງານປ້ອງກັນຊາດ-ປ້ອງກັນຄວາມສະຫງົບ 4 ແຂວງພາກໃຕ້ ໃຫ້ກວ້າງຂວາງແຜ່ຫຼາຍ ທຸກພາກສ່ວນທຸກຂັ້ນ ຕ້ອງໄດ້ເພີ່ມທະວີ ຜັນຂະຫຍາຍ ເຜີຍແຜ່ແນະນໍາເນື້ອໃນສໍາຄັນຕ່າງໆທີ່ລະບຸໄວ້ ໃຫ້ຮັບຮູ້ ແລະ ເຂົ້າໃຈແຈ້ງຢ່າງເລິກເຊິ່ງ ເພາະເປັນວຽກຂອງໝົດທຸກຄົນ; ປະສານສົມທົບຫັນເອົາກໍາລັງຂອງຕົນ ລົງສູ່ຮາກຖານຂັ້ນບ້ານ ເພື່ອຊຸກຍູ້ຂະບວນການຕ່າງໆ ກະກຽມກອງປະຊຸມສາມຂັ້ນຂອງພັກໃຫ້ເປັນຂະບວນກວ້າງຂວາງ; ເອົາໃຈໃສ່ປັບປຸງກົມກອງ ສ້າງພາລາທິການກັບທີ່ ມີກອງທຶນເພື່ອຊ່ວຍເຫຼືອແກ້ໄຂເມື່ອມີເຫດການສຸກເສີນ ແລະ ທຸກພາກສ່ວນຕ້ອງຫັນທຸກຂົງເຂດວຽກງານໃຫ້ເຂົ້າສູ່ດິຈິຕອນທັນສະໄໝ ຕາມແນວທາງນະໂຍບາຍຂອງພັກ-ລັດ ໂດຍການນໍາໃຊ້ເຄື່ອງມືລະບົບທີ່ທັນສະໄໝເຂົ້າໃນວຽກງານ ເພື່ອສົ່ງຂໍ້ມູນລາຍງານໄດ້ຢ່າງວ່ອງໄວ, ທຸກສໍານັກງານຫ້ອງການ ຖ້າມີເງື່ອນໄຂຄວນຕິດກ້ອງວົງຈອນ ເພື່ອເຟົ້າລະວັງກຸ່ມຄົນບໍ່ຫວັງດີ ແລະ ເປັນຫຼັກຖານໜຶ່ງ ໃຫ້ເຈົ້າໜ້າທີ່ປະກອບເຂົ້າໃນການຕັດສິນຄະດີໄດ້ຢ່າງຖືກຕ້ອງເປັນທໍາ ແລະ ເຮັດໃຫ້ສັງຄົມມີຄວາມມີຄວາມສະຫງົບ ແລະ ເຄົາລົບກົດໝາຍ;
ພາບ-ຂ່າວ: ດີລໍາພົນ ພົມມະຈັນ